ഇരിട്ടി : ആറളം ഫാം ഒന്നാം ബ്ലോക്കിലെ എട്ട്‌ തെങ്ങുകളുടെ ഉച്ചയിലെത്താൻ സിനേഷിന്‌ നൊടിയിട മതി. തളപ്പില്ലാതെ സിനേഷ്‌ കയർപ്പാലത്തിലൂടെ തെങ്ങിലേക്ക്‌ ‘നടന്ന്’ കയറുകയാണ്‌. തെങ്ങുകളിലേക്ക്‌ നൈ ലോൺ വടംകൊണ്ട്‌ കെട്ടി പാലംപോലുളള നടപ്പാത തീർത്താണ്‌ സിനേഷിന്റെ കള്ളുചെത്ത്‌. തെങ്ങുകൾ ഒന്നൊന്നായി കയറിയിറങ്ങിയുള്ള ചെ ത്ത്‌ സിനേഷ്‌ ഉപേക്ഷിച്ചിട്ട്‌ 12 വർഷമായി. 32 വയസുള്ള ആർ.പി. സിനേഷ്‌ 15 വർഷമായി ചെത്തുതൊഴിലിലുണ്ട്‌.
വിളക്കോട്‌ പാറക്കണ്ടത്തെ തെങ്ങുകളിൽ വടംകെട്ടിയാണ്‌ പരീക്ഷണം ആരംഭിച്ചത്‌. വീട്ടുകാരും കൂട്ടുകാരും വിലക്കിയെങ്കിലും സിനേഷ്‌ സാഹസിക പരീക്ഷണം തുടർന്നു. തൊഴിൽ ആറളം ഫാമിലേക്ക്‌ മാറിയപ്പോഴും പുതിയ രീതി പ്രയോഗിച്ചു. രണ്ടുകൊല്ലമായി ഫാമിലും ഈ രീതിയിലാണ്‌ ചെത്ത്‌. പുലർച്ചെയും ഉച്ചക്കും സന്ധ്യയയ്‌ക്കും എട്ട്‌ തെങ്ങുകളിലേക്ക്‌ കയർപാലത്തിലൂടെ നടന്നുനീങ്ങുകയാണ്‌. 

കാട്ടാന ചിന്നം വിളിച്ചെത്തി തെങ്ങ്‌ കുത്തി മറിച്ചിടാൻ ശ്രമിച്ചാലും നൈ ലോൺ വടത്തിന്റെ കെട്ടിൽ ബലപ്പെട്ട പ്രതിരോധമുണ്ട്‌ സിനേഷിനും തെങ്ങിനും. കാട്ടിലെ കാഴ്‌ചകൾ കണ്ട്‌ ആസ്വദിച്ചാണ്‌ ജോലിചെയ്യുന്നതെന്ന്‌ സിനേഷ്‌ പറയുന്നു. കഴിഞ്ഞ ദിവസം കാട്ടാന ആക്രമണത്തിൽ ചെത്തുതൊഴിലാളി പാണലാട്ടെ റിജേഷ്‌ ഇവിടെയാണ്‌ കൊല്ലപ്പെട്ടത്‌. 

ശരാശരി മുപ്പത്‌ ലിറ്റർ കള്ള്‌ പ്രതിദിനം വിളക്കോട്‌ ഷാപ്പിൽ അളക്കുന്നുണ്ട്‌. അമ്പത്‌ കിലോ നൈലോൺ ഒറ്റക്കയറാണ്‌ തെങ്ങുകൾക്ക്‌ പാലമായത്‌. ഇവിടെ സിനേഷിന്റെ ഏറുമാടവുമുണ്ട്‌. ഊർപ്പാലിലാണ്‌ വീട്‌. ഇരിട്ടി കൂളിച്ചെമ്പ്രയിലെ രഗിനയാണ്‌ ഭാര്യ. രണ്ട്‌ മക്കളുണ്ട്‌. നാലാം വയസ്‌ തൊട്ട്‌ വെളുപ്പിന്‌ പത്രം വിതരണം ചെയ്യുന്ന പതിവ്‌ സിനേഷ്‌ തുടരുന്നു. ദേശാഭിമാനി കാക്കയങ്ങാട്‌ ഏജന്റ്‌ ആർ.പി. വിജയന്റെ മകനാണ്‌. ഫോൺ: 9847395211.