മാടായി: മാതമംഗലത്തിന് പിന്നാലെ മാടായിയിലും വ്യാപാരസ്ഥാപനത്തിന് മുന്നിൽ സി.ഐ.ടി.യു. ഉപരോധസമരം തുടങ്ങി. മാടായിയിലെ ശ്രീപോർക്കലി സ്റ്റീൽസിന് മുന്നിൽ യൂണിയൻ നടത്തുന്ന സമരം എട്ടാംദിവസത്തേക്ക് കടന്നു. ജനുവരി 23-നാണ് സ്ഥാപനം തുറന്നത്. ടി.വി. മോഹൻലാലാണ് ഉടമ. മേൽക്കൂരയ്ക്കുള്ള ഷീറ്റ്, ഇരുമ്പുപൈപ്പ് ഉൾപ്പെടെയുള്ള സാമഗ്രികളാണ് ഇവിടെയുള്ളത്. സ്ഥാപനത്തിലെത്തുന്ന ലോഡിറക്കാൻ സി.ഐ.ടി.യു. തൊഴിലാളികളെ അനുവദിക്കാത്തതാണ് സമരത്തിന് കാരണമായത്.

തൊഴിൽ നിഷേധിക്കുന്ന നിലപാടാണ് സ്ഥാപന ഉടമ സ്വീകരിക്കുന്നതെന്നും ഇതര സംസ്ഥാനക്കാരെയും മറ്റുമുപയോഗിച്ചാണ് ലോഡിറക്കുന്നതെന്നും തൊഴിലാളികൾ പറയുന്നു. ഈ സാഹചര്യത്തിലാണ് സമരം തുടങ്ങിയതെന്ന് സി.ഐ.ടി.യു. നേതാവ് ഇ.എം. ഏലിയാസ് പറഞ്ഞു. അബൂബക്കർ സിദ്ദിഖ്, കെ.എൻ. സിദ്ദിഖ്, ടി.വി. അശ്രഫ് എന്നിവരാണ് സമരത്തിന് നേതൃത്വം നൽകുന്നത്.

എന്നാൽ അനാവശ്യമായ സമരമാണ് സ്ഥാപനത്തിനുമുന്നിൽ നടക്കുന്നതെന്ന് ഉടമ ടി.വി.മോഹൻലാൽ പറയുന്നു. കണ്ണൂർ, കാസർകോട് ജില്ലകളിൽ വിവിധ സ്ഥലങ്ങളിൽ സ്ഥാപനങ്ങളുണ്ട്. വായ്പയെടുത്തും മറ്റുമാണ് തുടങ്ങിയത്. മറ്റിടങ്ങളിലെ സ്ഥാപനങ്ങളിൽ തൊഴിലാളി സംഘടനകളുടെ അമിതമായ ഇടപെടൽ ബിസിനസിനെ ബാധിക്കുന്നുണ്ട്. രാവിലെ എട്ടുമുതൽ വൈകുന്നേരം ആറുവരെയേ ഇവരുടെ സേവനം ലഭിക്കൂ. രാത്രിയിലെത്തുന്ന ലോഡിറക്കാൻ രാവിലെ വരെ കാത്തിരിക്കണം. ഇത് സാമ്പത്തിക ബാധ്യതയുണ്ടാക്കുന്നുണ്ട്- അദ്ദഹം പറഞ്ഞു.

വ്യാപാരം നടത്താൻ പറ്റാത്ത സാഹചര്യത്തിൽ സംരക്ഷണമാവശ്യപ്പെട്ട് ഹൈക്കോടതിയിൽ ഹർജി നൽകിയിട്ടുണ്ട്. അനുകൂലവിധി ലഭിച്ചാൽ പോലീസ് എന്ത് നടപടിയെടുക്കുമെന്ന് നോക്കിയശേഷം കട പൂട്ടണമോ വേണ്ടയോ എന്ന് തീരുമാനിക്കും. മൂന്നാഴ്ചയായി കച്ചവടമൊന്നും നടക്കുന്നില്ല. 60 ലക്ഷം രൂപയുടെ സാധനങ്ങൾ ഇവിടെയുണ്ട്. പോലീസിൽ പരാതി നൽകിയതിനെത്തുടർന്ന് സി.ഐ.ടി.യു. നേതാക്കളുമായി ചർച്ചനടത്തിയെങ്കിലും പ്രശ്നത്തിന് പരിഹാരമായില്ലെന്നും അദ്ദേഹം പറഞ്ഞു.