കണ്ണൂർ : കൊവിഡ് പ്രതിരോധം ശക്തമാക്കാന്‍ തിരുവനന്തപുരത്ത് തദ്ദേശസ്വയംഭരണ സ്ഥാപനങ്ങളും ആരോഗ്യ പ്രവര്‍ത്തകരെയും ഉള്‍പ്പെടുത്തി യോഗങ്ങള്‍ ചേരാന്‍ മന്ത്രി വി. ശിവന്‍കുട്ടിയുടെ നേതൃത്വത്തില്‍ ചേര്‍ന്ന യോഗത്തില്‍ തീരുമാനം. പി.എച്ച്.സി. കളും സി.എച്ച് സികളും ഇവനിംഗ് ഒ.പി. പുന:രാരംഭിക്കും. കൊവിഡ് പ്രതിരോധ വളണ്ടിയര്‍മാരുടെ ടീമിനെ വിപുലീകരിച്ച് ടീം ക്യാപ്റ്റന്റെ പേരും മൊബൈല്‍ നമ്പറും തഹസീല്‍ദാരുടെ ഓഫീസ് ജില്ലാ കളക്ടറേറ്റിലെ കണ്ട്രോള്‍ റൂം തുടങ്ങിയവയ്ക്ക് കൈമാറണം. ടീം അംഗങ്ങള്‍ മാനദണ്ഡങ്ങള്‍ പാലിച്ച് ഗൃഹസന്ദര്‍ശനം നടത്തണം. 

തദ്ദേശഭരണസ്ഥാപനങ്ങള്‍ ഹെല്‍പ്പ് ഡെസ്‌ക് ആരംഭിക്കണം. ആംബുലന്‍സ് ക്രമീകരണം ഉറപ്പുവരുത്തണം. ഡി.സി.സി, സി.എഫ്.എല്‍.ടി.സി സംവിധാനങ്ങള്‍ ആവശ്യമെങ്കില്‍ ഒരുക്കാന്‍ സജ്ജമാകണം. തദ്ദേശ ഭരണസ്ഥാപനങ്ങള്‍ പൊലീസുമായി ചേര്‍ന്ന് പ്രവര്‍ത്തിക്കണം. ഡോക്ടര്‍മാര്‍ അടക്കമുള്ള ആരോഗ്യപ്രവര്‍ത്തകരെ വിന്യസിക്കുമ്പോള്‍ ഗ്രാമീണ-ആദിവാസി മേഖലകള്‍ക്ക് വേണ്ട പരിഗണന ഉറപ്പുവരുത്തണം. മരുന്ന് ലഭ്യത ഉറപ്പുവരുത്താന്‍ ഡി.എം.ഒ.തലത്തില്‍ ശ്രദ്ധ വേണം 

പ്രധാന ആശുപത്രികളില്‍ ഫ്രന്റ് ഡെസ്‌ക് സംവിധാനം ആരംഭിക്കണം. ആശുപത്രികളില്‍ തദ്ദേശ സ്വയംഭരണ സ്ഥാപന പ്രതിനിധികള്‍ക്ക് ബന്ധപ്പെടാന്‍ പ്രത്യേക നമ്പര്‍ സജ്ജീകരിക്കണം. കൊവിഡുമായി ബന്ധപ്പെട്ട് മരണാനന്തര ധനസഹായം അര്‍ഹതപ്പെട്ടവര്‍ക്ക് ലഭിക്കുന്നുവെന്ന് ഉറപ്പുവരുത്താന്‍ തദ്ദേശ സ്വയംഭരണസ്ഥാപനങ്ങള്‍ നടപടി സ്വീകരിക്കണം. മന്ത്രിമാരായ ജി.ആര്‍. അനില്‍, ആന്റണി രാജു, എം.എല്‍.എ.മാര്‍, തദ്ദേശ സ്വയംഭരണ പ്രതിനിധികള്‍, കളക്ടറേറ്റിലെ ഉദ്യോഗസ്ഥര്‍, ഡി.എം.ഒ, ജില്ലയിലെ പൊലീസ് മേധാവികള്‍ തുടങ്ങിയവര്‍ യോഗത്തില്‍ പങ്കെടുത്തു.