കണ്ണൂർ : ഒറ്റയ്ക്ക് താമസിക്കുന്നവരോ, മറ്റാരിൽനിന്നെങ്കിലും ബുദ്ധിമുട്ട് നേരിടുന്നവരോ ആയ മുതിർന്ന പൗരന്മാരുടെ സംരക്ഷണത്തിനും സേവനത്തിനുമായി കേരള പോലീസ് ഏറെനാളായി ഒട്ടേറെ പദ്ധതികൾ നടപ്പാക്കുന്നുണ്ട്. അതിൽ പലതും ചില പ്രദേശങ്ങളിൽമാത്രം ഒതുങ്ങിനിൽക്കുന്നതാണെങ്കിലും സംസ്ഥാനതലത്തിൽ തന്നെയുള്ള രണ്ട് പദ്ധതികളാണ് പ്രശാന്തി ഹെൽപ്പ് ഡെസ്കും വയോജനക്ഷേമ പോലീസിങ്ങും.

കേരള പോലീസ് ജനമൈത്രി ഡയറക്ടറേറ്റുമായി ചേർന്ന് നടത്തുന്ന 24×7 കോൾ സെന്ററാണ് പ്രശാന്തി. ഇവിടെ ലഭിക്കുന്ന കോളുകളിൽനിന്ന് ലഭിക്കുന്ന വിവരമനുസരിച്ച് ബന്ധപ്പെട്ട പോലീസ് സ്റ്റേഷനുകളിൽ വിവരം അറിയിക്കും. അവിടെനിന്ന് പരാതിക്കാരന് സേവനം ലഭിച്ചെന്ന് പിന്നീട് വിളിച്ച് ഉറപ്പുവരുത്തുകയും ചെയ്യും.

വൃദ്ധസദനങ്ങളിലെ താമസക്കാർ നേരിടുന്ന പ്രശ്നങ്ങൾ, റിവേഴ്സ് ക്വാറന്റീനിൽ കഴിയുന്ന മുതിർന്നപൗരന്മാരുടെ പ്രശ്നങ്ങൾ എന്നിവ പരിഹരിക്കുന്നതിനും ജില്ലാടിസ്ഥാനത്തിൽ സീനിയർ സിറ്റിസൺ സെൽ നിരീക്ഷണ വയോക്ഷേമ സെന്ററുണ്ട്. രാവിലെ ഒമ്പതുമുതൽ വൈകീട്ട് ആറുവരെയാണ് പ്രവർത്തനം.

‘മുതിർന്നപൗരന്മാരുടെ സംരക്ഷണവും ക്ഷേമവും സംബന്ധിച്ച നിയമം 2007’ പ്രകാരം എല്ലാ പോലീസ് സ്റ്റേഷനുകളിലും വയോജന സൗഹൃദ ഹെൽപ്പ് ലൈൻ നിലവിലുണ്ട്. ഇതിനുപുറമേ വയോജനസൗഹൃദ പോലീസ് ഓഫീസർ (ഇ.എഫ്.ഒ.) ഓരോ സ്റ്റേഷനിലുമുണ്ട്. മുതിർന്നപൗരന്മാരുടെ പരാതികൾ ഇ.എഫ്.ഒ. വീടുകളിലെത്തി പരിഹരിച്ചുനൽകണമെന്നാണ് വ്യവസ്ഥ. പല പോലീസ് സ്റ്റേഷനുകളിലും ക്രമസമാധാന പ്രശ്നങ്ങൾകാരണമുള്ള ജോലിഭാരം കൂടുമ്പോൾ ഇത്തരം ഇ.എഫ്.ഒ.കളുടെ സേവനം ഇല്ലാതെ വരുന്ന അവസ്ഥ സീനിയർ സിറ്റിസൺസ് സംഘടന ഉന്നത പോലീസ് ഉദ്യോഗസ്ഥരുടെ ശ്രദ്ധയിൽപ്പെടുത്തിയിട്ടുണ്ട്.