ആലക്കോട്: ആലക്കോട് പഞ്ചായത്തിലെ ആനപ്പാറയിലെ ജനവാസകേന്ദ്രത്തിൽ അനധികൃതമായി പ്രവർത്തിച്ചിരുന്ന പാറമട ആലക്കോട് പോലീസ് സംഘം പൂട്ടിച്ചു. സ്ഫോടനത്തിനുപയോഗിച്ചിരുന്ന 53 ജലാസ്റ്റിക് ശേഖരം പിടിച്ചെടുത്തു. സംഭവത്തിൽ ആലക്കോട് പോലീസ് ഇൻസ്പെക്ടർ എം.പി. വിനീഷ് കുമാറിന്റെ നേതൃത്വത്തിലുള്ള സംഘം രണ്ടുപേരെ അറസ്റ്റുചെയ്തു. പരിശോധനയ്ക്കിടെ ഓടിരക്ഷപ്പെട്ട ആളെ പോലീസ് തിരയുന്നുണ്ട്‌. ശങ്കർദാസ് കുറുപ്പുംപറമ്പിൽ (59), കെ.ജി. സാബു കുന്നത്താനം (42) എന്നിവരെയാണ് പാറ തുരന്നെടുക്കാനുപയോഗിച്ചിരുന്ന എയർ കംപ്രസർ ട്രാക്ടർ, പാറ കടത്താനുപയോഗിച്ചിരുന്ന വൻ ഭാരശേഷിയുള്ള രണ്ടു ടിപ്പർ ലോറികൾ, സ്ഫോടക വസ്തുക്കൾ എന്നിവ സഹിതം പോലീസ് അറസ്റ്റ് ചെയ്തത്.

ജനങ്ങൾക്ക് താമസിക്കാൻ കഴിയാത്ത നിലയിൽ പാറമടയിൽ രാപകൽ സ്ഫോടനമായിരുന്നു. നാട്ടുകാർ പഞ്ചായത്തിലും വില്ലേജ് ഓഫീസിലുമുൾപ്പെടെ പരാതി നൽകിയെങ്കിലും നടപടിയുണ്ടായില്ല. തുടർന്നാണ് നാട്ടുകാർ പോലീസ് സഹായം തേടിയത്. രോഗികൾക്കും വയോജനങ്ങൾക്കുമുൾപ്പെടെ വീട്ടിൽ കിടക്കാൻ കഴിയാത്തവിധം അത്യുഗ്ര സ്ഫോടനങ്ങളാണ് ഇവിടെ നടന്നിരുന്നത്. പാറ കടത്തുന്നതിന് റോഡ് വെട്ടിത്തുറന്നിരുന്നു. ഇൻസ്പെക്ടർ എം.പി. വിനീഷ് കുമാർ, എസ്.ഐ. അജിത്ത്, സി.പി.ഒ.മാരായ ജിമ്മി പവിത്രൻ, കെ.ഫിലിപ്പ് എന്നിവരാണ് പോലീസ് സംഘത്തിലുണ്ടായിരുന്നത്.