തിരുവനന്തപുരം∙ സംസ്ഥാനത്തെ ഭൂരിഭാഗം വില്ലേജ് ഓഫിസുകളിലും അനധികൃത ഡേറ്റ എൻട്രി ഓപ്പറേറ്റർമാർ മാസങ്ങളായി ദിവസക്കൂലിക്കു പണിയെടുക്കുന്നു. ഇവർക്കു വേതനം നൽകുന്നതു വില്ലേജ് ഉദ്യോഗസ്ഥരും. ഭൂമി തരം മാറ്റ അപേക്ഷകൾ വേഗം തീർപ്പാക്കാൻ 6 മാസത്തേക്കു താൽക്കാലികമായി ഡേറ്റ എൻട്രി ഓപ്പറേറ്റർമാരെ നിയമിക്കാൻ റവന്യു വകുപ്പ് ശുപാർശ നൽകിയതോടെയാണ് അനധികൃത ജോലിക്കാരുടെ വിവരം സമൂഹമാധ്യമങ്ങളിലൂടെ പുറത്തുവന്നത്. 

വില്ലേജ് ഓഫിസിലെ ഭൂരേഖകളിലെ വിവരങ്ങൾ കംപ്യൂട്ടറിൽ എൻട്രി ചെയ്ത് ഓൺലൈൻ നികുതി അടയ്ക്കുന്നതിനു തയാറാക്കുന്നതാണ് ഇവരുടെ പ്രധാന ജോലി. വില്ലേജ് ഉദ്യോഗസ്ഥർ വർഷങ്ങൾക്കു മുൻപു തീർക്കേണ്ടിയിരുന്ന ജോലിയാണ് ‘പുറംപണിക്കരാർ’ പോലെ ഇവരെ ഏൽപിച്ചരിക്കുന്നത്. പ്രതിദിനം 250 മുതൽ 500 രൂപ വരെ ഇവർക്കു വേതനം ലഭിക്കുന്നുണ്ടെന്നാണു സൂചന. എന്നാൽ, ഇതിനുള്ള പണം എവിടെ നിന്ന് ഉദ്യോഗസ്ഥർ കണ്ടെത്തുന്നു എന്നു വ്യക്തമല്ല. 

വില്ലേജ് ഓഫിസർമാരുടെ യൂസർ നെയിമും പാസ്‌വേഡും ഉപയോഗിച്ചു ഓഫിസിലെ ലാപ്ടോപും കംപ്യൂട്ടറും വഴി റവന്യു വകുപ്പിന്റെ ഓൺലൈൻ സംവിധാനത്തിലൂടെ ഇവർ പ്രവർത്തിക്കുന്ന വിവരം അറിഞ്ഞിട്ടും ഉന്നത ഉദ്യോഗസ്ഥർ കണ്ടില്ലെന്നു നടിക്കുകയാണ് എന്നാണ് ആരോപണം. 

ഓൺലൈനായി നികുതി അടയ്ക്കാൻ ലഭിക്കുന്ന അപേക്ഷകൾ അംഗീകരിക്കുന്നതും ഭൂമി തരം മാറ്റത്തിനായുള്ള അപേക്ഷകളിൽ റിപ്പോർട്ട് നൽകുന്നതും ഇ ഡിസ്ട്രിക് പദ്ധതി പ്രകാരം നൽകുന്ന 24 തരം സർട്ടിഫിക്കറ്റുകൾ ഡിജിറ്റൽ ഒപ്പോടെ നൽകുന്നതും വില്ലേജ് ഓഫിസർമാർക്കും സ്പെഷൽ വില്ലേജ് ഓഫിസർമാർക്കും റവന്യു വകുപ്പ് നൽകിയിട്ടുള്ള കംപ്യൂട്ടറുകൾ വഴിയാണ്. വില്ലേജ് അസിസ്റ്റന്റ്, ക്ലാർക്ക്, സ്പെഷൽ വില്ലേജ് ഓഫിസർ (യുഡി ക്ലാർക്ക്), വില്ലേജ് ഓഫിസർ എന്നിവർക്കാണ് ഓൺലൈനായി നികുതി അടയ്ക്കാനുള്ള അപേക്ഷ അംഗീകരിക്കാനുള്ള അധികാരം. 

വില്ലേജ് ഓഫിസിലെ തണ്ടപ്പേർ, അടിസ്ഥാന ഭൂനികുതി റജിസ്റ്റർ (ബിടിആർ) തുടങ്ങിയവയിലെ വിവരങ്ങൾ പരിശോധിച്ചു കുറ്റമറ്റതമാണെന്ന് ഉറപ്പാക്കി വൺടൈം വെരിഫിക്കേഷൻ നടത്തിയാലേ ഭൂനികുതി ഓൺലൈനായി അടയ്ക്കാനാകു. എല്ലാ വില്ലേജിലും ഈ നടപടിക്രമം വർഷങ്ങൾക്കു മുൻപു പൂർത്തിയാക്കണമായിരുന്നു. എന്നാൽ, ജീവനക്കാരുടെ കുറവും പണിയിലെ മെല്ലെപ്പോക്കും കോവിഡ് ഉൾപ്പെടെയുള്ള കാരണങ്ങളും പറഞ്ഞ് ഇതു പൂർത്തിയാകാതെ നീണ്ടു. പഴയ പോലെ ഭൂനികുതി രസീത് കൈ കൊണ്ട് എഴുതി നൽകാൻ റവന്യു വകുപ്പ് അനുവദിക്കുന്നില്ല. വകുപ്പിന്റെ പോർട്ടൽ വഴി റജിസ്റ്റർ ചെയ്ത് വില്ലേജ് ഓഫിസറുടെ അംഗികാരം ലഭിച്ചാൽ നികുതി അടയ്ക്കാം.

വൺ ടൈം വെരിഫിക്കേഷൻ നടത്താത്തതിനാൽ നികുതി അടയ്ക്കാൻ കഴിയാത്ത ആയിരക്കണക്കിനു ഭൂവുടമകളുണ്ട്. ഇതോടെയാണ് അനധികൃതമായി ഡേറ്റ എൻട്രി ഓപ്പറേറ്റർമാരെ വില്ലേജ് ഓഫിസർമാർ തന്നെ നിയോഗിച്ചു തുടങ്ങിയത്. ഇവർ എൻട്രി ചെയ്യുന്ന വിവരങ്ങളിൽ പലതിലും തെറ്റുകളും കടന്നുകൂടുന്നു. ഭൂവുടമ നികുതി അടയ്ക്കുന്നതിനു മുന്നോടിയായി വിവരങ്ങൾ ഓൺലൈനായി പരിശോധിക്കുമ്പോഴാണ് സർവേ നമ്പർ, തണ്ടപ്പേര് നമ്പർ, വിസ്തീർണം എന്നിവയിൽ ഉൾപ്പെടെയുള്ള തെറ്റു കണ്ടെത്തുക. ഇതു പരിശോധിക്കാതെയും ശ്രദ്ധിക്കാതെയും നികുതി അടയ്ക്കുന്ന ഭൂവുടമകൾ പ്രയാസത്തിലാവുകയും ചെയ്യുന്നു.