തിരുവനന്തപുരം : ശുദ്ധജല, സുവിജ് കണക‍്ഷനുകൾ ഓൺലൈൻ വഴി നൽകാൻ ജല അതോറിറ്റി തീരുമാനം. ഇതിനായി ഇ–ടാപ്പ് സോഫ്‍റ്റ്‍വെയർ സജ്ജമാക്കി. പുതിയ കണക‍്ഷൻ എടുക്കുന്നതിന് ജല അതോറിറ്റിയുടെ അംഗീകൃത പ്ല‍മർമാരും ചില ഉദ്യോഗസ്ഥരും ഉപയോക്താക്കളിൽ നിന്ന് വൻ തുക ഈടാക്കുന്നതായുള്ള പരാതിയെത്തുടർന്നാണ് പുതിയ സംവിധാനം.

നിലവിൽ ശുദ്ധജല കണ‍ക‍്ഷന് അംഗീകൃത പ്ലംബർമാർ മുഖേന രേഖകൾ സഹിതം അപേക്ഷിക്കണം. പുതിയ കണക‍്ഷന് കുറഞ്ഞത് 4500 രൂപ (അതോറിറ്റി നിശ്ചയിച്ച ഫീസ്, വാട്ടർ മീറ്റർ, പൈപ്പ്, തൊഴിലാളികളുടെ കൂലി എന്നിവ ഉൾപ്പെടെ) ചെലവുണ്ട്. നടപടികളുടെ പുരോഗതിയും അപേക്ഷയുടെ തൽസ്ഥിതിയുമെല്ലാം ഉപയോക്താക്കൾക്ക് അറിയാനും കഴിയും. അതോറിറ്റിയുടെ ഐ.ടി. വിഭാഗമാണ് സോഫ്റ്റ്‍വെയർ സജ്ജമാക്കിയത്.

എങ്ങനെ അപേക്ഷിക്കാം?

ജല അതോറിറ്റി വെബ്സൈറ്റിലൂടെ(www.kwa.kerala.gov.in) പ്രത്യേക യൂസർ അക്കൗണ്ട് സൃഷ്ടിച്ചാണ് അപേക്ഷിക്കേണ്ടത്. രേഖകളും അപ്‍ലോഡ് ചെയ്യണം. നടപടി പൂർത്തിയാക്കുമ്പോൾ കൺസ്യൂമർ നമ്പറും ലഭിക്കും. ഓൺലൈൻ അപേക്ഷകളി‍ല്‍ ഉടൻ തീരുമാനമെടുത്ത് കണക‍്ഷൻ നൽകണമെന്നാണ് നിർദേശം. തിരുവനന്തപുരം, കോഴിക്കോട് എന്നിവിടങ്ങളിലെ 5 സെക‍്ഷൻ ഓഫിസുകൾക്ക് കീഴിൽ പരീക്ഷണാർഥം നടപ്പാക്കിയ സംവിധാനം വിജയ‍കരമെന്ന് കണ്ടതിനെ തുടർന്നാണ് സംസ്ഥാന വ്യാപക‍മാക്കുന്നത്. അംഗീകൃത പ്ലംബർമാരുടെ വിവരങ്ങൾ സോഫ്റ്റ്‍വെയറിൽ ഉൾപ്പെടുത്തിയ ശേഷമാകും സംവിധാനം നടപ്പാക്കുക.