തൃശൂർ: റേഷൻകടകൾ നടത്താൻ പൊതുജനത്തെ ക്ഷണിച്ച് സപ്ലൈകോ. ഓരോ ജില്ലകളിലും ഒഴിവുള്ള ന്യായവില കേന്ദ്രങ്ങളുടെ (റേഷൻകട) ലൈസൻസികളെ നിയമിക്കാൻ വിജ്ഞാപനം പുറപ്പെടുവിക്കാൻ റേഷനിങ് കൺട്രോളർ എല്ലാ സപ്ലൈ ഓഫിസർമാർക്കും നിർദേശം നൽകി. നിലവിൽ റേഷൻകടകൾ നടത്തുന്നവരോ അവരുടെ കുടുംബാംഗങ്ങളോ അപേക്ഷിക്കാൻ പാടില്ല. പൊതുജനത്തിനായാണ്‌ വിജ്ഞാപനമെങ്കിലും വനിതാ സ്വയം സഹായ സംഘങ്ങൾക്കും പട്ടികവിഭാഗക്കാർക്കും വ്യവസ്ഥകളിൽ ഇളവുണ്ട്. ലൈസൻസ് സറണ്ടർ ചെയ്തവ അടക്കം ഓരോ ജില്ലയിലും ചുരുങ്ങിയത് പത്തിലേറെ ഒഴിവുകളുണ്ടെന്നാണ്‌ സൂചന. 

യോഗ്യത

∙ അപേക്ഷകർ 21നും 62നും ഇടയിൽ പ്രായമുള്ളവരാകണം. പത്താം ക്ലാസ് പാസായിരിക്കണം. റേഷൻകട സ്ഥിതിചെയ്യുന്ന തദ്ദേശ സ്ഥാപന പരിധിയിൽ ചുരുങ്ങിയത് 3 വർഷമെങ്കിലും സ്ഥിരതാമസമുള്ളവരാകണം. അതേ വാർഡിലുള്ളവർക്ക് മുൻഗണന.

∙ കുറ്റകൃത്യങ്ങൾക്ക് ശിക്ഷ അനുഭവിച്ചവരാകരുത്. 

∙ ഫുൾടൈം–പാർട്ട് ടൈം സർക്കാർ ജീവനക്കാരനോ പൊതു–സഹകരണ മേഖലയിൽ ശമ്പളം പറ്റുന്നവരോ ആകരുത്.

വ്യവസ്ഥകൾ

∙ അപേക്ഷകന് 1 ലക്ഷം രൂപയിൽ കുറയാത്ത ട്രഷറി സ്ഥിര നിക്ഷേപം ഉണ്ടാകണം.

∙ സ്ത്രീകളുടെ സഹായസംഘങ്ങൾ, പട്ടികവിഭാഗക്കാർ എന്നിവർക്ക് 50,000 രൂപയുടെ നിക്ഷേപ സാക്ഷ്യം മതിയാകും.

∙ ഭക്ഷ്യധാന്യം സൂക്ഷിക്കാൻ കുറഞ്ഞത് 300 ചതുരശ്രയടി വിസ്തീർണമുള്ള കെട്ടിടം ഉണ്ടാകണം.