പേരാവൂർ: താലൂക്കാസ്പത്രിയുടെ മാസ്റ്റർ പ്ലാൻ സ്റ്റേ ഒഴിവാക്കി കിട്ടുന്നതിന് ഹൈക്കോടതിയിലുള്ള കേസിൽ കക്ഷി ചേരാൻ ആസ്പത്രി സംരക്ഷണ സമിതി തീരുമാനിച്ചു. ആറ് മാസമായിട്ടും മാസ്റ്റർ പ്ലാൻ സ്റ്റേ ഒഴിവാക്കി കിട്ടുന്നതിന് കേസിലെ എതിർ കക്ഷികളായ ഗവ. ഉദ്യോഗസ്ഥർ കാര്യക്ഷമമായി ഇടപെടുന്നില്ലെന്ന് സംരക്ഷണ സമിതി ആരോപിച്ചു.

2021 ജൂലായ് 14-നാണ് ലത രവീന്ദ്രൻ, ഡോ.എ.സദാനന്ദൻ എന്നിവർ പേരാവൂർ താലൂക്കാസ്പത്രി വികസനവുമായി ബന്ധപ്പെട്ട മാസ്റ്റർ പ്ലാൻ പ്രാവർത്തികമായാൽ തങ്ങളുടെ വഴി തടസ്സപ്പെടുമെന്ന് കാണിച്ച് ഹൈക്കോടതിയെ സമീപിച്ചത്. സംസ്ഥാന ആരോഗ്യ വകുപ്പ് സെക്രട്ടറി, സംസ്ഥാന ആരോഗ്യ വകുപ്പ് ഡയറക്ടർ, കണ്ണൂർ ജില്ലാ മെഡിക്കൽ ഓഫീസർ, പേരാവൂർ താലൂക്കാസ്പത്രി സൂപ്രണ്ട്, പേരാവൂർ ബ്ലോക്ക് പഞ്ചായത്ത് സെക്രട്ടറി, പേരാവൂർ ഗ്രാമപ്പഞ്ചായത്ത് സെക്രട്ടറി എന്നിവരെ എതിർ കക്ഷികളാക്കിയാണ് ഹർജി നല്കിയത്.

കേസ് ഫയലിൽ സ്വീകരിച്ച കോടതി എതിർ കക്ഷികൾക്ക് നോട്ടീസ് നല്കാനും പരാതിക്കാരുടെ വഴി തടസ്സപ്പെടുത്താതിരിക്കാനും ഒരു മാസത്തേക്ക് ഇടക്കാല സ്റ്റേ അനുവദിച്ചു.

2021 ആഗസ്ത് 24 ന് കേസ് വീണ്ടും പരിഗണിച്ചെങ്കിലും എതിർ സത്യവാങ്ങ്മൂലം സമർപ്പിക്കാൻ മൂന്നാഴ്ച സമയം വേണമെന്ന പഞ്ചായത്ത് സെക്രട്ടറിയുടെ അപേക്ഷയിന്മേൽ സ്റ്റേ ഒരു മാസത്തേക്ക് കൂടി നീട്ടി നല്കി.

2021 നവമ്പർ രണ്ടിന് കേസ് പരിഗണിച്ചെങ്കിലും ആവശ്യമായ രേഖകൾ സമർപ്പിക്കാത്തതിനാൽ സ്റ്റേ വീണ്ടും മൂന്ന് മാസത്തേക്ക് കൂടി നീട്ടി നല്കുകയായിരുന്നു.

ആസ്പത്രിയുടെ പ്രധാന ഗേറ്റ് വഴി വർഷങ്ങളായി തങ്ങൾ ഉപയോഗിക്കുന്ന വഴി തടസ്സപ്പെടുത്തരുതെന്നാണ് ഹർജിക്കാരുടെ ആവശ്യം.എന്നാൽ താലൂക്കാസ്പത്രിയുടെ മാസ്റ്റർ പ്ലാൻ അനുസരിച്ച് ബഹുനില കെട്ടിട സമുച്ചയം നിർമിക്കുന്ന സ്ഥലത്ത് കൂടി പൊതുവഴി ഇല്ലെന്നാണ് ആസ്പത്രി അധികൃതർ പറയുന്നത്. ആസ്പത്രി ഭൂമിയിലൂടെ പൊതുവഴി ഉണ്ടെന്നും ഇല്ലെന്നുമുള്ള പേരാവൂർ പഞ്ചായത്ത് സെക്രട്ടറിയുടെ വിചിത്ര ഉത്തരവുകൾ വിവാദമാവുകയും ചെയ്തിരുന്നു. നിർമാണം വൈകിയതോടെ ആസ്പത്രിയുടെ നിർമാണ ടെണ്ടർ സർക്കാർ റദ്ദാക്കുകയും റീ ടെണ്ടർ വിളിക്കുകയും ചെയ്തിട്ടുണ്ട്.

കാര്യങ്ങൾ ഇത്രയും വഷളായിട്ടും ആസ്പത്രിയുടെ ഭരണ ചുമതലയുള്ള സി.പി.എം നിയന്ത്രിക്കുന്ന പേരാവൂർ ബ്ലോക്ക് പഞ്ചായത്തും എല്ലാ രാഷ്ട്രീയ പാർട്ടി പ്രതിനിധികളുമടങ്ങുന്ന ആസ്പത്രി മാനേജ്മെൻറ് കമ്മിറ്റിയും തികഞ്ഞ അലംഭാവമാണ് തുടരുന്നത്. ഈയൊരു സാഹചര്യത്തിലാണ് ബഹുജന പിന്തുണയോടെ ആസ്പത്രി സംരക്ഷണ സമിതി പ്രത്യക്ഷ സമരത്തിനൊരുങ്ങുന്നlത്.