പേരാവൂർ: മണത്തണ സർവീസ് സഹകരണ ബാങ്ക് എഴുപതാം വാർഷികാഘോഷവും നിക്ഷേപ സമാഹരണവും കുടിശിക നിവാരണവും തിങ്കളാഴ്ച തുടങ്ങും. വാർഷികാഘോഷം ഡിസമ്പർ 31-നും നിക്ഷേപ സമാഹരണം മാർച്ച് 31-നും സമാപിക്കും.

മാർച്ച് 31-നകം തീർക്കുന്ന വായ്പാ കുടിശികക്ക് പലിശയിളവ് ലഭിക്കും. പ്ലാസ്റ്റിക് മുക്ത കണ്ണൂർ പ്രചരണത്തിന്റെ ഭാഗമായി തുണി-പേപ്പർ ബാഗ് നിർമാണ യൂണിറ്റ് ആരംഭിക്കും.

ബാങ്കിലെ മെമ്പർമാരിൽ അസുഖബാധിതരായവർക്ക് വേണ്ടി 5.75 ലക്ഷം രൂപ വിതരണം ചെയ്തിട്ടുണ്ടെന്നും വിദ്യാതരംഗിണി പദ്ധതിയിൽ 28 കുട്ടികൾക്ക് ഓൺലൈൻ പഠനത്തിന് പതിനായിരം രൂപ വീതം പലിശരഹിത വായ്പ നല്കിയിട്ടുണ്ടെന്നും ബാങ്ക് അധികൃതർ പറഞ്ഞു. കോവിഡ് പ്രതിരോധ പ്രവർത്തനങ്ങളുടെ ഭാഗമായി വിവിധ സ്‌കൂളുകളിൽ മാസ്‌കും സാനിറ്റൈസറും ബാങ്ക് നല്കിയിട്ടുണ്ട്.

‘എന്റെ നിക്ഷേപം എന്റെ വീട്ടിൽ’ പദ്ധതിയിലൂടെ എല്ലാ വീട്ടിലും ബാങ്ക് അക്കൗണ്ട് വാതിൽപ്പടി സൗകര്യം,സ്വർണപണയത്തിന് 8.5 ശതാമനം മാത്രം പലിശ,മൂന്ന് ലക്ഷംവരെ കാർഷിക വായ്പ,25 ലക്ഷം വരെ വ്യക്തിഗത വായ്പ,വാഹനവായ്പ,ബിസിനസ് ലോൺ,വിദ്യാർഥികൾക്ക് സ്റ്റുഡന്റ്‌സ് സേവിംഗ്‌സ് പദ്ധതി എന്നിവയും ബാങ്കിൽ ലഭ്യമാണ്.

1951-ൽ ഐക്യനാണയ സഹകരണ സംഘമായി രജിസ്ട്രർ ചെയ്ത ബാങ്കിന് നിലവിൽ വിവിധ കാറ്റഗറികളിലായി 17,500 ലധികം അംഗങ്ങളുണ്ട്. പത്രസമ്മേളനത്തിൽ ബാങ്ക് പ്രസിഡന്റ് കെ.കെ. ശ്രീജിത്ത്, വൈസ്.പ്രസിഡന്റ് കെ.സി.ഷംസുദ്ദീൻ, ഡയറക്ടർമാരായ സതി മുകുന്ദൻ, സി.വി. രാമചന്ദ്രൻ, സെക്രട്ടറി കെ.ഗൗരി എന്നിവർ സംബന്ധിച്ചു.