പേരാവൂർ: പേരാവൂർ താലൂക്കാസ്പത്രി നവീകരണത്തിന് തയ്യാറാക്കിയ 53 കോടിയുടെ മാസ്റ്റർ പ്ലാൻ നടപ്പിലാക്കുന്നത് സ്റ്റേ ചെയ്തഹൈക്കോടതി ഉത്തരവിനെതിരെ ആസ്പത്രി അധികൃതർ മൗനത്തിലെന്ന് ആക്ഷേപം.ഗവ.ഡോക്ടർമാർ നല്കിയ ഹരജിയിന്മേൽ ജൂലായ് 11ന് ഹൈക്കോടതി അനുവദിച്ച സ്റ്റേ ആറു മാസം കഴിഞ്ഞിട്ടും ഒഴിവാക്കി കിട്ടാൻ സംസ്ഥാന ആരോഗ്യ വകുപ്പോ ആസ്പത്രിയുടെ ഭരണചുമതല വഹിക്കുന്ന പേരാവൂർ ബ്ലോക്ക് പഞ്ചായത്തധികൃതരോ തയ്യാറാവുന്നില്ലെന്നാണ് ആസ്പത്രി സംരക്ഷണ സമിതിയുടെ പരാതി.

2021 ജൂലായ്14 നാണ് മാസ്റ്റർ പ്ലാൻ നടപ്പാക്കുന്നത് തടയണമെന്നാവശ്യപ്പെട്ട് രണ്ട് ഗവ.ഡോക്ടർമാർ ഹൈക്കോടതിയിൽ ഹരജി നല്കിയത്.സർക്കാർ ആസ്പത്രിയുടെ നവീകരണം സർക്കാർ ഡോക്ടർമാർ തന്നെ സ്റ്റേ ചെയ്തിട്ടും ജില്ലാ ആരോഗ്യ വകുപ്പധികൃതർ ഡോക്ടർമാർകെതിരെ വകുപ്പുതല നടപടിയെടുക്കാൻ തയ്യാറായിട്ടില്ല.

ആസ്പത്രിയുടെ സ്ഥലം കയ്യേറി നിയമതടസങ്ങൾ ഉണ്ടാക്കുക,ആസ്പത്രി ഭൂമിക്ക് മേൽ ഉടമസ്ഥാവകാശം കാണിച്ച് കോടതിയിൽ നിന്ന് സ്റ്റേ വാങ്ങുക എന്നിവക്ക് പിന്നിലും പേരാവൂർ ആസ്പത്രിയുടെ നവീകരണം തടയുക എന്ന ലക്ഷ്യമാണ് ചിലർക്കെന്ന് ആസ്പത്രി സംരക്ഷണ സമിതി ആരോപിക്കുന്നു.ആസ്പത്രി ജീവനക്കാർക്കെതിരെ പോലീസിലും വകുപ്പ് തലത്തിലും നിരവധി വ്യാജ പരാതികൾ ഇക്കൂട്ടർ നല്കിയിട്ടുണ്ട്.

ആസ്പത്രി ഭൂമിയിൽ നിർമ്മിക്കുന്ന കോവിഡ് ഐ.സി.യു നിർമ്മാണം കഴിഞ്ഞ ദിവസം രണ്ട് ഗവ.ഡോക്ടർമാർ ചേർന്ന് തടഞ്ഞതിനെതിരെ ജില്ലാ മെഡിക്കൽ ഓഫീസർ അന്വേഷണം നടത്തിയെങ്കിലും യാതൊരു നടപടിയുമുണ്ടായിട്ടില്ല.നിർമാണം തടഞ്ഞവർക്കെതിരെ ആസ്പത്രി അധികൃതർ പേരാവൂർ പോലീസിൽ പരാതി നല്കിയെങ്കിലും കേസ് പോലും രജിസ്ട്രർ ചെയ്തിട്ടില്ലെന്നാണ് വിവരം.

പേരാവൂർ ബ്ലോക്കിലെ ഏഴു പഞ്ചായത്തുകളിൽ നിന്നുമുള്ള നിർധന രോഗികൾ ആശ്രയിക്കുന്നത് ഈ ആസ്പത്രിയെയാണ്.മാത്രവുമല്ല സംസ്ഥാനത്തെ ഏറ്റവുംവലിയ ആദിവാസി പുനരധിവാസ മേഖലയായ ആറളം ഫാമിലെ ആയിരങ്ങൾ ആശ്രയിക്കുന്നതും പേരാവൂർ താലൂക്കാസ്പത്രിയാണ്.ഒ.പിയിലും അത്യാഹിത വിഭാഗത്തിലുമായി ദിനെന ആയിരത്തിലധികം രോഗികൾ ഇവിടെ ചികിത്സ തേടുന്നുണ്ട്.ആസ്പത്രിയുടെ പ്രധാന കെട്ടിടങ്ങൾ മാസ്റ്റർ പ്ലാനിന്റെ അടിസ്ഥാനത്തിൽ പൊളിച്ചിട്ടിട്ട് മാസങ്ങളായി.

കിഫ്ബി ഫണ്ടിലുൾപ്പെടുത്തിയാണ് പേരാവൂർ ആസ്പത്രിക്ക് 53 കോടി രൂപ അനുവദിച്ചത്.നിർമാണ പ്രവർത്തനങ്ങൾക്കുള്ള സ്റ്റേഇനിയും വൈകുന്നപക്ഷം ഈ തുക പാഴാവാനാണ് സാധ്യത.പേരാവൂർ താലൂക്കാസ്പത്രി വികസനം അട്ടിമറിക്കുന്നവർക്കെതിരെ പ്രതികരിക്കാൻ യുവജന സംഘടനകളോ രാഷ്ട്രീയ പാർട്ടികളോ മുന്നോട്ടുവരുന്നില്ലെന്നതാണ് ഏറെ ഖേദകരം.

ആസ്പത്രി വികസനം തടസ്സപ്പെടുത്തുന്നതിനെതിരെ സംസ്ഥാന ആരോഗ്യവകുപ്പ് സെക്രട്ടറിക്ക് വിശദമായ പരാതി നല്കുമെന്ന് ആസ്പത്രി സംരക്ഷണ സമിതി ഭാരവാഹികൾ പറഞ്ഞു.