കോഴിക്കോട്: സ്ഥലം വാങ്ങിയതിനെ തുടർന്നുള്ള തർക്കത്തിൽ പോലീസുകാരനും സുഹൃത്തും ചേർന്ന് പോക്സോ കേസിൽ കുടുക്കിയ 70-കാരനെ അഞ്ച് വർഷത്തിന് ശേഷം കോടതി വെറുതെ വിട്ടു. കോഴിക്കോട് പ്രിൻസിപ്പൽ പോക്സോ കോടതിയാണ് പേരാമ്പ്ര എരവട്ടൂർ സ്വദേശിയായ കൊയ്യൂക്കണ്ടിയിൽ ബാലനെ വെറുതെ വിട്ടത്. കേസിൽ പ്രതി അമ്പത് ദിവസത്തോളം വിചാരണ തടവുകാരനായി ജയിലിൽ കിടന്നിരുന്നു.

2017-ൽ ആയിരുന്നു കേസിനാസ്പദമായ സംഭവം. ഒമ്പത് വയസ്സുകാരിയെ പ്രതി 2015 മുതൽ 2017 വരെ അഞ്ച് തവണ വിവിധ സ്ഥലങ്ങളിൽ കൊണ്ടുപോയി പീഡിപ്പിച്ചുവെന്നായിരുന്നു കേസ്. ഇയാൾക്കെതിരേ പേരാമ്പ്ര പോലീസായിരുന്നു 2017 ജനുവരി 24 ന് പോക്സോ നിയമപ്രകാരം കേസ് രജിസ്റ്റർ ചെയ്തത്. എന്നാൽ വ്യക്തി വൈരാഗ്യത്തിന്റെ പേരിൽ പേരാമ്പ്ര സ്റ്റേഷനിൽ അന്ന് ജോലി ചെയ്തിരുന്നു പോലീസുകാരൻ കേസിൽ കുടുക്കുകയായിരുന്നുവെന്ന് പ്രതിഭാഗം അഭിഭാഷകർ വാദിച്ചു. ഇത് കോടതി അംഗീകരിക്കുകയായിരുന്നു.

കേസിൽ കുടുക്കിയ പോലീസുകാരന്റേയും പ്രതിയായ ബാലന്റേയും വീടിന് ഇടയിലുള്ള മറ്റൊരു സ്ഥലം ബാലനും കേസിലെ പെൺകുട്ടിയുടെ അച്ഛനും പോലീസുകാരനും ചേർന്ന് വാങ്ങാൻ താൽപര്യപ്പെട്ടിരുന്നു. എന്നാൽ ബാലൻ സ്ഥലം തന്റെ മകളുടെ ഭർത്താവിന്റെ പേരിൽ ആദ്യം വാങ്ങിച്ചതിലെ വൈരാഗ്യമാണ് കേസിന് കാരണമായതെന്ന് പ്രതിഭാഗം അഭിഭാഷകരായ അഡ്വ.ടി.ഷാജിത്ത്, അഡ്വ.എം അശോകൻ എന്നിവർ വാദിച്ചു. ഈ വാദം കണക്കിലെടുത്താണ് പ്രോസിക്യൂഷന് കുറ്റം തെളിയിക്കാൻ കഴിയാതെ പോയെന്ന് കോഴിക്കോട് പ്രിൻസിപ്പൽ പോക്സോ ജഡ്ജ് സി.ആർ ദിനേശ് കണ്ടെത്തിയത്. തുടർന്ന് പ്രതിയെ വെറുതെവിട്ടുകൊണ്ടുള്ള നിർണായക വിധി പുറപ്പെടുവിക്കുകയായിരുന്നു.

സംഭവവുമായി ബന്ധപ്പെട്ട് ആക്ഷൻ കമ്മിറ്റിയടക്കം രൂപീകരിച്ച് പ്രതിഷേധവും നടന്നിരുന്നു. പ്രോസിക്യൂഷന് വേണ്ടി ഒന്ന് മുതൽ 19 വരെയുള്ള സാക്ഷികളെ വിസ്തരിച്ചു. മറ്റ് സാക്ഷികൾക്ക് പുറമെ ആക്ഷൻ കമ്മിറ്റി അംഗങ്ങളും പ്രതിക്കെതിരേ തെളിവ് കൊടുത്തിരുന്നു. പ്രതിഭാഗം അന്വേഷണ സമയത്ത് പേരാമ്പ്ര മജിസ്ട്രേറ്റായ ആൻമേരി കുര്യുക്കോസ് അടക്കമുള്ള അഞ്ച് സാക്ഷികളെ വിസ്തരിച്ചിരുന്നു.