കോഴിക്കോട് : കോർപറേഷൻ പരിധിയിലെ തട്ടുകടകളിൽ ഉപ്പിലിട്ട പഴം, പച്ചക്കറി എന്നിവയുടെ വിൽപന നിരോധിച്ചു. തട്ടുകടയിൽ നിന്ന് വെള്ളമെന്നു കരുതി രാസദ്രാവകം കുടിച്ച കുട്ടികൾക്ക് പൊള്ളലേറ്റതിനെ തുടർന്ന് നടത്തിയ പരിശോധനയിൽ ഇവ ആരോഗ്യത്തിന് ഹാനികരമാണെന്ന് കണ്ടെത്തിയതിനാലാണ് നടപടി.  53 കച്ചവട സ്ഥാപനങ്ങളിലാണ് കോർപറേഷൻ ആരോഗ്യ വിഭാഗവും ഭക്ഷ്യസുരക്ഷാ വകുപ്പും പരിശോധന നടത്തിയത്. ശുചിത്വ മാനദണ്ഡങ്ങളും ഭക്ഷ്യ സുരക്ഷാ മാനദണ്ഡങ്ങളും പാലിക്കാതെയും നഗരസഭ ലൈസൻസ് വ്യവസ്ഥകൾക്ക് വിരുദ്ധമായും കച്ചവടം നടത്തിയ 12 കടകൾ താൽക്കാലികമായി അടപ്പിച്ചു. 8 കടകൾക്ക് നോട്ടിസ് നൽകി. 17 കടകളിൽ നിന്ന് മാനദണ്ഡങ്ങൾ പാലിക്കാതെ സൂക്ഷിച്ച 35 ലീറ്റർ ഗ്ലേഷ്യൽ അസറ്റിക് ആസിഡ് പിടിച്ചെടുത്ത് നശിപ്പിച്ചു. കടകളിൽ നിന്ന് ശേഖരിച്ച 18 സാംപിളുകളിൽ ആസിഡിന്റെ സാന്നിധ്യം പരിശോധിച്ചിട്ടുണ്ട്. വരുംദിവസങ്ങളിലും പരിശോധന തുടരും. 

കോർപറേഷൻ ഹെൽത്ത് ഓഫിസർ ഡോ. മിലു മോഹൻദാസിന്റെ നേതൃത്വത്തിൽ ഹെൽത്ത് സൂപ്പർവൈസർ പി. ഷജിൽ കുമാർ, ഹെൽത്ത് ഇൻസ്പെക്ടർ മേഘനാഥൻ, ജൂനിയർ ഹെൽത്ത് ഇൻസ്പെക്ടർമാരായ കെ. മനൂജ്, ഇ.പി. ശൈലേഷ്, പി.എസ്. ഡൈസൺ എന്നിവരുടെയും ഭക്ഷ്യസുരക്ഷാ വിഭാഗം അസിസ്റ്റൻറ് ഫുഡ് സേഫ്റ്റി കമ്മിഷണർ കെ. അനിലന്റെയും നേതൃത്വത്തിലാണ് പരിശോധന നടത്തിയത്.