ഇരിട്ടി: ആറളം വന്യജീവിസങ്കേതത്തെ പുനരധിവാസ മേഖലയുമായി വേർതിരിക്കുന്ന വനാതിർത്തിയിൽ സ്ഥാപിച്ച ആനമതിലിന്റെ തകർന്ന ഭാഗം പുനർനിർമിക്കുന്ന പ്രവൃത്തി ആരംഭിച്ചു. കാട്ടാന ജനവാസമേഖലയിലേക്കും ആറളം ഫാമിലേക്കും പ്രവേശിക്കുന്നത് മതിൽ തകർത്ത ഭാഗത്തുകൂടിയാണ്. വളയംചാൽമുതൽ കോട്ടപ്പറവരെയുള്ള മതിലിന്റെ ഭാഗങ്ങളിൽ ആറിടങ്ങളിലായി 100 മീറ്ററോളം ഭാഗമാണ് കാട്ടാന തകർത്തത്. മതിൽ തകർന്നിട്ട് കുറെ മാസങ്ങളായെങ്കിലും പുനർനിർമിച്ചിരുന്നില്ല.

കഴിഞ്ഞ ദിവസം ചെത്ത് തൊഴിലാളിയെ കാട്ടാന കുത്തിക്കൊന്നതോടെ വനംവകുപ്പിന്റെ അനാസ്ഥയ്ക്കെതിരേ പ്രതിഷേധം ശക്തമാവുകയും തകർന്ന മതിൽ പുനർനിർമിക്കാത്തത് വിമർശനങ്ങൾക്ക് ഇടയാക്കുകയും ചെയ്തിരുന്നു. മതിലിന്റെ പുനർനിർമാണത്തിന് അഞ്ചുലക്ഷം രൂപയാണ് വനംവകുപ്പ് അനുവദിച്ചിരിക്കുന്നത്.

നിലവിലുള്ള ആനമതിൽ ഫലപ്രദമല്ലാത്തതിനാൽ വളയംചാൽമുതൽ പൊട്ടിച്ചിപ്പാറ 10.5 കിലോമീറ്റർ പൊക്കം കൂട്ടിയുള്ള ആനമതിൽ ഉൾപ്പെടെയുള്ള പ്രതിരോധമാർഗങ്ങൾ ഉണ്ടാക്കാൻ 22 കോടി രൂപ രണ്ടുവർഷം മുൻപ്‌ സർക്കാർ അനുവദിച്ചിരുന്നു. എന്നാൽ ഇക്കാര്യത്തിൽ ഇതുവരെ വ്യക്തതയുണ്ടാക്കാൻ കഴിഞ്ഞിട്ടില്ല. ആനമതിലിന് പകരം മറ്റ് പ്രതിരോധമാർഗങ്ങളെക്കുറിച്ചും വനംവകുപ്പിൽനിന്ന്‌ അഭിപ്രായം ഉയർന്നതോടെയാണ് തീരുമാനം നീണ്ടുപോകുന്നത്.

കഴിഞ്ഞദിവസം മേഖലയിലെ വന്യമൃഗശല്യം പരിഹരിക്കുന്നതിന് മൂന്ന് മന്ത്രിമാർ ഉൾപ്പെട്ട സംഘം ഫാമിൽ ജനപ്രതിനിധികളുമായും മറ്റും നടത്തിയ ചർച്ചയിൽ ആനമതിൽതന്നെ മതിയെന്ന് ബന്ധപ്പെട്ടവരെ അറിയിക്കാൻ തീരുമാനിച്ചിരുന്നു. കാട്ടാന പ്രതിരോധ കാര്യത്തിൽ ഹൈക്കോടതിയിൽ നിലനില്ക്കുന്ന കേസിൽ ആനമതിലിന് അനുകൂലമായി റിപ്പോർട്ട് നൽകാനും നിർദേശിച്ചിരുന്നു. പുതിയ മതിൽ സ്ഥാപിക്കുന്നതുവരെ നിലവിലുള്ള മതിൽ പൊളിഞ്ഞ ഇടങ്ങളിൽ പുനഃസ്ഥാപിക്കാനും വനംവകുപ്പിന് നിർദേശം നൽകിയിരുന്നു. മന്ത്രിതല സംഘത്തിന്റെ പരിശോധനയുടെ ഭാഗമായാണ് തകർന്ന മതിൽ പുനഃസ്ഥാപിക്കാനുള്ള നടപടികൾ വേഗത്തിലായത്. 

ആറളം വന്യജീവി സങ്കേതത്തിനുള്ളിൽ നിന്ന്‌ മതിൽ തകർന്ന ഭാഗത്തുകൂടി ആറളം ഫാമിലും പുനരധിവാസ മേഖലയിലുമായി എത്തിയ ആനക്കൂട്ടങ്ങളിൽ കുറെയെണ്ണത്തെ കഴിഞ്ഞ ദിവസങ്ങളിൽ വനത്തിലേക്ക് തുരത്തിയിരുന്നു. എന്നാൽ ഇവയിൽ ഭൂരിഭാഗവും തിരികെ ഫാമിനുള്ളിലേക്ക് തന്നെ പ്രവേശിച്ചതായും സംശയിക്കുന്നു. കഴിഞ്ഞ ദിവസം പുനരധിവാസ മേഖലയിൽ വയനാട്ടിൽനിന്നുള്ള കുടുംബങ്ങൾക്ക് പതിച്ചുനൽകിയ മേഖലയിൽ പത്തോളം ആനകളെ കണ്ടെന്നാണ് പ്രദേശവാസികൾ പറയുന്നത്.