കണ്ണൂർ : ജില്ലയിൽനിന്ന് ശേഖരിക്കുന്ന ഖര-ജൈവ മാലിന്യങ്ങൾ സംസ്കരിക്കുന്നതിന് ജില്ലാ പഞ്ചായത്ത് സമഗ്ര പദ്ധതി ആവിഷ്കരിക്കുന്നു. വരുന്ന സാമ്പത്തിക വർഷത്തിൽ നടപ്പാക്കുന്ന പദ്ധതിയുടെ അടിസ്ഥാന സൗകര്യങ്ങൾ ഒരുക്കുന്നതിന് ധനകാര്യ കമ്മിഷൻ ഗ്രാൻറിൽനിന്ന് ഒരുകോടി രൂപ മാറ്റിവെച്ചു.

കക്കൂസ് മാലിന്യങ്ങൾ സംസ്കരിച്ച് ജൈവവളമാക്കി മാറ്റുന്നതും ക്ലീൻ കേരളാ കമ്പനിക്കുവേണ്ടി ഹരിത കർമസേന ശേഖരിക്കുന്ന പ്ലാസ്റ്റിക്ക് മാലിന്യങ്ങൾ സംസ്കരിച്ച് പുനരുപയോഗത്തിനുള്ള വസ്തുക്കളാക്കുന്നതിനുള്ള പ്ലാന്റുകൾ സ്ഥാപിക്കലുമാണ് ഇതിൽ പ്രധാനം.

പ്ലാന്റുകൾ സ്ഥാപിക്കുന്നതിന് ഭൂമി കണ്ടെത്തി. കക്കൂസ് മാലിന്യങ്ങൾ ശാസ്ത്രീയമായി സംസ്കരിച്ച് ജൈവവളമാക്കി മാറ്റുന്ന പ്ലാന്റ് ജില്ലയിൽ ആദ്യമായാണ് സ്ഥാപിക്കുന്നത്. തിരുവനന്തപുരത്ത് നടപ്പാക്കിയതും വയനാട്ടിൽ നിർമാണം നടക്കുന്നതുമായ പ്ലാന്റുകളുടെ മാതൃകയിലാണ് ജില്ലയിലും സ്ഥാപിക്കാൻ ഉദ്ദേശിക്കുന്നത്. കൽപ്പറ്റ നഗത്തിനടുത്തുള്ള വെള്ളാരംകുന്നിലാണ് പ്ലാന്റ് സ്ഥാപിക്കുന്നത്.

രഹസ്യമായി പ്രവർത്തിക്കുന്ന ചില ക്വട്ടേഷൻ സംഘങ്ങൾ വൻ തുക കൈപ്പറ്റി സ്വകാര്യ സ്ഥാപനങ്ങളിൽനിന്നും ഫ്ലാറ്റുകളിൽനിന്നും ശേഖരിക്കുന്ന കക്കൂസ് മാലിന്യങ്ങൾ പൊതുസ്ഥലങ്ങളിലും ജലാശയങ്ങളിലും തള്ളുന്നതുമൂലമുള്ള സാമൂഹിക-പാരിസ്ഥിതിക പ്രശ്നങ്ങൾക്ക് പരിഹാരം കണ്ടെത്തുന്നതിനാണിത്.

വൻ നഗരങ്ങളിൽ നേരത്തെ നടപ്പാക്കിവരുന്നതാണ് ഇത്തരം പ്ലാന്റുകൾ. കക്കൂസ് മാലിന്യങ്ങൾ വലിയ സംഭരണികളിൽ ശേഖരിക്കുകയും പ്രത്യേകം ബാക്ടീരിയകളെ വളർത്തി മാലിന്യങ്ങളെ വിഘടിപ്പിച്ച് ജൈവവളമാക്കുന്നതാണ് ആധുനിക പ്ലാന്റിന്റെ രീതി. യാതൊരു പാരിസ്ഥിതിക പ്രശ്നങ്ങളും സൃഷ്ടിക്കാത്തതാണ് പ്ലാന്റ്. ചാണകപ്പൊടിപോലെ വളമായി ഉപയോഗിക്കാം.

ജില്ലയിൽ ഒരുമാസത്തിൽ ഏകദേശം രണ്ടായിരത്തോളം ടൺ മാലിന്യങ്ങൾ ഉണ്ടാവുന്നുണ്ടെന്നാണ് ഏകദേശ കണക്ക്. ഹരിത കർമസേന കഴിഞ്ഞമാസം ജില്ലയിലെ 66 ഗ്രാമപ്പഞ്ചായത്തുകളിൽനിന്നും രണ്ട് നഗരസഭകളിൽനിന്നും ശേഖരിച്ച ഖരമാലിന്യങ്ങളുടെ അളവ് ഇങ്ങിനെ:

പുനരുപയോഗത്തിന് പറ്റുന്ന പ്ലാസ്റ്റിക്ക് 60 ടൺ, ഗുണം കുറഞ്ഞ പ്ലാസ്റ്റിക്ക് മാലിന്യങ്ങൾ 50 ടൺ, പഴയ ചെരുപ്പുകൾ 863 ടൺ. പൊളിഞ്ഞ കുപ്പികൾ 64 ടൺ. പഴയ തുണികൾ 69 ടൺ. ഇലക്ടോണിക്ക് മാലിന്യങ്ങൾ 11 ടൺ.

ജില്ലയിലെ ഏഴ് നഗരസഭകളിൽനിന്നും കണ്ണൂർ കോർപ്പറേഷനിൽനിന്നും അഞ്ച് ഗ്രാമപ്പഞ്ചായത്തുകളിൽനിന്നും മാലിന്യങ്ങൾ ശേഖരിക്കുന്നത് സ്വകാര്യ ഏജൻസികളാണ്.

ഗുണമുള്ള പ്ലാസ്റ്റിക്ക് മാലിന്യങ്ങൾ സംസ്കരിച്ച് കസേര ഉൾപ്പെടെയുള്ള വസ്തുക്കളാക്കി മാറ്റും. ഗുണംകുറഞ്ഞവ പൊടിച്ച് ടാറിൽ ചേർക്കും. ചെരുപ്പുകളും മറ്റും സിമന്റ് കമ്പനികൾക്ക് ഇന്ധനമാക്കാനാണ് കൊണ്ടുപോകുന്നത്. കുപ്പിച്ചില്ലുകൾ വീണ്ടും ഗ്ലാസുകളും മറ്റും ഉണ്ടാക്കാൻ ഉപയോഗിക്കുന്നു. പഴയ തുണികളിൽ ഗുണമുള്ളവ കുറഞ്ഞ വിലക്ക് വിൽക്കും.

പഴയ സാധനങ്ങൾ ഇവിടെത്തന്നെ സംസ്കരിക്കാൻ സാധിച്ചാൽ അവ വിലകൊടുത്ത് വാങ്ങാൻ സാധിക്കുമെന്നും പഴയ സാധനങ്ങൾക്ക് വില കിട്ടുന്ന സ്ഥിതിവന്നാൽ  ഇത്തരം വസ്തുക്കൾ കൂടുതൽ ലഭിക്കുമെന്നും ജില്ലാ പഞ്ചായത്ത് പ്രസിഡന്റ് പി.പി.ദിവ്യ പറഞ്ഞു.