കണ്ണൂർ : പയ്യാമ്പലം പാർക്കിലിപ്പോൾ പലനിറത്തിലുള്ള കളിയുപകരണങ്ങളാണ് കുട്ടികളെ കാത്തിരിക്കുന്നത്. പുതുമോടിയിൽ അടുത്ത മാസം പാർക്ക് കുട്ടികൾക്കായി തുറന്നുകൊടുക്കും. കോവിഡിനെത്തുടർന്ന് രണ്ടരവർഷത്തോളമായി പാർക്ക് അടഞ്ഞുകിടക്കുകയായിരുന്നു. ഡി.ടി.പി.സി.യുടെ നേതൃത്വത്തിലാണ് കാടുപിടിച്ചുകിടന്ന പാർക്ക് നവീകരിച്ചത്.

പാർക്കിലെ തുരുമ്പുപിടിച്ച കളിയുപകരണങ്ങൾ മാറ്റി പുതിയവ സ്ഥാപിച്ചു. മറ്റുള്ളവ നവീകരിക്കുകയും ചെയ്തു. പാർക്ക് ലാൻഡ്‌സ്‌കേപ്പ് ചെയ്ത് മനോഹരമാക്കിയിട്ടുണ്ട്. നടപ്പാത, ഇരിപ്പിടങ്ങൾ, അലങ്കാരവിളക്കുകൾ എന്നിവയും സ്ഥാപിച്ചിട്ടുണ്ട്. പാർക്കിലെ കഫ്റ്റീരിയയും കംഫർട്ട്‌സ്റ്റേഷനും നവീകരിച്ചിട്ടുണ്ട്.

അവസാനഘട്ട പ്രവർത്തനങ്ങൾ മാത്രമാണ് ബാക്കിയുള്ളത്. 90 ലക്ഷം രൂപയുടെ നവീകരണപ്രവൃത്തിക്കാണ് അനുമതി ലഭിച്ചത്.

അമ്മയും കുഞ്ഞും ശില്പം നവീകരിക്കും

പയ്യാമ്പലം പാർക്കിനകത്താണ് ശില്പി കാനായി കുഞ്ഞിരാമന്റെ അമ്മയും കുഞ്ഞും ശില്പവുമുള്ളത്. ഇത് സംരക്ഷണമില്ലാതെ നശിച്ച അവസ്ഥയിലാണ്. പാർക്ക് തുറന്നുകൊടുത്തതിനുശേഷം ശില്പിയുടെ സൗകര്യവുംകൂടി പരിഗണിച്ച് ഇത് നവീകരിക്കുമെന്ന് ഡി.ടി.പി.സി. സെക്രട്ടറി ജെ.കെ. ജിജേഷ് പറഞ്ഞു.

സാഹസിക വിനോദങ്ങൾക്കായി ഒരിടം

പാർക്കിനെയും ബീച്ചിനെയും ബന്ധിപ്പിക്കുന്ന സാഹസിക ടൂറിസം പദ്ധതിയും നടപ്പാക്കുന്നുണ്ട്. പാർക്കിന്റെ പടിഞ്ഞാറുഭാഗത്ത് ഇതിനായി സാഹസിക വിനോദത്തിനുള്ള ഉപകരണങ്ങൾ സ്ഥാപിക്കും. സ്വിപ്പ് ബൈക്ക്, റോപ്പ് സൈക്കിൾ, പാത്ത് വേ, വാലി ക്രോസിങ് എന്നിവയാണ് ഇവിടെ ഒരുക്കുന്നത്. 99 ലക്ഷം രൂപയാണ് ഇതിനായി അനുവദിച്ചത്. വാപ്‌കോസ് ലിമിറ്റഡിനാണ് നിർമാണച്ചുമതല.