കണ്ണൂർ:  ‘ശങ്ക’ മാറ്റണമെന്ന ഉദ്ദേശ്യത്തിൽ പൈസയും കൊടുത്ത് ടോയ്‍ലറ്റിനകത്ത് കയറിയാൽ ‘പെട്ടു’. അസഹനീയമായ രൂക്ഷഗന്ധവും ഇരുട്ടും. കെട്ടിടത്തിനകത്ത് ആകെയുള്ള രണ്ട് ശൗചാലയങ്ങളിൽ രണ്ടിനും മതിയായ വൃത്തിയില്ല. -ടൗൺസ്ക്വയർ പാർക്കിൽ സ്ത്രീകൾക്കായി നിർമിച്ച ഷീ ടോയ്‍ലറ്റിന്റെ അവസ്ഥയാണിത്.

നഗരത്തിൽ പലയിടത്തും സ്ത്രീകൾക്ക് മതിയായ ശൗചാലയ സൗകര്യങ്ങളില്ല. ശൗചാലയങ്ങളുള്ള ഇടങ്ങളിലാകട്ടെ മൂക്കുപൊത്താതെ പരിസരത്ത് നിൽക്കാൻപോലും നിവൃത്തിയില്ല. ഇവിടങ്ങളിൽ പുകവലിക്കുന്നതിന്റെ അസഹ്യമായ ഗന്ധവുമുണ്ട്. നഗരത്തിലെ ഭൂരിഭാഗം പൊതുശൗചാലയങ്ങളും ഉപയോഗിക്കാൻ കഴിയാത്തവിധം വൃത്തിഹീനമാണ്. മിക്കവയിലും മതിയായ സ്വകാര്യതയുമില്ല.

നഗരത്തിൽ വിവിധ സ്ഥാപനങ്ങളിൽ ജോലിചെയ്യുന്ന സ്ത്രീജീവനക്കാരുടെ അവസ്ഥയും വ്യത്യസ്തമല്ല. ഒന്നുകിൽ സ്ഥാപനത്തിനകത്ത് ശൗചാലയ സൗകര്യമുണ്ടായിരിക്കില്ല, അല്ലെങ്കിൽ പുരുഷന്മാർക്കും സ്ത്രീകൾക്കുമായി പൊതുവായുള്ള ശൗചാലയമായിരിക്കും.

താലൂക്കോഫീസ് പരിസരത്തുള്ള സ്വകാര്യ സ്ഥാപനങ്ങളിലെല്ലാം ശൗചാലയസൗകര്യം പരിമിതമായതിനാൽ മഹാത്മാമന്ദിരത്തിന് സമീപത്തുള്ള ശൗചാലയമാണ് സ്ത്രീജീവനക്കാർ ഉൾപ്പെടെ ഉപയോഗിക്കുന്നത്.

ഇ-ടോയ്‍ലറ്റുകളോട് വിമുഖത

സ്ത്രീകൾക്കുവേണ്ടി വിവിധ പദ്ധതികൾക്കുകീഴിലായി ഇ-ടോയ്‍ലറ്റുകളും ഷീ ടോയ്‍ലറ്റുകളും സ്ഥാപിക്കുന്നുണ്ടെങ്കിലും ഇവയൊന്നും ഉപകാരപ്രദമാകുന്നില്ല എന്നതാണ് സത്യം. നഗരസഭ നിർമിച്ച ഇ-ടോയ്‍ലറ്റുകൾ ഭൂരിഭാഗവും നിലവിൽ പ്രവർത്തനരഹിതമാണ്.

തുടക്കത്തിൽ നല്ല രീതിയിൽ പ്രവർത്തിച്ചിരുന്ന ഇവ ഉപയോഗിക്കാൻ ആളുകൾ വിമുഖത പ്രകടിപ്പിക്കുന്നുവെന്നാണ് അധികൃതർ പറയുന്നത്. മിക്കയിടത്തും ഇത്തരം ശൗചാലയങ്ങൾ എടുത്തുനീക്കി. ചിലതാകട്ടെ കാടുമൂടിയ നിലയിലും. മതിയായ വെള്ളം പമ്പുചെയ്യാൻ സാധിക്കാത്തതും ഇ-ടോയ്‍ലറ്റുകളുടെ പ്രവർത്തനം പാതിവഴിയിൽ നിലയ്ക്കാൻ കാരണമായി.

കണ്ണൂർ നഗരസഭ 2020-21 സാമ്പത്തിക വർഷത്തിൽ 1,80,000 രൂപയാണ് പൊതുശൗചാലയങ്ങളുടെ അറ്റകുറ്റപ്പണികൾക്കും സംരക്ഷണത്തിനുമായി ബജറ്റിൽ വകയിരുത്തിയത്. 2021-22 വർഷത്തിൽ രണ്ടുലക്ഷം രൂപയും ഈ ഇനത്തിൽ വകയിരുത്തിയിട്ടുണ്ട്.