കൊല്ലം : വീട്ടമ്മയുടെ ബാങ്ക് അക്കൗണ്ടിൽനിന്ന് മൊബൈൽ ബാങ്കിങ് വഴി 8 ലക്ഷത്തിലധികം തട്ടിയ സംഘത്തിനെ കൊല്ലം സിറ്റി സൈബർ ക്രൈം പൊലീസ് പിടികൂടി. എറണാകുളം കരിമല്ലൂർ തടിക്കകടവ് ജുമാ മസ്ജിദിന് സമീപം വെളിയത്ത് നാട് വെസ്റ്റ്  കുട്ടുങ്ങപറമ്പിൽ ഹൗസിൽ  ഇബ്രാഹിം (34),  മൂവാറ്റുപുഴ മുളവൂർ വി.എം വട്ടക്കാട്ട് കുടിയിൽ ഹൗസിൽ മൊയ്തീൻ ഷാ (32),   പെരുമ്പാവൂർ റയോൺപുരം കാഞ്ഞിരക്കാട് പുതുക്കാടൻ വീട്ടിൽ  ഷാമോൻ (31) എന്നിവരാണ് പിടിയിലായത്. ഇതിൽ  ഇബ്രാഹിം ഒട്ടേറെ ക്രിമിനൽ കേസുകളിൽ പ്രതിയാണ്.  കോടതിയിൽ ഹാജരാക്കി റിമാൻഡ് ചെയ്തു. 

കൊല്ലം തിരുമുല്ലവാരം സ്വദേശിനിയുടെ അക്കൗണ്ടിൽ നിന്നാണ് പണം തട്ടിയെടുത്തത്. ബാങ്കിൽ അക്കൗണ്ട് തുറന്ന കാലയളവിൽ ഇവർ നൽകിയ മൊബൈൽ നമ്പർ ഉപയോഗിച്ചാണ് തട്ടിപ്പ് നടത്തിയത്. ദീർഘകാലം മൊബൈൽ നമ്പർ ഉപയോഗിക്കാതിരുന്നതിനെ തുടർന്ന് സർവീസ് പ്രൊവൈഡർ ഇവരുടെ സിം മരവിപ്പിച്ചിരുന്നു. തുടർന്ന് കാലാവധി കഴിഞ്ഞ ഈ സിം കാർഡ് എറണാകുളം പെരുമ്പാവൂരിൽ വിതരണം ചെയ്തു. ഇത് ലഭിച്ച സംഘമാണ് തട്ടിപ്പ് നടത്തിയത്.  

ബാങ്കിൽ റജിസ്റ്റർ ചെയ്തിരുന്ന  സിം കാർഡിലേക്ക് വന്ന മെസേജുകൾ ഉപയോഗിച്ച് ഇവർ മൊബൈൽ ബാങ്കിങ് ഇടപാടിലേക്ക് കടന്നുകയറുന്നതിനുളള വിവരങ്ങൾ കരസ്ഥമാക്കി.  പണം മറ്റ് അക്കൗണ്ടുകളിലേക്ക് മാറ്റി  തട്ടിയെടുക്കുകയായിരുന്നു.  വീട്ടമ്മയുടെ പരാതിയിൽ കൊല്ലം സിറ്റി സൈബർ ക്രൈം പൊലീസ് സ്റ്റേഷനിൽ റജിസ്റ്റർ ചെയ്ത കേസിലാണ് അറസ്റ്റ്. ആലുവയിൽ നിന്ന് ആലുവ വെസ്റ്റ് പൊലീസിന്റെ സഹായത്തോടെയാണ് പിടികൂടിയത്. പിടികൂടുന്ന സമയം ഇവരുടെ പക്കൽനിന്ന്   കഞ്ചാവ് കണ്ടെടുത്തിരുന്നു. ഈ സംഭവത്തിന് ആലുവ വെസ്റ്റ് പൊലീസ് സ്റ്റേഷനിൽ ഇവർക്ക് എതിരെ കേസ് എടുത്തിട്ടുണ്ട്.  

നൂതന മാർഗത്തിലൂടെ പണം നഷ്ടപ്പെട്ടത് ശ്രദ്ധയിൽപ്പെട്ട ജില്ലാ  പൊലീസ് മേധാവി ടി. നാരായണൻ പ്രത്യേക അന്വേഷണ സംഘത്തെ  നിയോഗിക്കുകയായിരുന്നു. കൊല്ലം സിറ്റി സി-ബ്രാഞ്ച് അസിസ്റ്റന്റ് കമ്മിഷണർ സോണി ഉമ്മൻ കോശിയുടെ നേതൃത്വത്തിൽ സൈബർ ക്രൈം പൊലീസ് സ്റ്റേഷൻ ഇൻസ്പെക്ടർ എച്ച്. മുഹമ്മദ്ഖാൻ, എസ്.ഐ.മാരായ അബ്ദുൽ മനാഫ്, അജിത്കുമാർ, എ.എസ്.ഐ. നിയാസ്, സി.പി.ഒ അനീഷ് എന്നിവരടങ്ങിയ സംഘമാണു പ്രതികളെ പിടികൂടിയത്. ബാങ്ക് അക്കൗണ്ടുകളുമായി ബന്ധിപ്പിച്ചിരിക്കുന്ന  മൊബൈൽ നമ്പറുകൾ നഷ്ടപ്പെടുമ്പോൾ ആ വിവരം ബാങ്കുകളെ അറിയിക്കാതിരിക്കുന്നതാണ് ഇത്തരത്തിൽ തട്ടിപ്പുകൾ നടക്കാൻ ഇടയായതെന്ന് സിറ്റി പൊലീസ് കമ്മിഷണർ‌ പറഞ്ഞു.