പെരളശ്ശേരി: ചെറുമാവിലായിയിലെ അക്ഷരയിൽ പി.വി.ദാസന്റെ വീട്ടുമുറ്റത്ത് നിറയെ വിൽപ്പനയ്ക്ക് തയ്യാറായ ഔഷധസസ്യങ്ങളാണ്. പക്ഷേ ഇത് പണം വാങ്ങി വിൽക്കില്ലെന്ന് മാത്രം. എല്ലാം സൗജന്യമാണ്. ആരുവന്നാലും കൊണ്ടുപോകാം.

സ്വന്തം കീശയിൽനിന്ന് പണമെടുത്താണ് ദാസൻ ഇത് തയ്യാറാക്കുന്നത്. സഞ്ചി വാങ്ങി അതിൽ മണൽ, ചകിരിച്ചോറ് എന്നിവ നിറച്ച് ഔഷധസസ്യങ്ങൾ മുളപ്പിക്കും. ഇവ തയ്യാറായാൽ സാമൂഹിക മാധ്യമങ്ങളിലൂടെ വിതരണത്തിന് തയ്യാറായിട്ടുണ്ടെന്ന് അറിയിക്കും. കോവിഡ് തുടങ്ങും മുൻപ് സ്കൂളുകൾ, കോളേജുകൾ, വായനശാലകൾ എന്നിവ വഴി ഔഷധസസ്യങ്ങൾ നൽകിയിരുന്നു. സ്കൂളുകളിലും മറ്റും എത്തിയാൽ ഔഷധ സസ്യങ്ങളുടെ പ്രാധാന്യത്തെക്കുറിച്ച് ആദ്യം ക്ലാസെടുക്കും. പിന്നെയാണ് വിതരണം.

ഇതിനകം 3500-ലധികം ക്ലാസെടുത്തു. 20 വർഷമായി സൗജന്യ വിതരണം തുടങ്ങിയിട്ട്. ഒരുമാസം ഏതാണ്ട് 10,000-ത്തിലധികം സസ്യങ്ങൾ വിതരണം ചെയ്യുന്നുണ്ട്. നിരവധി ആളുകൾ സസ്യങ്ങളന്വേഷിച്ച് വീട്ടിലെത്തുന്നുമുണ്ട്. വരുന്നവർക്കെല്ലം കൊടുക്കും. ഔഷധസസ്യങ്ങളെക്കുറിച്ചുള്ള 1500 ഫോട്ടോ പ്രദർശനങ്ങളും നടത്തി. ഇലയറിവുകൾ, ഔഷധ സസ്യങ്ങളും നാട്ടറിവും എന്നീ പുസ്തകങ്ങൾ രചിച്ചിട്ടുണ്ട്. 2021-ൽ സരോജിനി-ദാമോദരൻ പുരസ്കാരം ലഭിച്ചിട്ടുണ്ട്. ഒരുചെടിക്ക് അഞ്ചുരൂപ പ്രകാരം വാങ്ങിയിരുന്നെങ്കിൽ ലക്ഷങ്ങളുടെ വരുമാനം ലഭിക്കുമായിരുന്നു. റിട്ട. അധ്യാപിക കെ.വി.ലീനാകുമാരിയാണ് ഭാര്യ. ദിൽനാദാസും സിനോദാസും മക്കളാണ്. പിണറായി സർവീസ് സഹകരണ ബാങ്കിലെ മുൻ അസി. സെക്രട്ടറിയാണ്.