എ.ഐ.സി.ടി.ഇ.യുടെ (www.aicte-india.org) പി.ജി. സ്കോളർഷിപ്പിന് https://pgscholarship.aicte-india.org എന്ന സൈറ്റിൽ ജനുവരി 31 വരെ ഓൺലൈൻ അപേക്ഷ സമർപ്പിക്കാം.

പ്രവേശന സമയത്ത് GATE/ GPAT/ CEED ഇവയൊന്നിലെ യോഗ്യതയോടെ എ.ഐ.സി.ടി.ഇ അംഗീകാരമുള്ള ഫുൾ–ടൈം പിജി പ്രോഗ്രാമുകളിൽ പഠിക്കുന്നവർക്ക് മാസം 12,400 രൂപ വീതം 24 മാസംവരെ സ്കോളർഷിപ് ലഭിക്കും. എം.ഇ, എം-ടെക്, എം-ആർക്, എം-ഫാം, എം-ഡിസൈൻ പ്രോഗ്രാമുകളാകും പരിഗണിക്കുക. ‍ഡ്യൂവൽ ഡിഗ്രി പ്രോഗ്രാമുകളിൽ അവസാനത്തെ ഒരു വർഷം മാത്രമേ സഹായമുള്ളൂ. ഇത് ലഭിക്കാൻ 8/10 എങ്കിലും ഗ്രേഡ് പോയിന്റ് ആവറേജ് നേടിയിരിക്കണം. 

സ്കോളർഷിപ് വാങ്ങുന്നവർ പരമാവധി അവധി സംബന്ധിച്ച നിയമങ്ങൾ പാലിക്കണം. മറ്റേതെങ്കിലും സ്ഥാപനങ്ങളിൽ നിന്ന് സാമ്പത്തിക സഹായം വാങ്ങുന്ന സമയത്ത് ഈ സ്കോളർഷിപ് നൽകില്ല. വിദേശികൾ, സ്പോൺസർ ചെയ്തെത്തിയവർ, മാനേജ്മെന്റ് ക്വോട്ടയിൽ പ്രവേശനം ലഭിച്ചവർ എന്നിവർക്ക് എ.ഐ.സി.ടി.ഇ സ്കോളർഷിപ്പില്ല. അക്കാദമിക പ്രവർത്തനം തൃപ്തികരമായിരിക്കണം. കോളജ് ആവശ്യപ്പെടുന്നതനുസരിച്ച്, ആഴ്ചയിൽ 8–10 മണിക്കൂർ അധ്യാപനം, ഗവേഷണം, ലാബ് വികസനം /പരിപാലനം തുടങ്ങിയവയിൽ ഏർപ്പെടണം. ഇക്കാര്യങ്ങൾ പ്രിൻസിപ്പൽ സാക്ഷ്യപ്പെടുത്തണം. അച്ചടക്കലംഘനം വന്നാൽ സ്കോളർഷിപ് നിർത്തും. കോഴ്സ് ഇടയ്ക്കുവെച്ച് നിർത്തിപ്പോയാൽ വാങ്ങിയ തുക തിരിച്ചടയ്ക്കേണ്ടിവരും.