നടുവിൽ: മലയോരത്തെ വീടുകളിൽ ഇനി കപ്പവാട്ടിന്റെ നാളുകൾ. പച്ചക്കപ്പയ്ക്ക് ആവശ്യക്കാരില്ലാതായതോടെ വിളവെടുത്ത കപ്പ ഉണക്കിസൂക്ഷിക്കാനുള്ള ഒരുക്കത്തിലാണ് കർഷകർ. ആളും ബഹളവുമില്ലാതെ കുടുംബത്തിൽ മാത്രമൊതുങ്ങുന്ന രീതിയിലാണ് ഇക്കുറി കപ്പവാട്ട്. കോവിഡ് മുൻകരുതലാണ് കാരണം. മുൻകാലങ്ങളിൽ അയൽക്കാരും കൂട്ടുകാരുമൊക്കെ പങ്കാളികളായിക്കൊണ്ട് ഉത്സവാന്തരീക്ഷത്തിലാണ് ജോലികൾ ചെയ്തിരുന്നത്. രാവിലെ തുടങ്ങിയാൽ പുലരുവോളം നീണ്ടുനിന്നിരുന്നു ഇത്.

കഴിഞ്ഞ കൊല്ലത്തെ കൃഷി പലയിടങ്ങളിലും വിളവെടുക്കാതെ ബാക്കിക്കിടക്കുന്നുണ്ട്. വ്യാപകമായി കൃഷിചെയ്യപ്പെട്ടതിനാൽ ആവശ്യക്കാരില്ലാതായത് കർഷകരെ സാമ്പത്തികപ്രതിസന്ധിയിലാക്കി. ഇടവിട്ട് ശക്തമായ മഴ പെയ്തത് വിളവെടുപ്പിനെയും കപ്പ വാട്ടി ഉണക്കിയെടുക്കുന്നതിനെയും ബാധിച്ചു. ഇതുമൂലം ഇത്തവണ കപ്പ കൃഷി പകുതിയിലധികമായി കുറഞ്ഞു. ഇതുവരെ മഴ പെയ്യാത്തത് കർഷകർക്ക് അനുകൂല ഘടകമാണ്. ഒടുവള്ളിയിലെ കച്ചോലകാലായിൽ വീട്ടിൽ മൂന്ന് കുടുംബക്കാർ ചേർന്ന് കഴിഞ്ഞ ദിവസം കപ്പ വാട്ടി. എട്ട് ക്വിന്റലോളം പച്ചക്കപ്പയാണ് കുടുംബാംഗങ്ങൾ ചേർന്ന് വാട്ടിയെടുത്തത്.

നിലവിൽ പച്ചക്കപ്പയ്ക്ക് 20 രൂപയിൽ താഴെയാണ് വില. കർഷകർക്ക് 12 മുതൽ 15 രൂപ വരെ കിട്ടും. തൊഴിലാളികൾക്ക് നൽകേണ്ട കൂലിക്ക് പോലും ഇതു തികയില്ലെന്നാണ് കർഷകരുടെ പരാതി. വാട്ടി ഉണക്കിയ കപ്പ കടയിൽ 40 രൂപയ്ക്ക് കിട്ടും. കർഷകനു ലഭിക്കുന്നതാവട്ടെ 30 രൂപയിൽ താഴെയും. സ്ഥലമൊരുക്കി കൂടം എടുക്കുന്നതു മുതൽ പറിച്ചെടുക്കുംവരെയുള്ള ചെലവ് ഭീമമാണ്. മുൻപ്‌ പരസ്പര സഹായത്തോടെ നടത്തിയിരുന്ന പണികൾ കോവിഡ് സാഹചര്യത്തിൽ കൂലികൊടുത്ത്‌ ചെയ്യിക്കേണ്ടിവരുന്നതും കൃഷിച്ചെലവ് വർധിപ്പിച്ചു. പുറത്തുനിന്ന് വരുന്ന കപ്പയ്ക്കാണ് ആവശ്യക്കാർ കൂടുതൽ. മലയോരത്തെ കപ്പക്കർഷകർക്ക് ഇതും തിരിച്ചടിയായിരിക്കുകയാണ്. ആമ്പക്കാടൻ, സിലോൺ ഇനത്തിൽപ്പെട്ട കപ്പയാണ് കൂടുതലായി മലയോരത്ത് കൃഷിചെയ്യുന്നത്.