ഇരിട്ടി : കർഷകർക് വിതരണം ചെയ്യാനുള്ള വിത്തുകൾ പാകപ്പെടുത്തുന്നതിലും മാതൃകയാവുകയാണ് ആറളം കൃഷിഭവൻ. പഞ്ചായത്തിൽ നേരത്തെ അപേക്ഷ സ്വീകരിച്ച് തിരഞ്ഞെടുക്കപ്പെട്ട 1000 കുടുംബങ്ങൾ നൽകുന്നതിനുള്ള ഇഞ്ചി, മഞ്ഞൾ, ചേന, കാച്ചിൽ, ചേമ്പ് എന്നിവ വിതരണം ചെയ്യുന്നതിനാണ് വിത്തുകൾ പാകപ്പെടുത്തുന്നത്. ഗുണമേന്മ ഉറപ്പ് വരുത്താൻ പരമ്പരാഗത – ശാസ്ത്രീയ മാർഗങ്ങൾ ഒരേ സമയം സ്വീകരിച്ച് വിത്ത് ക്രമപ്പെടുത്തുന്ന പദ്ധതിക്ക്‌ തുടക്കം കുറിച്ചു. പുറമേ നിന്ന് വാങ്ങാതെ പഞ്ചായത്തിലെ മികച്ച 20ലധികം കർഷകരിൽ നിന്ന് വിപണി വിലയെക്കാൾ അധികം നൽകി സ്വീകരിച്ചതോടെ ഉൽപന്നങ്ങൾക്ക് പുതിയ വിപണന സാധ്യത ലഭിച്ചു.

ആറളം കൃഷിഭവന്റെ നേതൃത്വത്തിൽ വെളിമാനത്ത് പ്രവർത്തിക്കുന്ന ഇക്കോ ഷോപ്പ് വഴി ശേഖരിച്ച 5 ടൺ ഇഞ്ചി, 5 ടൺ മഞ്ഞൾ വിത്ത്, 3 ടൺ ചേന, കാച്ചിൽ, ചേമ്പ് എന്നിവയുടെ വിത്തുകളാണ് പാകപ്പെടുത്തുന്നത്.

ഗുണമേന്മ ഉറപ്പാക്കുന്നത്

കർഷകരിൽ നിന്ന് ശേഖരിച്ച ഇഞ്ചി, മഞ്ഞൾ എന്നിവ പരിപ്പുതോടിലുള്ള പച്ചക്കറി ക്ലസ്റ്ററിലെ സംഭരണ കേന്ദ്രത്തിലാണ് ശാസ്ത്രീയമായ രീതിയിൽ പരിചരണം നടത്തി ഗുണമേന്മയുള്ള വിത്തുകളാക്കി മാറ്റുന്നത്. ചാണക ലായനിയിൽ മാങ്കോസെബ്, കാർബന്റാ സിം തുടങ്ങിയ കുമിൾനാശിനി മരുന്നുകളും മലാത്തിയോൺ കീടനാശിനിയും ചേർത്ത് അതിൽ അര മണിക്കൂർ മുക്കി വെക്കുന്നു.      

പിന്നീടു തണലത്തിട്ട് ഉണക്കിയതിനു ശേഷം അറക്കപ്പൊടി വിതറി അതിനുമുകളിൽ വിത്ത് അടുക്കിവെച്ച് പാണൽ ഇല വെക്കുന്നു. ഇങ്ങനെ പല തട്ടുകളായാണ് വിത്തിനുവേണ്ടി സൂക്ഷിക്കുന്നത്. ഒരു മാസത്തിന് ശേഷം ഇവ വീണ്ടും എടുത്ത് കേട് വന്നത് മാറ്റും. അതിനുശേഷം ഗുണനിലവാരമുള്ള വിത്തുകൾ മാത്രം തിരഞ്ഞെടുത്ത് കർഷകർക്ക് വിതരണം ചെയ്യും.