മയ്യിൽ : വളപട്ടണം പുഴയും തുരുത്തും സമൃദ്ധമായ തീരവും ആസ്വദിച്ച് വാട്ടർ ടാക്സിയിലൊരു യാത്ര. പച്ചപ്പണിഞ്ഞ നെൽപ്പാടങ്ങളും കർഷക പാരമ്പര്യവും കണ്ട് മനം നിറയ്‌ക്കുന്നതിനൊപ്പം മുല്ലക്കൊടിയുടെ നാട്ടുരുചികളാൽ വയറും നിറയ്‌ക്കാം. സംസ്ഥാന സർക്കാരിന്റെ വിനോദസഞ്ചാര വികസനത്തിൽ മയ്യിൽ പഞ്ചായത്തിലെ മുല്ലക്കൊടി – പറശ്ശിനിക്കടവ് തീരദേശ മേഖലകൂടി ഉൾപ്പെടുന്നതോടെ ഉയർന്നുവരുന്നത്‌ ഗ്രാമീണ വിനോദസഞ്ചാരമെന്ന പുതുമാതൃകയാണ്.

മുല്ലക്കൊടി നണിച്ചേരിക്കടവ് പാലത്തിനെയും പറശ്ശിനി പാലത്തെയും ബന്ധിപ്പിക്കുന്ന രണ്ടര കിലോമീറ്റർ തീരദേശ റോഡിന്റെ ഭാഗങ്ങളിലാണ് ടൂറിസത്തിന്റെ അനന്തസാധ്യത. തീരദേശ റോഡിന് സമാന്തരമായി നിലകൊള്ളുന്ന ഭാഗങ്ങളിൽ എന്നും സഞ്ചാരികളുടെ തിരക്കാണ്. ശാന്തമായ സായാഹ്നം അസ്വദിക്കുന്ന നൂറുകണക്കിന് സഞ്ചാരികൾ ഈ വഴിയാണ് യാത്രകൾക്ക് തെരഞ്ഞെടുക്കുന്നത്. കാഴ്‌ചകൾ ക്യാമറകളിൽ പകർത്താനും നിരവധി പേരെത്തുന്നു. ഇക്കൂട്ടത്തിൽ പറശ്ശിനിക്കടവിലെത്തുന്ന നിരവധി തീർഥാടക സംഘങ്ങളും വിദേശികളുമുണ്ട്. ഇവരെ സ്വീകരിക്കാനായി ഹോം സ്റ്റേ, കയാക്കിങ്‌, നാടൻ ഭക്ഷണശാലകൾ എന്നിവയും സജ്ജം.

മയ്യിൽ പഞ്ചായത്തിന്റെ നേതൃത്വത്തിൽ ടൂറിസ വികസന പ്രവർത്തനങ്ങൾക്കുള്ള ആദ്യഘട്ടം ആരംഭിച്ചുകഴിഞ്ഞു. തീരദേശ റോഡിന്റെ സമാന്തരമായ ഭൂരിഭാഗം സ്ഥലവും പഞ്ചായത്തിന്റെ അധീനതയിലായതിനാൽ ഇവിടം സംരക്ഷണഭിത്തി കെട്ടി ഇരിപ്പിടങ്ങളൊരുക്കും. കൂടാതെ ബോട്ട്ടെർമിനൽ, കുട്ടികളുടെ പാർക്ക്, കവുങ്ങിൻ കുടിലുകൾ, പൂന്തോട്ടം, കളിസ്ഥലം, ഫ്ലോട്ടിങ്‌ കാന്റീൻ, വാട്ടർ സ്പോർട്സ് എന്നിവയ്ക്കും സാധ്യതകളുണ്ട്. മയ്യിലിന്റെ കാർഷിക പാരമ്പര്യവും കാവുകളും കുളങ്ങളും പുഴയോട് ചേർന്ന് പുലിയഞ്ചിറ ശുദ്ധജല തടാകവും സഞ്ചാരികൾക്ക്‌ പുത്തൻ അനുഭവമാകും.