ഇരിട്ടി: തൊഴിലുറപ്പ് പ്രവൃത്തിക്കിടെ കടന്നൽക്കുത്തേറ്റ് ഒൻപതുപേർക്ക് പരിക്കേറ്റു. പായം ഏച്ചിലത്താണ്‌ കടന്നൽക്കുത്തേറ്റത്. രക്ഷാപ്രവർത്തനത്തിൽ ഏർപ്പെട്ടവരെയും ഇരുചക്രവാഹനയാത്രക്കാരനെയും കടന്നൽ ആക്രമിച്ചു. ഇരിട്ടി അഗ്നി രക്ഷാസേനയും നാട്ടുകാരും ചേർന്ന് പരിക്കേറ്റവരെ ഇരിട്ടിയിലെ ആശുപത്രിയിലെത്തിച്ചു. കമലാക്ഷി, പായം കോണ്ടബ്ര സ്വദേശികളായ ജയന്തി, രോഹിണി, ധന്യ, സരസ്വതി, വിജയൻ, ബിന്ദു എന്നിവർക്കാണ് പരിക്കേറ്റത്.

തൊഴിലുറപ്പ് പണിക്കിടെ കാടുവെട്ടി തെളിക്കുന്നതിനിടയിലാണ് കടന്നൽകുത്തേറ്റത്. ആദ്യം കടന്നൽ അക്രമിച്ച കമലാക്ഷി ഓടി സമീപത്തുള്ള തോട്ടിൽ ചാടി. ഇവരെ രക്ഷപ്പെടുത്താൻ ശ്രമിക്കുന്നതിനിടയിലാണ് ബാക്കിയുള്ളവർക്കും കുത്തേൽക്കുന്നത്.

വിവരമറിഞ്ഞ് എത്തിയ നാട്ടുകാർക്കും കടന്നൽ കുത്തേറ്റു. എരുമത്തടത്തെ ഗോഡൗണിലെ തൊഴിലാളിയായ മനോജിനാണ് രക്ഷപ്പെടുത്തുന്നതിനിടയൽ കുത്തേറ്റത്. ഇതു വഴി ഇരുചക്രവാഹനത്തിൽ പോവുകയായിരുന്ന ഏച്ചിലം സ്വദേശി കരുണാകരനും പരിക്കേറ്റു. പരിക്കേറ്റവരെ ഇരിട്ടി താലൂക്ക് ആസ്പത്രിയിലും കാരുണ്യ ആശുപത്രിയിലും എത്തിച്ചു. പരിക്ക് ഗുരുതരമല്ല.