ഇരിട്ടി : ജൈവരീതിയിൽ മാത്രം കൃഷിചെയ്താലും വിളവ് നൂറുമേനിയാകുമെന്ന് നടുവനാട് കാളന്തോട്ടെ എൻ.ദിവാകരൻ. ചെറിയുള്ളി മുതൽ തണ്ണീർമത്തൻ വരെ എല്ലാം ലാഭകരം. പച്ചക്കറിച്ചന്തയിൽ കിട്ടുന്നതെന്തും ദിവാകരന്റെ തോട്ടത്തിലുമുണ്ട്.

10 വർഷമായി തുടരുന്ന കൃഷിയിൽ നഷ്ടം എന്ന വാക്ക് ഇതുവരെ പറയേണ്ടതായി വന്നിട്ടില്ലെന്ന് ദിവാകരൻ പറഞ്ഞു. ഇരിട്ടിയിൽ ഇക്കോഷോപ്പ് നടത്തുന്ന ദിവാകരൻ സ്വന്തം കൈകൊണ്ട് നട്ടുവളർത്തിയ പച്ചക്കറികളാണ് ഇതിലൂടെ വിൽപ്പന നടത്തുന്നത്. സ്വന്തം കൃഷിയിടം ഇല്ലാത്തതിനാൽ വീട്ടിനടുത്ത് തരിശിട്ട ഒരേക്കർ പാടം പാട്ടത്തിനെടുത്താണ് കൃഷിചെയ്യുന്നത്. 

സാധാരണ കൃഷിചെയ്യുന്ന പച്ചക്കറികളായ പച്ചമുളക്, വെള്ളരി, മത്തൻ, ഇളവൻ, പയർ, കക്കിരി, പാവയ്ക്ക, വഴുതിന, ചീര എന്നിവയ്ക്ക് പുറമെ, ബീൻസ്, നിലക്കടല, മുള്ളങ്കി, കോളിഫ്ളവർ, കാരറ്റ്, ബീറ്റ്‌റൂട്ട്, കാബേജ്, ചോളം എന്നിവയും നന്നായി വളരുന്നു. ഒരുകിലോഗ്രാം ചെറിയുള്ളി വിത്തിൽനിന്ന് 12 കിലോഗ്രാം വരെ ഉള്ളി കിട്ടിയിരുന്നതായി ദിവാകരൻ പറഞ്ഞു. കൃത്യമായ പരിചരണവും വളപ്രയോഗവും നടത്തിയാൽ ചെറിയുള്ളി മറ്റ് സംസ്ഥാനങ്ങളിലുള്ളതിനേക്കാൾ ലാഭകരമായി ഉത്പാദിപ്പിക്കാൻ കഴിയുമെന്നാണ് ദിവാകരന്റെ അനുഭവസാക്ഷ്യം.

കൃഷിവകുപ്പിന്റെ സഹായവും നിർദേശങ്ങളുമുണ്ട്. ഇക്കോഷോപ്പിലൂടെ വിളകളും വിത്തും വിതരണം ചെയ്യാൻ കഴിയുന്നതിനാൽ വിപണി അന്വേഷിച്ചുപോകേണ്ടിവരുന്നില്ല. ആത്മയുടെ ജില്ലയിലെ മികച്ച ജൈവകർഷകനായി തിരഞ്ഞെടുക്കപ്പെട്ടിരുന്നു. കർഷകർക്ക് ക്ലാസും നൽകുന്നുണ്ട്.

ഹരിത കഷായം, മീനെണ്ണ കക്ഷായം എന്നിവയാണ് ഉപയോഗിക്കുന്നത്. കാട്ടുപന്നിയെ തുരത്തുന്നതിനായി ചകിരിച്ചോറിൽ ഫിനോയിൽ ഒഴിച്ച് തുണിയിൽ ചെറിയ കെട്ടുകളാക്കി കൃഷിയിടത്തിൽ തൂക്കിയിടുന്നു. ഫിനോയിലിന്റെ മണം കാരണം പന്നി കൃഷിയിടത്തിൽ ഇറങ്ങില്ലെന്ന് ദിവാകരൻ പറഞ്ഞു. പന്നിയെയും മയിലിനെയും കൃഷിയിടത്തിൽനിന്ന്‌ അകറ്റുന്നതിന് ചില പ്രത്യേക സൂത്രപണികളും നടത്തുണ്ട്. കൃഷിയിടത്തിലേക്ക് മയിൽ എത്താതിരിക്കാൻ റിഫ്ളക്ടീവ്‌ റിബൺ കൃഷിയിടത്തിന് കുറുകെ വലിച്ചുകെട്ടിയിരിക്കുകയാണ്. റിഫ്ളക്ടീവ്‌ റിബണിലേക്ക് നോക്കുമ്പോൾ മയിലിന്റെ കണ്ണ് അസ്ഥസ്ഥമാകുന്നതിനാൽ ഇവ കൃഷിയിടത്തിൽ ഇറങ്ങാതെ പറന്നുപോകുന്നു.