പാനൂർ: തുടർച്ചയായ നാലാംതവണയും സൈനികരെ കളരി പരിശീലിപ്പിക്കുകയാണ് ചമ്പാട് സ്വദേശി കൂടത്തിൽ വത്സൻ ഗുരുക്കൾ. ‍ഡൽഹിക്കടുത്ത റാണാപ്രതാപ് റിക്രൂട്ട് ട്രെയിനിങ് സെന്ററിലാണ് പരിശീലനം.

2017-ൽ രാജസ്ഥാനിലെ കോട്ടയിൽ സെൻട്രൽ ഇൻഡസ്ട്രിയൽ സെക്യൂരിറ്റി ഫോഴ്സ് (സി.ഐ.എസ്.എഫ്.) സംഘത്തിന് പരിശീലനം നൽകിയാണ് തുടക്കം. 2018-ലും ഇതേസ്ഥലത്ത്‌ തന്നെയായിരുന്നു. 2019-ൽ തെലങ്കാനയിലും. ഫെബ്രുവരി 1 മുതലാണ് ഡൽഹി, രാജസ്ഥാൻ, ഹരിയാണ എന്നിവയുടെ അതിർത്തിപ്രദേശമായ ബറോറിൽ പരിശീലനം തുടങ്ങിയത്. 200 പേരാണ് കളരിയിലുള്ളത്. വിവിധ സംസ്ഥാനങ്ങളിൽനിന്ന് തിരഞ്ഞെടുക്കപ്പെട്ടവരാണിവർ. മലയാളികൾ 10 പേരുണ്ട്. വാൾപ്പയറ്റ്, ചൂരൽപയറ്റ്, ഉറുമിപ്പയറ്റ് തുടങ്ങി വിവിധ ഇനങ്ങളിലാണ് പരിശീലനം നൽകുന്നത്.

18-ാം വയസ്സിൽ പാട്യത്തെ കളരിയിലാണ് തുടക്കം. വാച്ചാലി ശ്രീജയൻ ഗുരുക്കളാണ് ആദ്യ ഗുരു. 1985-ൽ ചമ്പാട് കേരള കളരി സംഘം തുടങ്ങിയതോടെ അവിടേക്ക് മാറി. 1993-ൽ ചമ്പാട്ടെ കളരി പരിശീനത്തിന്റെ ചുമതല ശ്രീജയൻ ഗുരുക്കൾ വത്സനെ ഏല്പിച്ചു. 2018 ഒക്ടോബർ 18-ന് കേരള കളരിസംഘം പുഞ്ചക്കര എന്ന പേരിൽ സ്വന്തമായി തുടങ്ങിയ കളരിയിലാണ് ഇപ്പോൾ പരിശീലനം നൽകുന്നത്. 2019-ൽ കേരള സർക്കാരിന്റെ അതിഥിയായി സ്വിറ്റ്സർലൻഡ് എം.പി. നിക്കോളാസ് സാമുവൽ ഗുഗറും ഭാര്യയും മക്കളും പുഞ്ചക്കരയിലെ കളരി സന്ദർശിച്ചിരുന്നു.

1990 മുതൽ സീനിയർ വിഭാഗത്തിൽ കേരള കളരിസംഘത്തിലെ പഠിതാക്കൾ ജില്ലാതലത്തിൽ നിരവധി പുരസ്കാരങ്ങൾ നേടിയിരുന്നു. 2016-ൽ കണ്ണൂരിൽ ഇന്ത്യൻ മാർഷൽ ആർട്സിന്റെ കളരിപരിശീലകനായി. കളരിവിഭാഗം ജില്ലാ കോ ഓർഡിനേറ്റർ കൂടിയാണ്. ഇക്കാലയളവിൽ പരിചയപ്പെട്ട സി.ഐ.എസ്.എഫ്. ഉദ്യോഗസ്ഥനായ പാറപ്രം സ്വദേശി സുഹാസുമായുള്ള സൗഹൃദമാണ് വത്സൻ ഗുരുക്കളെ പട്ടാളക്കളരിയിലെത്തിച്ചത്.

ഇന്ത്യൻ കളരിപ്പയറ്റ് ഫെഡറേഷൻ വിധികർത്താക്കളിലൊരാളും കേരള കളരിപ്പയറ്റ് അസോസിയേഷൻ ജില്ലാ നിർവാഹകസമിതി അംഗവുമാണ്. വത്സൻ ഗുരുക്കളുടെ മക്കളായ വിഷ്ണുവും ജിഷ്ണുവും അച്ഛന്റെ പാതയിൽത്തന്നെയാണ്.