കണ്ണൂർ : നിരോധിച്ച പ്ലാസ്റ്റിക് ഉൽപന്നങ്ങളുടെ ഉൽപാദനം ജൂലൈ 1 മുതൽ പൂർണമായി തടയാൻ നടപടി. പരിസ്ഥിതിയെ പ്രതികൂലമായി ബാധിക്കുന്ന എല്ലാത്തരം പ്ലാസ്റ്റിക് ഉൽപന്നങ്ങളും ഉൽപാദിപ്പിക്കുന്നതിൽ നിരോധനം കർശനമാക്കുകയാണ് അധികൃതർ. നിരോധിത പ്ലാസ്റ്റിക് ഉൽപന്നങ്ങളുടെ ഉൽപാദനം, സംഭരണം, വിതരണം, ഉപയോഗം എന്നിവയിൽ ഏർപ്പെട്ടിരിക്കുന്നവർക്ക് കേന്ദ്ര മലിനീകരണ നിയന്ത്രണ ബോർഡ് നോട്ടിസ് അയച്ചിട്ടുണ്ട്.

ഒറ്റത്തവണ മാത്രം ഉപയോഗിക്കാൻ കഴിയുന്ന പ്ലാസ്റ്റിക് ഉൽപന്നങ്ങൾ പരിസ്ഥിതിയെ ദോഷകരമായി ബാധിക്കുമെന്നതിനാൽ ഇവ നിരോധിക്കാൻ 2021 ഓഗസ്റ്റിൽ കേന്ദ്ര പരിസ്ഥിതി മന്ത്രാലയം വിജ്ഞാപനം പുറപ്പെടുവിച്ചിരുന്നു. ഇതിന് പിന്നാലെയാണ് അത്തരം എല്ലാ വസ്തുക്കളുടെയും ഉൽപാദനം പൂർണമായും നിരോധിക്കാൻ നടപടി. 

ജൂലൈ 1 മുതൽ പ്ലാസ്റ്റിക് സ്റ്റിക് ഇയർബഡ്, ബലൂണിലെ പ്ലാസ്റ്റിക് സ്റ്റിക്, പ്ലാസ്റ്റിക് കൊടി, മിഠായി വടി, ഐസ്ക്രീം സ്റ്റിക്, അലങ്കാരത്തിനുപയോഗിക്കുന്ന തെർമോക്കോൾ എന്നിവയ്ക്ക് വരെ വിലക്കുണ്ട്. പ്ലാസ്റ്റിക് കപ്പുകൾ, പ്ലേറ്റുകൾ, ഗ്ലാസുകൾ, ഫോർക്കുകൾ, തവികൾ, കത്തികൾ, സ്‌ട്രോകൾ, ട്രേകൾ, മധുരപലഹാരങ്ങൾ പൊതിയാനുള്ള പ്ലാസ്റ്റിക്കുകൾ, പ്ലാസ്റ്റിക് ഇൻവിറ്റേഷൻ കാർഡുകൾ, 100 മൈക്രോണിൽ താഴെ കനമുള്ള പിവിസി ബാനറുകൾ തുടങ്ങിയവയും ഇതോടൊപ്പം ഉൽപാദനം ഒഴിവാക്കേണ്ട പട്ടികയിലുണ്ട്. നിർദേശം ലംഘിക്കുന്നവർക്കെതിരെ ഉൽപന്നങ്ങൾ പിടിച്ചെടുക്കൽ, പാരിസ്ഥിതിക നാശം വരുത്തിയെന്ന കാരണത്താൽ പിഴ ചുമത്തൽ, അവയുടെ ഉൽപാദനത്തിൽ ഏർപ്പെട്ടിരിക്കുന്ന സംരംഭങ്ങൾ അടച്ചുപൂട്ടൽ തുടങ്ങിയ കർശന നടപടികളുണ്ടാകും. 

ഒറ്റത്തവണ ഉപയോഗിക്കുന്ന പ്ലാസ്റ്റിക് എളുപ്പത്തിൽ നശിപ്പിക്കാനോ പുനരുപയോഗം ചെയ്യാനോ കഴിയില്ല. ഈ പ്ലാസ്റ്റിക്കിന്റെ നാനോ കണികകൾ ജലത്തെയും ഭൂമിയെയും ലയിപ്പിച്ച്‌ മലിനമാക്കുന്നു. അവ ജല ജീവികളെ ദോഷകരമായി ബാധിക്കുക മാത്രമല്ല, അഴുക്ക് ചാലുകളും ശ്വാസംമുട്ടലിന് കാരണമാവുകയും ചെയ്യും. 

നിർമാതാക്കൾ, സ്‌റ്റോക്കിസ്റ്റുകൾ, കടയുടമകൾ, ഇ-കൊമേഴ്‌സ് കമ്പനികൾ, തെരുവ് കച്ചവടക്കാർ, മാളുകൾ, മാർക്കറ്റുകൾ, ഷോപ്പിങ് സെന്ററുകൾ, സിനിമാ ഹാളുകൾ, ടൂറിസ്റ്റ് ലൊക്കേഷനുകൾ, സ്‌കൂളുകൾ, കോളേജുകൾ, ഓഫിസ് കോംപ്ലക്സുകൾ, ആശുപത്രികൾ, സ്ഥാപനങ്ങൾ, പൊതുജനം എന്നിവരോട് ഒറ്റത്തവണ ഉപയോഗിക്കുന്ന പ്ലാസ്റ്റിക് വസ്തുക്കൾക്കു നിരോധനം ഏർപ്പെടുത്തുകയാണെന്ന മുന്നറിയിപ്പ് നൽകും. ഇത്തരം ഉൽപന്നങ്ങളുടെ സ്റ്റോക്ക് ജൂൺ 30നകം തീർന്നു എന്ന് ഉറപ്പാക്കും.