കണ്ണൂർ: ലോലയും ലക്സിയും റീമയും ഹീറോയും തൃശ്ശൂരിലെ പോലീസ് അക്കാദമിയിലെ പരിശീലനംനേടി എത്തിയത് നല്ല ഫോമിൽ. രാമവർമപുരത്തെ പോലീസ് പരേഡ് ഗ്രൗണ്ടിൽ വ്യാഴാഴ്ച നടന്ന പാസിങ് ഔട്ട് പരേഡിൽ പങ്കെടുത്ത 14 പേരിൽ മികച്ച പ്രകടനത്തിന് ലഭിച്ച മൂന്ന് മെഡലുകളിൽ രണ്ടും നേടിയാണ് ഇവർ വെള്ളിയാഴ്ച പുലർച്ചെ കണ്ണൂരിലെത്തിയത്. മികച്ച ലഹരിമരുന്ന് പിടിത്തക്കാരനുള്ള മെഡൽ ഹീറോവിനും മികച്ച ‘ട്രാക്കർ’ക്കുള്ള മെഡൽ ലോലക്കും. കണ്ണൂർ പോലീസിന്റെ ശ്വാനസേനയിലേക്കാണ് മിടുക്ക് തെളിയിച്ച് ഇവയെത്തിയത്.

സ്ഫോടകവസ്തുക്കൾ കണ്ടെത്താനുള്ള മിടുക്കിനുള്ള മെഡൽ ലഭിച്ചത് ഏറണാകുളത്തുകാരൻ അർജുന്. ഏകദേശം ഒരുവർഷം നീണ്ടതായിരുന്നു ഇവർക്കുള്ള പരിശീലനം. സാധാരണ ഒൻപത് മാസത്തെ പരിശീലനം മാത്രമേ ആവശ്യമുള്ളൂ. കോവിഡ് കാരണം ചില പ്രശ്നങ്ങൾ നേരിട്ടതാണ് പരിശീലനം കുറച്ചുകൂടി നീണ്ടത്. നാലുപേരിൽ ലക്സി കണ്ണൂർ സിറ്റി പോലീസിനും മറ്റ് മൂന്ന് പേർ റൂറൽ പോലീസിനുമാണ്.

മാങ്ങാട്ടെ പോലീസ് ആസ്ഥാനത്ത് സൗകര്യമില്ലാത്തതിനാൽ കൊളവല്ലൂർ പോലീസ് സ്റ്റേഷനിലാണ് ഇവർ നാലുപേരെയും താത്കാലികമായി താമസിപ്പിക്കുന്നത്. നാല് കൂടുകൾ ഇവിടെയുണ്ട്. ലക്സിക്കും റീമക്കും സ്ഫോടകവസ്തുക്കൾ കണ്ടെത്താനുള്ള പരിശീലനമാണ് ലഭിച്ചത്. സ്‌ഫോടകവസ്തു കണ്ടെത്തിയാൽ അതിന് അൽപ്പം അകലെ അനങ്ങാതിരിക്കും. കുരക്കില്ല, ചിലപ്പോൾ ശബ്ദമുണ്ടായാൽ പൊട്ടിത്തെറിക്കുന്ന ഉപകരണങ്ങൾ തീവ്രവാദസംഘടനകളും മറ്റും സ്‌ഫോടകവസ്തുക്കളിൽ ഘടിപ്പിച്ചിട്ടുണ്ടാവാം. അതുകൊണ്ടാണ് ഈ മുൻകരുതൽ. ലോലക്ക് കുറ്റകൃത്യംചെയ്യുന്നവരെ പിടികൂടാനും ഹീറോവിന് മയക്കുമരുന്ന് പിടികൂടാനുമുള്ള പരിശീലനവുമാണ് ലഭിച്ചത്.

സരേഷ്, സിബിൻ ബാലൻ എന്നിവരാണ് ഹീറോയെ നയിക്കുന്നത്. ലോലയുടെ ചുമതലക്കാർ വീനീഷും ജിതിൻരാജും റീമയുടേത് ശ്യാമും ഷംജിത്തും. നിജീഷിന്റെയും അമിത് കുമാറിന്റെയും നിയന്ത്രണത്തിലാണ് ലക്സി. ‘ബെൽജിയൻ മലിനോയിസ്’ ഇനത്തിൽപ്പെട്ടവരാണ് നാലുപേരും. ഏറ്റവും അനുസരണശീലമുള്ളതും ബുദ്ധിയും ഊർജവുമുള്ളവരാണിവർ. സ്ഫോടകവസ്തുക്കളും മയക്കുമരുന്നും വാതകച്ചോർച്ചയും കണ്ടുപിടിക്കാനും കുറ്റവാളികൾ പോയ വഴികൾ കണ്ടെത്താനും ലോകത്തെല്ലായിടത്തുമുള്ള സേനകൾ ഉപയോഗിക്കുന്നത് ഈ ഇനത്തിലുള്ളവയെയാണ്. 12-14 വയസ്സുവരെയാണ് ആയുസ്സ്‌. രാവിലെ ഏഴുമുതൽ എട്ടരവരെയും വൈകീട്ട് നാലുമുതൽ അഞ്ചരവരെയുമായിരുന്നു പരിശീലനം കിട്ടിയത്. ഇടവേളകളിൽ ചുമതലക്കാർ ലഘു പരിശീലനങ്ങളും നൽകും.

ഇറ്റലിയിൽനിന്ന് ഇറക്കുമതിചെയ്ത എൻ ആൻഡ് ഡി എന്ന പ്രത്യേക ഭക്ഷണവും പാലും മുട്ടയുമാണ് ഇവയുടെ ഭക്ഷണം. രാവിലെയും വൈകീട്ടുമായിരിക്കും ഭക്ഷണം. ഇനി, കണ്ണൂരിലെ പോലീസ് സേനക്ക് ഇവയുടെ സേവനം പ്രയോജനപ്പെടുത്താം. ഇതോടെ ജില്ലാ പോലീസ് സേനയിലെ ശ്വാന്മാരുടെ എണ്ണം പതിനാലായി.