ചെറുകുന്ന്: ദേശീയ ഫുട്ബോൾ താരമായിരുന്ന ഇരിണാവ് പയ്യട്ടത്തെ വി.കെ. ശ്രീനിവാസന്റെ ചികിത്സാച്ചെലവ് സർക്കാർ ഏറ്റെടുക്കണമെന്ന് സ്പോർട്സ് ഫോറം കണ്ണൂർ അധികൃതരോടാവശ്യപ്പെട്ടു. രണ്ടുതവണ ഗോവയ്ക്കുവേണ്ടിയും അഞ്ചുതവണ കേരളത്തിനുവേണ്ടിയും സന്തോഷ് ട്രോഫി ദേശീയ ചാമ്പ്യൻഷിപ്പിൽ കളിച്ച താരമാണ് വി.കെ. ശ്രീനിവാസൻ. ലക്കി സ്റ്റാർ കണ്ണൂർ, സ്പിരിറ്റഡ് യൂത്ത് കണ്ണൂർ, സാൽഗോക്കർ ഗോവ, കെ.എസ്.ആർ.ടി.സി. തിരുവനന്തപുരം, ടൈറ്റാനിയം തിരുവനന്തപുരം എന്നീ ടീമുകളുടെ ക്യാപ്റ്റൻ, കോച്ച് എന്നീ നിലകളിൽ 45 വർഷത്തിലധികം തിളങ്ങി. നിരവധി ജില്ലാ, സംസ്ഥാന, ദേശീയ ചാമ്പ്യൻഷിപ്പുകളിലും ടൂർണമെന്റുകളിലും മികച്ച കളിക്കാരനായും നിറഞ്ഞുനിന്നു. ഒരു അപകടത്തിൽ സാരമായി പരിക്കേറ്റ് കിടപ്പിലാണ്.

ചികിത്സയിൽ കഴിയുന്ന ശ്രീനിവാസനെ ഇരിണാവ് പയ്യട്ടത്തെ അദ്ദേഹത്തിന്റെ വീടായ ദിനീഷ് നിവാസിൽ എത്തി സ്പോർട്സ് ഫോറം കണ്ണൂരിന്റെ പ്രവർത്തകർ ആദരിച്ചു. മുൻ ഇന്ത്യൻ ടീം ക്യാപ്റ്റൻ വി. ധനേഷ് പൊന്നാടയണിയിച്ചു. ഇൻറർനാഷണൽ റഫറി ടി.വി. അരുണാചലം, മുൻ ദേശീയ ഫുട്ബോൾ താരവും കേരള പോലീസ് താരവുമായ എൻ. മോഹനൻ, എസ്. ശ്രീകുമാർ എന്നിവരും കൂടെയുണ്ടായിരുന്നു.