കൂത്തുപറമ്പ് : വികസനപ്രവർത്തനങ്ങൾ പൂർത്തിയാക്കാതെ പാതിവഴിയിലിട്ടതിൽ പ്രതിഷേധവുമായി അമ്മാറമ്പ് പണിയ കോളനി നിവാസികൾ. കോളനിയിലെത്തിയ കെ.പി.മോഹനൻ എം.എൽ.എ.യോടാണ് പ്രയാസങ്ങൾ പങ്കുവെച്ചത്.

ഏറെ കാത്തിരിപ്പിനുശേഷമാണ് പാട്യം പഞ്ചായത്ത് പന്ത്രണ്ടാം വാർഡിൽപ്പെട്ട അമ്മാറമ്പ് ആദിവാസി കോളനി വികസനത്തിന് സർക്കാർ ഒരുകോടി രൂപ അനുവദിച്ചത്. പാട്യം പഞ്ചായത്ത് ഭരണസമിതിയും രാഷ്ട്രീയപാർട്ടികളും നിരന്തരം നടത്തിയ ശ്രമത്തെത്തുടർന്നായിരുന്നു 2017-18 വർഷത്തെ പട്ടികവർഗ വികസനവകുപ്പിന്റെ അംബേദ്കർ സെറ്റിൽമെൻറ് വികസന പദ്ധതിയിൽ ഉൾപ്പെടുത്തി ഫണ്ടനുവദിച്ചത്. കോളനിയിൽ ആകെയുള്ള 11 വീടുകളിൽ ഒൻപത് എണ്ണത്തിന്റെ നവീകരണവും ഒരുവീട് പുനർനിർമിക്കുന്നതുമായിരുന്നു പദ്ധതി. 

അതോടൊപ്പം കോളനിയിൽ കമ്യൂണിറ്റി ഹാൾ നിർമാണം, വാട്ടർ ടാങ്ക്, കിണർനവീകരണം, നടപ്പാത, തെരുവുവിളക്കുകൾ സ്ഥാപിക്കൽ എന്നിവയും പദ്ധതിയിൽ ഉൾപ്പെടുത്തിയിരുന്നു. എന്നാൽ അഞ്ചുവർഷമായിട്ടും വീട് നിർമാണം പൂർത്തിയായില്ലെന്നും കുടിവെള്ളത്തിന്റെയും നടപ്പാതയുടെയും കാര്യത്തിൽ നടപടിയുണ്ടായില്ലെന്നും കോളനി നിവാസികൾ പറഞ്ഞു. നവീകരിച്ചെന്ന് പറയുന്ന വീടുകളുടെ അവസ്ഥയും ദയനീയമാണ്. കൃത്യമായ ജനൽ പോലുമില്ലാതെയാണ് വീടുകൾ നവീകരിച്ചത്. വീടിന്റെ തേപ്പും പൂർത്തിയാക്കിയിട്ടില്ല.

നിരവധി പേർ താമസിക്കുന്ന വീടുകളിലെ കക്കൂസുകൾക്ക് വാതിൽ പോലുമില്ല. നവീകരണത്തിലെ പോരായ്മ ചൂണ്ടിക്കാട്ടി ആറു വീട്ടുകാർ വീട് നവീകരിക്കേണ്ടെന്ന് നേരത്തേ അറിയിച്ചിരുന്നു. തിരുവനന്തപുരം ആസ്ഥാനമായുള്ള കമ്പനിയാണ് നവീകരണ പ്രവൃത്തി ഏറ്റെടുത്തിരുന്നത്. കോളനി നിവാസികൾ പ്രശ്നം അധികൃതരുടെ ശ്രദ്ധയിൽപ്പെടുത്തിയതിനെത്തുടർന്നാണ് കെ.പി.മോഹനൻ എം.എൽ.എ. കോളനിയിലെത്തിയത്. എല്ലാ വീടുകളും സന്ദർശിച്ച് എം.എൽ.എ. പരാതികൾ കേട്ടു. തുടർന്ന് അവലോകനയോഗം ചേർന്നു. ഈ സാമ്പത്തികവർഷം തന്നെ കോളനിയിലെ മുഴുവൻ വികസനപദ്ധതികളും പൂർത്തീകരിക്കുമെന്ന് എം.എൽ.എ. പറഞ്ഞു. പാട്യം പഞ്ചായത്ത് പ്രസിഡൻറ് എൻ.വി. ഷിനിജ, പ്രോജക്ട് ഓഫീസർ എം.കെ. മഹറൂഫ്, ട്രൈബൽ ഓഫീസർ പി.കെ. സജിത, കെ. അജിത്ത്, ജോസഫ്, പി. മിനി, സുമിത്ര, പി. സുരേന്ദ്രൻ എന്നിവരും കോളനി നിവാസികളും യോഗത്തിൽ പങ്കെടുത്തു.