കണ്ണൂർ: മൃഗാസ്പത്രികളിൽ വേണ്ടത്ര ഡോക്ടർമാരില്ലാത്തതിനാൽ കൃഷിക്കാർ ബുദ്ധിമുട്ടുന്നു. ഏറ്റവും കൂടുതൽ പ്രയാസമനുഭവിക്കുന്നത് മലയോര മേഖലകളിലെ ക്ഷീരകർഷകരാണ്. ജില്ലാ മൃഗാസ്പത്രിയടക്കം ജില്ലയിലെ 90 ക്ലിനിക്കുകളിൽ വേണ്ടത് 105 ഡോക്ടർമാർ. നിലവിലുള്ളത് 79 പേർ. ഒഴിവുകളുടെ എണ്ണം 26. ഇരിട്ടി, ഉളിക്കൽ, കാക്കയങ്ങാട്, തില്ലങ്കേരി എന്നീ സമീപ മൃഗാസ്പത്രികളിലൊന്നും ഡോക്ടർമാരില്ല.

ചിലർക്ക് രണ്ട് മൃഗാസ്പത്രികളുടെ അധികച്ചുമതല നൽകിയതിനാൽ ഒരിടത്തും കൃത്യമായി ജോലിചെയ്യാൻ കഴിയാത്ത സ്ഥിതിയാണ്. ജില്ലാ ആസ്പത്രിയിൽ ചികിൽസിക്കാൻ കൊണ്ടുവരുന്നതിൽ അധികവും പട്ടികളും പൂച്ചകളും പക്ഷികളുമായിരിക്കും. എന്നാൽ, മലയോരങ്ങളിൽ പശുക്കളും എരുമകളും പന്നികളുമായിരിക്കും. പശുക്കൾക്ക് പ്രവസസംബന്ധമായ പ്രശ്നങ്ങളുണ്ടാവുമ്പോഴാണ് ഡോക്ടർമാരുടെ സേവനം കിട്ടാതെ കൃഷിക്കാർ ഏറെ ബുദ്ധിമുട്ടുന്നത്. ആളില്ലാത്തത് കാരണം ജില്ലയിലൊരിടത്തും ഡോക്ടർമാരുടെ രാത്രികാല സേവനം ലഭിക്കാത്ത സ്ഥിതിയുമുണ്ട്.

11 ബ്ലോക്ക് കേന്ദ്രങ്ങളിലെ ആസ്പത്രികളിൽ രാത്രികാല സേവനം നടത്തുന്നതിന് സന്നദ്ധരായ ഡോക്ടർമാരെ അഭിമുഖത്തിന് വിളിച്ചിരുന്നെങ്കിലും അഞ്ചുപേർ മാത്രമേ എത്തിയിരുന്നുള്ളൂ. കൃഷിക്കാരുടെ വീടുകളിൽപ്പോയി ജോലിചെയ്യാൻ സന്നദ്ധതയുള്ളവർക്ക് താമസിക്കാനുള്ള സൗകര്യവും ചെയ്തുകൊടുക്കും. പി.എസ്.സി. പരീക്ഷയ്ക്ക് തയ്യാറെടുത്തുകൊണ്ടിരുന്ന സമയത്തായതിനാലാണ് ഡോക്ടർമാർ അഭിമുഖത്തിനെത്താതിരുന്നതെന്നാണ് പറയപ്പെടുന്നത്. എംപ്ലോയ്‌മെന്റ് എക്സ്‌ചേഞ്ചുവഴി ഈ ഒഴിവുകൾ നികത്താൻ ശ്രമിച്ചുവരികയാണെന്ന് അധികൃതർ പറഞ്ഞു. തദ്ദേശ സ്ഥാപനങ്ങളുടെ സാമ്പത്തികവർഷം പൂർത്തിയാവാൻ രണ്ടുമാസം മാത്രമേ ബാക്കിയുള്ളൂ. ഈ സമയത്തിനുള്ളിൽ മൃഗഡോക്ടർമാരുടെ ഒഴിവുകൾ നികത്തിയില്ലെങ്കിൽ മൃഗസംരക്ഷണവുമായി ബന്ധപ്പെട്ട ജോലികളുടെ താളംതെറ്റും.