ഏറ്റുമാനൂർ : ഡൽഹി ആസ്ഥാനമായ അനുഗ്രഹ ചാരിറ്റബിൾ സൊസൈറ്റിയുടെ മറവിൽ സാമ്പത്തിക തട്ടിപ്പ് നടത്തിയ യുവാവ് പൊലീസ് പിടിയിൽ. സൊസൈറ്റിയുടെ ഏറ്റുമാനൂർ തെള്ളകം യൂണിറ്റ് ചെയർമാൻ പാലാ കരൂർ പുളിക്കൽ ഹൗസ് റോയി ജോസഫിനെയാണ് (39) ഏറ്റുമാനൂർ പൊലീസ് അറസ്റ്റ് ചെയ്തത്. ‌ പട്ടിത്താനം – മണർകാട് ബൈപാസിൽ സ്ഥിതി ചെയ്യുന്ന സ്വകാര്യ പെട്രോൾ പമ്പിൽ നിന്ന് സൊസൈറ്റിയുടെ പേരിൽ മുൻകൂറായി പെട്രോൾ, ഡീസൽ എന്നിവ വാഹനങ്ങളിൽ അടിച്ചശേഷം പണം നൽകാതെ കബളിപ്പിച്ചെന്ന പമ്പ് ഉടമയുടെ പരാതിയുടെ അടിസ്ഥാനത്തിലാണ് ഏറ്റുമാനൂർ പൊലീസ് റോയി ജോസഫിനെതിരെ കേസ് രജിസ്റ്റർ ചെയ്തത്.

കഴിഞ്ഞ ജനുവരിയിൽ റോയി ജോസഫ് പമ്പിൽ എത്തുകയും പമ്പ് ഉടമയെ കണ്ട് ചാരിറ്റബിൾ സൊസൈറ്റിയുടെ പ്രവർത്തനങ്ങളെക്കുറിച്ച് പറഞ്ഞ് വിശ്വസിപ്പിച്ചശേഷം മുൻകൂറായി ചെക്കും ലെറ്റർ പാഡും നൽകി 2.26 ലക്ഷം രൂപയുടെ പെട്രോളും ഡീസലും വിവിധ വാഹനങ്ങളിൽ നിറച്ച ശേഷം നാടുവിട്ടു. ഒട്ടേറെ തവണ പമ്പ് ഉടമ ഫോണിൽ ബന്ധപ്പെടാൻ ശ്രമിച്ചെങ്കിലും റോയി ഫോൺ കട്ട് ചെയ്യുകയായിരുന്നു. ഇതിനെത്തുടർന്നാണ് പമ്പ് ഉടമ ഏറ്റുമാനൂർ സ്റ്റേഷനിൽ കേസ് രജിസ്റ്റർ ചെയ്തത്.

പയ്യന്നൂർ സ്വദേശിയുടെ പാലാ കൊഴുവനാലിലെ സ്ഥലവും വീടും വാടകയ്ക്ക് എടുത്തശേഷം വാടക നൽകാതെ കബളിപ്പിച്ച കേസുമായി ബന്ധപ്പെട്ട് ഇന്നലെ ഉച്ചയ്ക്ക് 12ന് പാലാ പൊലീസ് സ്റ്റേഷനിൽ റോയി എത്തിയെന്ന രഹസ്യ വിവരം ഏറ്റുമാനൂർ സ്റ്റേഷൻ ഹൗസ് ഓഫിസർ സി.ആർ. രാജേഷ് കുമാറിന് ലഭിച്ചു. ഇതിനെത്തുടർന്ന് പാലാ പൊലീസ് സ്റ്റേഷനിൽ എത്തിയ പൊലീസ് സംഘം റോയിയെ പിടികൂടുകയായിരുന്നു.