കണ്ണൂർ: പഠനകാലത്ത് ഏറെ സമയം ചെലവഴിച്ച വായനശാലയെയും നാട്ടുകാരയും മറന്നില്ല, സ്വന്തം നാട്ടിൽ സൗജന്യ പരിശോധനയൊരുക്കി യുവഡോക്ടർ. തലശ്ശേരി വടക്കുമ്പാട് എസ്.എൻ. പുരത്തെ ഡോ. അശ്വിൻ മുകുന്ദനാണ് ഈ ‘മാതൃകാ ഡോക്ടർ’. എല്ലാ മാസത്തേയും ആദ്യ ഞായറാഴ്ചയാണ് സൗജന്യ വൈദ്യപരിശോധനാ ക്യാമ്പ്. എസ്.എൻ. പുരം ശ്രീനാരായണ ലൈബ്രറിയാണ് പരിശോധനാകേന്ദ്രം.

നാട്ടുകാർക്കുവേണ്ടി വല്ലതും ചെയ്യണമെന്ന ചിന്തയാണ് അശ്വിനെ ഈ തീരുമാനത്തിലെത്തിച്ചത്. ഇപ്പോൾ പരിശോധനാ ദിവസം ശരാശരി അൻപതോളം രോഗികൾ ചികിത്സയ്ക്കായെത്തുന്നു. തലശ്ശേരി ബി.ഇ.എം.പി. സ്കൂളിലെ ഹൈസ്കൂൾ പഠനകാലം വരെ നാട്ടിലെ ശ്രീനാരായണ വായനശാലയിലെ നിത്യസന്ദർശകനായിരുന്നു അശ്വിൻ. ഇവിടെനിന്നും വായിച്ച പുസ്തകങ്ങൾ നിരവധി. ജനറൽ മെഡിസിൻ പൂർത്തിയാക്കിയശേഷം അശ്വിൻ ഡയബറ്റോളജി കോഴ്സും പൂർത്തിയാക്കി. രാവിലെ 7.30 മുതൽ രോഗികൾ തീരുന്നതുവരെയാണ് പരിശോധന. ചികിത്സാവിവരമറിഞ്ഞ് നാട്ടുകാരല്ലാത്തവരും ഡോക്ടറെ സമീപിക്കാറുണ്ട്.

അശ്വിന്റെ പരിശോധനാ ദിവസംതന്നെ ലൈബ്രറിയുടെ നേതൃത്വത്തിൽ ഇവിടെ സൗജന്യ പ്രമേഹ-രക്തസമ്മർദ പരിശോധനയും നടത്തുന്നുണ്ട്. കോഴിക്കോട്ടെ ഡോ. മോഹൻസ് ഡയബറ്റിസ് സ്പെഷ്യാലിറ്റി സെന്ററിലെ ചീഫ് കൺസൾട്ടന്റാണ് അശ്വിൻ. കഴിഞ്ഞ വർഷം രണ്ട് സുപ്രധാന അവാർഡുകൾ ഇദ്ദേഹത്തെത്തേടിയെത്തി. പ്രമേഹ ചികിത്സാ ഗവേഷകരുടെ ദേശീയ സംഘടനയായ ആർ.എസ്.എസ്.ഡി.ഐ. (റിസർച്ച് സൊസൈറ്റി ഫോർ ദ സ്റ്റഡി ഓഫ് ഡയബറ്റിസ് ഇൻ ഇന്ത്യ) യുടെ ദേശീയ പുരസ്കാരവും ഡയബറ്റീസ് ഇന്ത്യ അവാർഡും. ജില്ലാ ലൈബ്രറി കൗൺസിൽ പ്രസിഡന്റും റിട്ട. അധ്യാപകനുമായ മുകുന്ദൻ മഠത്തിലിന്റേയും അധ്യാപിക എം.സി. വിജയലക്ഷ്മിയുടെയും മകനാണ്. ഡോ. പ്രിയങ്ക കശ്യപാണ് ഭാര്യ.