തിരുവനന്തപുരം : പാഠ്യ പദ്ധതി പരിഷ്കരണത്തിന്റെ ഭാഗമായി മലയാളം അക്ഷരമാല വീണ്ടും പാഠപുസ്തകങ്ങളിൽ ഉൾപ്പെടുത്തുന്നത് കരിക്കുലം കമ്മിറ്റി പരിഗണിക്കുമെന്ന് മന്ത്രി വി.ശിവൻകുട്ടി അറിയിച്ചു. സർക്കാർ നിയോഗിച്ച വിദഗ്ധ സമിതി ഇക്കാര്യം ശുപാർശ ചെയ്തിരുന്നു. 

ലോക മാതൃഭാഷാ ദിനമായ 21ന് രാവിലെ 11ന് എല്ലാ വിദ്യാലയങ്ങളിലും ഭാഷാപ്രതിജ്ഞയെടുക്കണമെന്ന് മന്ത്രി നിർദേശിച്ചു. ഭാഷാപണ്ഡിതർ, എഴുത്തുകാർ, സാംസ്കാരിക നായകർ, ജനപ്രതിനിധികൾ തുടങ്ങിയവർ ചടങ്ങുകളിൽ പങ്കെടുക്കും. തിരുവനന്തപുരം പട്ടം ഗവ.ഗേൾസ് ഹൈസ്‌കൂളിലെ ചടങ്ങിൽ വിദ്യാഭ്യാസമന്ത്രി പങ്കെടുക്കും. ഭാഷ ഉന്നമനത്തിനായി വിവിധ പദ്ധതികൾ പൊതുവിദ്യാഭ്യാസ വകുപ്പ് നടപ്പാക്കുമെന്നും മന്ത്രി അറിയിച്ചു.

ഭാഷാപ്രതിജ്ഞ ഇങ്ങനെ

21ന് മാതൃഭാഷാ ദിനാചരണത്തിന്റെ ഭാഗമായി സ്കൂളുകളിൽ വിദ്യാർഥികളെടുക്കേണ്ട ഭാഷാപ്രതിജ്ഞ

മലയാളമാണ് എന്റെ ഭാഷ.

എന്റെ ഭാഷ എന്റെ വീടാണ്.

എന്റെ ആകാശമാണ്.

ഞാൻ കാണുന്ന നക്ഷത്രമാണ്.

എന്നെ തഴുകുന്ന കാറ്റാണ്.

എന്റെ ദാഹം ശമിപ്പിക്കുന്ന കുളിർവെള്ളമാണ്.

എന്റെ അമ്മയുടെ തലോടലും ശാസനയുമാണ്.

ഏതു നാട്ടിലെത്തിയാലും ഞാൻ സ്വപ്നം കാണുന്നത് 

എന്റെ ഭാഷയിലാണ്.

എന്റെ ഭാഷ ഞാൻ തന്നെയാണ്.