കേളകം: ഹോട്ടലിൽ നിന്ന് പാർസൽ വാങ്ങിയ ബിരിയാണി പഴകിയതെന്ന് പരാതി. സംഭവം ആരോഗ്യ വകുപ്പ് ഇൻസ്പെക്ടറോട് പരാതി പെട്ടിട്ടും നടപടിയെടുത്തില്ലെന്നും ആക്ഷേപം.മണത്തണ സ്വദേശിയും പരിസ്ഥിതി പ്രവർത്തകനുമായ എ.എച്ച് നിഷാദാണ് കേളകത്തെ നോവ ഹോട്ടലിനെതിരെ പഞ്ചായത്ത് സെക്രട്ടറിക്ക് പരാതി നല്കിയത്.

പാർസൽ വാങ്ങിയ മൂന്ന് ബിരിയാണിയും പഴകിയതാണെന്ന് കണ്ടതോടെ ആരോഗ്യ വകുപ്പധികൃതരെ വിവരം അറിയിക്കുകയായിരുന്നു. എന്നാൽ കേളകം ഹെൽത്ത് ഇൻസ്പെക്ടർ സി.വി.ജയകൃഷ്ണൻ  ഹോട്ടലിൽ പരിശോധന നടത്തി പഴകിയ ഭക്ഷണം കണ്ടെടുത്തിട്ടും നടപടി സ്വീകരിച്ചില്ലെന്നാണ് ആക്ഷേപം.

നിഷാദിൻ്റെ കൈവശമുണ്ടായിരുന്നതോ ഹോട്ടലിൽ നിന്ന് കണ്ടെടുത്ത ഭക്ഷണമോ കസ്റ്റഡിയിലെടുത്ത് സാംപിൾ പരിശോധനക്കയക്കാൻ ഹെൽത്ത് ഇൻസ്പെക്ടർ തയ്യാറായില്ല. പകരം, ഹോട്ടലിൽ നിന്ന് കണ്ടെടുത്ത പഴകിയ ഭക്ഷണം നശിപ്പിച്ച് മറ്റു നടപടികൾക്ക് മുതിരാതെ തിരിച്ചു പോവുകയും ചെയ്തു.

ഇക്കാര്യം ഹെൽത്ത് ഇൻസ്പെക്ടറോട് ചോദിച്ചപ്പോൾ വാക്സിനേഷൻ ദിവസമായതിനാൽ തിരക്കാണെന്നും നടപടിയെടുക്കാൻ സാധിച്ചില്ലെന്നുമായിരുന്നു മറുപടി. പഴകിയ ഭക്ഷണം വില്ലന നടത്തിയ സ്ഥാപനത്തിനെതിരെ പേരിനു പോലും നടപടി സ്വീകരിക്കാതെയും പൊതു പ്രവർത്തകൻ കൂടിയായ നിഷാദിൻ്റെ പരാതി അവഗണിക്കുകയും ചെയ്ത ഹെൽത്ത് ഇൻസ്പെക്ടർക്കെതിരെ വ്യാപക പ്രതിഷേധമുയർന്നിട്ടുണ്ട്.നിഷാദിനെ ഹോട്ടലുടമ ഭീഷണിപ്പെടുത്തിയതായും പരാതിയുണ്ട്. കേളകം പോലീസിലും ജില്ലാ മെഡിക്കൽ ഓഫീസർക്കും ഫുഡ് & സേഫ്റ്റി ഉദ്യോഗസ്ഥർക്കും നിഷാദ് പരാതി നല്കിയിട്ടുണ്ട്.