കണ്ണൂർ: പയ്യാമ്പലം ബീച്ചിൽ വീട് വാടകയ്ക്കെടുത്ത് അനാശാസ്യ പ്രവർത്തനങ്ങൾക്ക് സൗകര്യം ചെയ്തുകൊടുത്ത രണ്ടുപേർ പിടിയിൽ. പയ്യാമ്പലത്തെ ‘ലവ്ഷോർ’ എന്ന വീട് വാടകയ്ക്കെടുത്ത് ഇത്തരം പ്രവർത്തനങ്ങൾക്ക് ഉപയോഗപ്പെടുത്തിയ തോട്ടടയിലെ പ്രശാന്ത്കുമാർ (48), ഇയാളുടെ സഹായിയും ബംഗാൾ സ്വദേശിയുമായ ദേവനാഥ് ബോസ് (29) എന്നിവരെയാണ് കണ്ണൂർ ടൗൺ ഇൻസ്പെക്ടർ ശ്രീജിത്ത് കൊടേരിയുടെ നേതൃത്വത്തിൽ വനിതാ പോലീസുകാർ ഉൾപ്പെടുന്ന സംഘം അറസ്റ്റ് ചെയ്തത്.

പരിശോധന നടക്കുന്ന സമയത്ത്, എട്ട് മുറികളുള്ള വീട്ടിലെ അഞ്ചുമുറികളിലും സ്ത്രീകളും പുരുഷന്മാരുമുണ്ടായിരുന്നു. ഇവരെല്ലാം പ്രായപൂർത്തിയായവരും പരസ്പര സമ്മതപ്രകാരമാണ് എത്തിയതെന്നും വ്യക്തമായതിന്റെ അടിസ്ഥാനത്തിൽ വിട്ടയച്ചു.

ഈ വീട് കേന്ദ്രീകരിച്ച് അനാശാസ്യ പ്രവർത്തനങ്ങൾ നടക്കുന്നുണ്ടെന്ന് വിവരം കിട്ടിയതിന്റെ അടിസ്ഥാനത്തിലായിരുന്നു പരിശോധന. പിടികൂടിയവരെല്ലാം 20-നും 30-നും ഇടയിൽ പ്രായമുള്ളവരാണ്. മൂന്ന് പെൺകുട്ടികൾ കോളേജ് വിദ്യാർഥിനികളും ഒരു സ്ത്രീ ഫിസിയോ തെറാപ്പിസ്റ്റുമാണ്. പാനൂർ, കൂത്തുപറമ്പ്, തളിപ്പറമ്പ്, മയ്യിൽ എന്നിവിടങ്ങളിലുള്ളവരായിരുന്നു ഇവിടെയുണ്ടായിരുന്നത്.

പ്രതികളിൽ നിന്ന് പണവും കണ്ടെടുത്തു. ഒരുമുറിക്ക് 3,500 രൂപയാണ് ഈടാക്കിയിരുന്നത്. മകളുടെ കൂടെ ബെംഗളൂരുവിൽ താമസിക്കുന്ന വയോധികയുടെ ഉടമസ്ഥതയിലുള്ളതാണ് നീർക്കടവ് റോഡരികിലുള്ള വീട്. 18 മാസംമുൻപാണ് പ്രശാന്ത് കുമാർ ഈ വീട് വാടകയ്ക്കെടുത്തത്. എന്നാൽ ഒരു രേഖകളും ഇയാളുടെ കൈയിലുണ്ടായിരുന്നില്ല.