തിരുവനന്തപുരം : സംസ്ഥാനത്ത് ഫെബ്രുവരി 5 വരെ കോവിഡ് മൂലം മരിച്ച 55,600 പേരുടെയും അവകാശികൾക്ക് അടിയന്തര ധനസഹായമായ 50,000 രൂപ 15ന് മുൻപ് കൊടുത്തുതീർക്കാൻ സംസ്ഥാന സർക്കാർ നടപടി ആരംഭിച്ചു. മരിച്ചവരിൽ 44,578 പേരുടെ അവകാശികളുടെ പട്ടിക മാത്രമേ ഇതുവരെ അംഗീകരിച്ചിട്ടുള്ളൂ എന്നതിനാലും സഹായവിതരണത്തിന് കർശന നടപടികൾ സ്വീകരിക്കണമെന്ന് സുപ്രീം കോടതി ആവർത്തിച്ച് ആവശ്യപ്പെട്ട സാഹചര്യത്തിലുമാണിത്. കഴിഞ്ഞ ദിവസം റവന്യു അഡീഷനൽ ചീഫ് സെക്രട്ടറിയുടെ അധ്യക്ഷതയിൽ ചേർന്ന ഉന്നതതല യോഗത്തിനു ശേഷം ലാൻഡ് റവന്യു കമ്മിഷണർ പുതിയ നടപടിക്രമങ്ങൾ സംബന്ധിച്ച സർക്കുലറും പുറത്തിറക്കി. 

പ്രധാന തീരുമാനങ്ങൾ:

∙ കോവിഡ് ഡെത്ത് ഡിക്ലറേഷൻ നമ്പർ സമർപ്പിച്ചില്ലെന്ന ഒറ്റക്കാരണത്താൽ അപേക്ഷ നിരസിക്കരുത്.

∙ നമ്പർ ഇല്ലാത്ത അപേക്ഷകളിൽ വില്ലേജ് ഓഫിസർമാർ തന്നെ അപേക്ഷകരിൽനിന്ന് അപേക്ഷ വാങ്ങി ഹെൽത്ത് പോർട്ടലി‍ൽനിന്ന് നമ്പർ ശേഖരിച്ചു തുക പൂർണമായി നൽകിയെന്ന് ഉറപ്പാക്കണം.

∙ മരിച്ച വ്യക്തിയുടെ വിലാസം ലഭ്യമല്ലെങ്കിൽ ജനപ്രതിനിധികൾ, ആശാ വർക്കർമാർ എന്നിവരുടെ സഹായത്തോടെയും ക്യാംപുകൾ സംഘടിപ്പിച്ചും പത്രപ്പരസ്യം നൽകിയും കണ്ടെത്തണം. സഹായത്തിന് അപേക്ഷിക്കാത്തവരെയും ഇതേ മാർഗത്തിൽ കണ്ടെത്തി അപേക്ഷ സമർപ്പിക്കാൻ നടപടിയെടുക്കണം. 

∙ മറ്റു സംസ്ഥാനക്കാർ കേരളത്തിൽ മരിച്ച കേസുകളിൽ വിശദാംശങ്ങൾ ശേഖരിക്കേണ്ടത് കലക്ടർമാരാണ്. ആശ്രിതർ ആ സംസ്ഥാനങ്ങളിൽ സഹായം വാങ്ങിയിട്ടില്ലെന്ന് ഉറപ്പാക്കി തുക കൈമാറണം.

∙ ഓൺലൈനായി അപേക്ഷ സമർപ്പിക്കാനും പരിശോധിക്കാനും കഴിയാത്തവയിൽ, നേരിട്ട് അപേക്ഷ സ്വീകരിച്ച് മറ്റു നടപടികൾ പൂർത്തിയാക്കണം. ട്രഷറി ഇടപാട് മാത്രം ഓൺലൈനാക്കാം. 

∙ ഇരട്ടിപ്പായി വന്ന അപേക്ഷകൾ ഒഴികെയുള്ളവയിൽ ധനസഹായം ലഭിച്ചെന്ന് കലക്ടർമാർ ഉറപ്പാക്കണം.

∙ കോവിഡ് മൂലം മരിച്ചവരുടെ ഏത് ആശ്രിതരുടെ പേരിലും അപേക്ഷ സ്വീകരിക്കാം.

∙ അനാഥാലയങ്ങളിൽ മരിച്ചവർക്ക് അവകാശികൾ ഇല്ലെങ്കിൽ അതിന്റെ പട്ടിക കോടതിയിൽ സമർപ്പിക്കാനായി കലക്ടർമാർ പ്രത്യേകം തയാറാക്കണം.