അഞ്ചരക്കണ്ടി: ജലസേചനം ലക്ഷ്യമിട്ട് നിർമിച്ച കനാലിൻ വെള്ളമില്ല. പകരം മാലിന്യക്കൂമ്പാരവും കാടും. അഞ്ചരക്കണ്ടി ഹയർസെക്കൻഡറി സ്കൂളിന് സമീപത്തുകൂടി കടന്നുപോകുന്ന പഴശ്ശി കനാലാണ് മാലിന്യം തള്ളുന്നവരുടെ കേന്ദ്രം. പ്രദേശം കാട് മൂടിയതും രാത്രിസമയത്തെ കൂരിരിട്ടും മാലിന്യം തള്ളുന്നവർക്ക് സഹായകരമാകുന്നു.

അറവുമാലിന്യമുൾപ്പെടെ കനാലിൽ തള്ളുന്നതിനാൽ തെരുവുനായ്ക്കളുടെ കേന്ദ്രമാണിവിടം. ഇത് സ്കൂൾകുട്ടികൾക്കും പരിസരവാസികൾക്കും ഭീഷണിയാണ്. വീട്ടുപറമ്പുകളിൽ പച്ചക്കറികൃഷി ചെയ്യാൻ പരിമിതിയുള്ളവർക്ക് കനാൽക്കരയിലെ സ്ഥലം അനുഗ്രഹമായിരുന്നു.

നിരവധി കർഷകർ ഇവിടെ കൃഷി ചെയ്യുന്നുണ്ട്. സ്ഥലത്ത് സി.സി.ടി.വി. ക്യാമറകൾ സ്ഥാപിക്കണമെന്നാണ് നാട്ടുകാരുടെ ആവശ്യം. കനാലിലെ കാട് വെട്ടിത്തെളിച്ച് കരയിൽ തെരുവുവിളക്കുകൾ സ്ഥാപിക്കണമെന്നതും ആവശ്യമാണ്. കൃഷി മേഖലയ്ക്ക് ജലസേചനം നടത്താൻ നിർമിച്ച കനാൽ പരിസരത്തുള്ളവർക്ക് തലവേദനയാകുന്നത് അധികൃതർ ഗൗരവത്തിലെടുക്കണം.