കൊച്ചി : സാങ്കേതിക പ്രശ്നങ്ങൾ മൂലം ഐ.ആർ.സി.ടി.സി മൊബൈൽ ആപ് വഴി ട്രെയിൻ ടിക്കറ്റ് ബുക്ക് ചെയ്യാൻ കഴിയുന്നില്ലെന്ന പരാതിക്ക് പരിഹാരം കാണാതെ റെയിൽവേ. ടിക്കറ്റ് ബുക്ക് ചെയ്യാൻ ശ്രമിച്ചാൽ പലപ്പോഴും പണം നഷ്ടപ്പെടുകയും ടിക്കറ്റ് കിട്ടുന്നില്ലെന്നുമാണു പരാതി. മാസാവസാനം ഒന്നിലധികം തവണ ടിക്കറ്റ് ബുക്ക് ചെയ്തു പരാജയപ്പെട്ടാൽ അക്കൗണ്ട് കാലിയാകും. പണം നഷ്ടപ്പെട്ടാൽ 5 മുതൽ 7 ദിവസം വരെയാണ്‌ കാശ് തിരികെ ലഭിക്കാൻ വേണ്ടി വരുന്നത്. ഒന്നിലധികം തവണ ലോഗിൻ ചെയ്യേണ്ടി വരിക, കാപ്ച (സുരക്ഷാ വാചക പരിശോധന) ശരിയായി നൽകിയാലും തെറ്റാണെന്ന് കാണിക്കൽ, പാതി വഴിയിൽ പേജ് അപ്രത്യക്ഷമാകൽ തുടങ്ങി ഒട്ടേറെ പ്രശ്നങ്ങളാണ്‌ യാത്രക്കാർ നേരിടുന്നത്. 

കൃത്യമായ ഐ.ഡിയും പാസ്‌വേഡും നൽകിയാൽ പോലും പലപ്പോഴും ലോഗിൻ സാധ്യമല്ലെന്ന് യാത്രക്കാരനായ ശാന്ത്‌ലാൽ പറയുന്നു. എങ്ങനെയെങ്കിലും ലോഗിൻ ചെയ്ത് ടിക്കറ്റ് എടുത്ത് പണമടച്ച് തിരികെ ഐ.ആർ.സി.ടി.സി പേജിൽ വരുമ്പോൾ പേജ് കാണില്ല. യു.പി.ഐ വഴിയുള്ള പേയ്മെന്റ് സംവിധാനം ഉപയോഗിക്കുമ്പോഴാണ്‌ ഈ പ്രശ്നം കൂടുതൽ. പലർക്കും ഒടിപി ലഭിക്കാത്തതും പ്രതിസന്ധി സൃഷ്ടിക്കുന്നു. കാപ്ച ക്ലിയർ അല്ലാത്തതും പ്രശ്നങ്ങളുണ്ടാക്കുന്നു. ഒ.ടി.പിയും കാപ്ചയും ആദ്യം നൽകുന്നത് പോരാഞ്ഞിട്ട് ടിക്കറ്റ് ബുക്ക് ചെയ്യുന്നതിന് തൊട്ടു മുൻപ് എൽ.ഐ.സിയുടെ പരസ്യങ്ങളും കാപ്ചയായി എഴുതി പഠിക്കണം.

പൂജ്യവും, O (ഒ) എന്ന ഇംഗ്ല‌ിഷ് അക്ഷരവും തമ്മിൽ സാമ്യമുള്ളതിനാൽ ഇത്തരം അക്ഷരങ്ങൾ കാപ്ചയിൽ നിന്ന് ഒഴിവാക്കണമെന്നും യാത്രക്കാർ ചൂണ്ടിക്കാട്ടുന്നു. ആപിൽ 90 ശതമാനം കൺഫേം സാധ്യതയുള്ള ടിക്കറ്റ് ബുക്ക് ചെയ്യാൻ പോയാൽ ബുക്ക് ചെയ്ത് വരുമ്പോഴേക്കും ടിക്കറ്റ് വെയ്റ്റ് ലിസ്റ്റാകും. കോവിഡ് പശ്ചാത്തലത്തിൽ കൂടുതൽ ട്രെയിനുകളിൽ റിസർവേഷൻ നിർബന്ധമാക്കിയെങ്കിലും അതിന് അനുസരിച്ച് സെർവർ ശേഷിയും മറ്റും കൂട്ടാൻ ഐ.ആർ.സി.ടി.സി തയാറായിട്ടില്ലെന്നാണ് ആക്ഷേപം. ആപ്പും വെബ്സൈറ്റും ചതിക്കുന്നതിനാൽ ഇപ്പോൾ കൗണ്ടർ വഴിയാണ് ടിക്കറ്റ് എടുക്കുന്നതെന്ന് സ്ഥിരം യാത്രക്കാർ പറയുന്നു. ഡിജിറ്റൽ ഇന്ത്യ പ്രഖ്യാപനത്തിന്റെ ചുവടു പിടിച്ച് ഓൺലൈൻ ടിക്കറ്റ് വിൽപന കൂട്ടേണ്ട റെയിൽവേ യാത്രക്കാരെ വീണ്ടും കൗണ്ടറുകളിൽ കൊണ്ടു നിർത്തുകയാണ്.