പരിയാരം : മരങ്ങളുടെ പച്ചപ്പിനുതാഴെ സിമന്റ്‌ ബെഞ്ചുകളിൽ സായിപ്പന്മാരുടെ സായാഹ്ന വിശ്രമം. സൊറ പറഞ്ഞിരിക്കുന്നവരിൽ ഉന്നത ഉദ്യോഗസ്ഥരുമുണ്ട്‌. പരിയാരത്തെ കണ്ണൂർ ഗവ. മെഡിക്കല്‍ കോളേജിലെ വിസ്മൃതിയിലാവുന്ന രാജാജി പാര്‍ക്കിന്‌ ഇങ്ങനെ ഒരു ഭൂതകാലമുണ്ട്‌. 1953 നവംബര്‍ 22 നാണ് മദ്രാസ് മുഖ്യമന്ത്രി സി. രാജഗോപാലാചാരി പരിയാരം ടി.ബി. സാനിറ്റോറിയം ഉദ്ഘാടനംചെയ്തത്. അന്ന് അദ്ദേഹം ഉദ്ഘാടനം പ്രസംഗം നടത്തിയ വേദിയാണ്‌ ഇപ്പോഴും നാട്ടുകാർക്ക് രാജാജി പാർക്ക്.

നാല്‍പ്പതുകളില്‍ ക്ഷയരോഗത്തിന്‌ മലബാര്‍ ജില്ലയിൽനിന്നുള്ളവർ ചികിത്സ തേടിയത് മദ്രാസ് സംസ്ഥാനത്തെ ഈ-റോഡ് പെരുന്തുറൈ രാമലിംഗം ടി.ബി. സാനിറ്റോറിയത്തിലായിരുന്നു. മലബാറില്‍നിന്നും ധാരാളം പേർ ഈ-റോഡ് റെയില്‍വേ സ്‌റ്റേഷനിലേക്ക്‌ ടിക്കറ്റെടുക്കുന്നത് സംബന്ധിച്ച അന്വേഷണമാണ് ഇവിടെ ക്ഷയരോഗികളുടെ വര്‍ധനയെക്കുറിച്ച് ബോധ്യപ്പെടുത്തിയത്. മലബാര്‍ ജില്ലയില്‍ ടി.ബി. സാനിറ്റോറിയം തുടങ്ങാനുള്ള ആലോചനകള്‍ ആരംഭിച്ചതും ഇങ്ങനെ.

1942 ലാണ് ഇതിനുള്ള ശ്രമം ആരംഭിച്ചത്. ആശുപത്രി പണിയാന്‍ ഉദാരമതികളുടെ സഹായം തേടണമെന്ന്‌ മദ്രാസ് പ്രസിഡന്‍സി നിര്‍ദേശിച്ചു. അന്നത്തെ ഗവര്‍ണര്‍ ആര്‍തര്‍ ഓസ്വാള്‍ഡ് ജെയിംസ് ഹോപ്പ് എല്ലാ സഹായവും ഉറപ്പുനല്‍കിയെങ്കിലും പണം സ്വരൂപിക്കുന്നതില്‍ ആരോഗ്യവകുപ്പ് പരാജയപ്പെട്ടു. 1946 ല്‍ ചുമതലയേറ്റ അവസാന ഗവര്‍ണര്‍ സര്‍ ആള്‍ക്ക് ബാള്‍ഡ് എഡ്വേര്‍ഡ് നൈ മലബാറിലെ ടി.ബി. സാനിട്ടോറിയത്തിന് എല്ലാവിധ പിന്തുണയും നല്‍കി. സാമൂഹ്യ പ്രവര്‍ത്തകയായ അദ്ദേഹത്തിന്റെ ഭാര്യ ലേഡി നൈ തന്നെ ഇതിനായി രംഗത്തിറങ്ങി.
സാമുവൽ ആറോണാണ് സ്ഥലം നൽകിയത്. മലബാറില്‍ അന്ന് 35,000 ക്ഷയരോഗികള്‍ ഉണ്ടായിരുന്നതായാണ് കണക്ക്. 1948 ആഗസ്ത് ഏഴിനാണ് ലേഡി നൈ സാനിറ്റോറിയത്തിന് തറക്കല്ലിട്ടത്. നിര്‍മാണം പൂര്‍ത്തിയാക്കാൻ അഞ്ച്‌ വര്‍ഷമെടുത്തു. ഒമ്പത്‌ വാര്‍ഡുകള്‍, ഒ.പി. ആൻഡ്‌ അഡ്മിനിസ്‌ട്രേഷന്‍, ഓപ്പറേഷന്‍ തിയറ്റര്‍, മോര്‍ച്ചറി, ശ്മശാനം എന്നിവ സാനിറ്റോറിയത്തിലുണ്ടായിരുന്നു. 2,17,900 രൂപ സര്‍ക്കാരില്‍നിന്നും ഗ്രാന്റായി ലഭിച്ചു.

കോഴിക്കോട് എം.എസ്. സുബ്ബലക്ഷ്മിയുടെ ഗാനമേള നടത്തിയും പൊതുജന സംഭാവനയായുമാണ്‌ തുക സമാഹരിച്ചത്. ഉദ്ഘാടനത്തിന് രാജാജിയെ കൊണ്ടുവരണമെന്നത് സാമുവല്‍ ആറോണിന്റെ താല്‍പ്പര്യമായിരുന്നു. കുടിവെള്ള ടാങ്കിന് സമീപമാണ് അര്‍ധവൃത്താകൃതിയില്‍ രാജാജിക്കായി പ്രസംഗപീഠം പണിതത്. അയ്യായിരത്തോളം പേര്‍ രാജാജിയെ കാണാനെത്തിയതായി ആശുപത്രിയിലെ ആദ്യകാല ജീവനക്കാരനായിരുന്ന കണ്ണന്‍ പറയുന്നു. ആദ്യ സൂപ്രണ്ടായിരുന്ന ഡോ.അറുമുഖത്തിന്റെ താല്‍പ്പര്യപ്രകാരമാണ് രാജാജി പ്രസംഗിച്ച സ്ഥലം രാജാജി പാര്‍ക്കായി മാറ്റിയത്. മദ്രാസ് സംസ്ഥാനത്ത്‌ നിന്നുള്ളവരായിരുന്നു ജീവനക്കാരിൽ ഏറെയും. അവര്‍ക്ക് സയായാഹ്നം ചെലവഴിക്കാൻ പണിത പാര്‍ക്ക് പിന്നീട് കാടുമൂടി വിസ്മൃതമായി.