ഇരിട്ടി : മാക്കൂട്ടം ചുരംപാതയിൽ രണ്ടുവർഷത്തെ ഇടവേളയ്ക്കുശേഷം ഗതാഗതം പതിവുപോലെയായതിന്റെ ആശ്വാസത്തിലാണ് അന്തസ്സംസ്ഥാന യാത്രക്കാർ. കോവിഡ് നിയന്ത്രണങ്ങൾ കഴിഞ്ഞദിവസം പൂർണമായും നീക്കിയതോടെ ചുരംപാത വഴിയുള്ള യാത്രക്കാരുടെ എണ്ണം പതിൻമടങ്ങ് വർധിച്ചു.

പൊതുഗതാഗതവും പൂർണതോതിലായതോടെ മേഖലയിലെ വ്യാപാര-വാണിജ്യ മേഖലയിലും പ്രത്യേക ഉണർവ് പ്രകടമായി. കോവിഡിനെത്തുടർന്ന് അന്തസ്സംസ്ഥാന യാത്രക്കാർക്കും ചരക്ക് വാഹനങ്ങൾക്കും ഏർപ്പെടുത്തിയ നിയന്ത്രണം ഒരുവർഷമായി അതുപോലെ തുടരുകയായിരുന്നു. കോവിഡിന്റെ പേരിൽ സംസ്ഥാന അതിർത്തിയിൽ മണ്ണിട്ട് ഗതാഗതം പൂർണ്ണമായും തടഞ്ഞത് ആദ്യം മാക്കൂട്ടത്തായിരുന്നു.

ഇതിനു മാറ്റം വന്നെങ്കിലും രണ്ടാംതരംഗത്തോടെ കടുത്ത നിയന്ത്രണം ഏർപ്പെടുത്തുകയായിരുന്നു. കേന്ദ്ര സർക്കാർ രണ്ട് ഡോസ് വാക്സിനെടുത്തവർക്ക് രാജ്യം മുഴുവൻ നിയന്ത്രണം ഇല്ലാതെ സഞ്ചരിക്കാമെന്ന ഉത്തരവിറക്കിയിട്ടും ചുരംപാതയിലെ നിയന്ത്രണം നീക്കാൻ അധികൃതർ തയ്യാറായിരുന്നില്ല.

കേരള-ഗോവ സംസ്ഥാനങ്ങളിൽനിന്ന് എത്തുന്നവർക്ക് ആർ.ടി.പി.സി.ആർ. വേണമെന്ന ഉത്തരവ് വ്യാഴാഴ്ചയാണ് കർണാടക സർക്കാർ പിൻവലിച്ചത്. രണ്ട് ഡോസ് വാക്സിനെടുത്തതിന്റെ സർട്ടിഫിക്കറ്റ് അതിർത്തി കടക്കാൻ നിർബന്ധമാക്കിയിട്ടുണ്ട്. വെള്ളിയാഴ്ച രാവിലെയാണ് ആർ.ടി.പി.സി.ആർ. നിയന്ത്രണങ്ങൾ നീക്കിക്കൊണ്ടുള്ള ഉത്തരവ് ചെക്പോസ്റ്റ് അധികൃതർക്ക് ലഭിച്ചത്. ചുരം പാത വഴിയുള്ള സ്ഥിരം യാത്രക്കാർക്ക് പുറമെ ഇരുചക്രവാഹനങ്ങളും ടാക്സികളും ഉൾപ്പെടെ നിരവധി വാഹനങ്ങൾ പുലർച്ചെമുതൽ തന്നെ എത്തി.

കേരളത്തിൽനിന്നുള്ള യാത്രക്കാർക്ക് കർണാടകത്തിൽ പ്രവേശിക്കുന്നതിന് ചുരംപാതയിൽ ഏർപ്പെടുത്തിയ നിയന്ത്രണം നീക്കിയതിൽ കോൺഗ്രസ് പ്രവർത്തകർ വിരാജ്പേട്ടയിൽ മധുരം വിതരണം ചെയ്ത് ആഹ്ലാദം പ്രകടിപ്പിച്ചു. കുടക് ഡി.സി.സി. പ്രസിഡന്റ് ധർമരാജ ഉത്തപ്പ, വീരാജ്‌പേട്ട നഗരസഭാ കൗൺസിലർ സി.കെ. പ്രിത്യുനാഥ്, ഡി.സി.സി. അംഗം ആർ.കെ.സലാം, കോൺഗ്രസ് വീരാജ്‌പേട്ട ടൗൺ കമ്മിറ്റി പ്രസിഡന്റ് ജി.ജി. മോഹൻ തുടങ്ങിയവർ നേതൃത്വം നൽകി.