കണ്ണൂർ:പരിചരണത്തിന് ഏറെ സൗകര്യമുള്ളതും ആദായകരവുമായ ‘ബയോ ഫ്ലോക്ക്’ മത്സ്യക്കൃഷിക്ക് പ്രചാരമേറുന്നു. ടാങ്കിൽ പ്രത്യേകരീതിയിലൂടെ ‘ഹെട്രോടോപ്പിക്’ എന്ന ബാക്ടീരിയയെ വളർത്തി മത്സ്യങ്ങളുടെ വിസർജ്യത്തിലെ അമോണിയയെയും നൈട്രേറ്റിനെയും പ്രോട്ടിൻ അടങ്ങിയ ഭക്ഷ്യവസ്തുമാക്കി മാറ്റുന്ന രീതിയാണിത്. സാധാരണമായി, മത്സ്യം വളർത്തുന്ന ടാങ്കിലെ വെള്ളത്തിലെ മൂന്നിലൊരുഭാഗം രണ്ടാഴ്ച കൂടുമ്പോൾ മാറ്റണം. മത്സ്യങ്ങളുടെ വിസർജ്യത്തിലെ അമോണിയയും നൈട്രേറ്റും വെള്ളത്തിൽ കൂടിയ അളവിൽ കലർന്നാൽ അവ ചത്തുപോകും.

‘ബയോ ഫ്ലോക്ക്’ രീതിയിൽ കൃഷി ചെയ്യുമ്പോൾ വെള്ളം മാറ്റേണ്ടതില്ല. ടാങ്കിൽ കുഞ്ഞുങ്ങളെ നിക്ഷേപിക്കുമ്പോൾ നിറയ്ക്കുന്ന വെള്ളം ആറുമാസം കഴിഞ്ഞ് വിളവെടുക്കുന്നതുവരെ മാറ്റേണ്ടതില്ല. വിസർജ്യം മീനുകൾതന്നെ തിന്നുതീർക്കുന്നതിനാൽ പുറത്തുനിന്ന് കൊടുക്കുന്ന ഭക്ഷണത്തിന്റെ അളവ് പകുതിയായി കുറയ്ക്കുകയും ചെയ്യാം. വെള്ളത്തിന് ക്ഷാമം അനുഭവപ്പെടുന്ന പ്രദേശങ്ങളിൽ മത്സ്യം വളർത്തുന്നതിന് തായ്‌ലാൻഡിൽ വികസിപ്പിച്ചെടുത്ത ഈ രീതി ഇപ്പോൾ ലോകത്തെല്ലായിടങ്ങളിലും പ്രചരിച്ചു.

അഞ്ചുമീറ്റർ വ്യാസമുള്ള ടാങ്കിൽ മത്സ്യം കൃഷി ചെയ്യാൻ 20,000 ലിറ്റർ വെള്ളം വേണം. പ്രധാനമന്ത്രിയുടെ ‘മത്സ്യയോജന’ (പി.എം.എസ്.എസ്.വൈ) പദ്ധതിയുടെയും സംസ്ഥാനസർക്കാരിന്റെ ‘സുഭിക്ഷ കേരളം’ പദ്ധതിയുടെയും ഭാഗമായി ഇതേ കൃഷിരീതി സ്വീകരിക്കുന്നുണ്ട്.

മത്സ്യയോജന പദ്ധതിയിൽ അഞ്ചുമീറ്റർ വ്യാസമുള്ള ഏഴ് ടാങ്കുകളിൽ കൃഷി ചെയ്യണം. ഏഴരലക്ഷം രൂപയാണ് ശരാശരി ചെലവ്. ഇതിൽ 40 ശതമാനം സബ്സിഡിയായി ഫിഷറീസ് വകുപ്പ് നേരിട്ട് നൽകുന്നു. സുഭിക്ഷ കേരളം പദ്ധതിയനുസരിച്ച് ഒരു ടാങ്കിൽ കൃഷി ചെയ്താൽമതി. 1,38,000 രൂപയാണ് ചെലവ്. 40 ശതമാനം സബ്സിഡി ഇതിനും ലഭിക്കും. ജില്ലാ-ഗ്രാമപ്പഞ്ചായത്തുകളും ഫിഷറീസ് വകുപ്പും ചേർന്നാണ് സബ്സിഡി അനുവദിക്കുന്നത്.

ജനിതകമാറ്റം വരുത്തിയ തിലാപ്പിയ മത്സ്യങ്ങളുടെ കുഞ്ഞുങ്ങളെയാണ് വളർത്താനായി ഫിഷറീസ് വകുപ്പ് അനുവദിക്കുന്നത്. അഞ്ചുമീറ്റർ വ്യാസമുള്ള ഒരു ടാങ്കിൽ 1250 കുഞ്ഞുങ്ങളെ വളർത്താം. ആറുമാസംകൊണ്ട് വിളവെടുക്കാം. ഒരു മീനിന് 400 ഗ്രാം തൂക്കം വരെ ലഭിക്കും. ജില്ലയിൽ 237 പേർ ഈ കൃഷിരീതി സ്വീകരിച്ചിട്ടുണ്ട്. മിക്ക കൃഷിക്കാരും ഈ കൃഷി ആദായകരമാണെന്ന് പറയുന്നുവെന്നും എന്നാൽ ഇത്രയും മത്സ്യങ്ങളെ ഒന്നിച്ച് വിറ്റുതീർക്കുന്നതിനുള്ള ബുദ്ധിമുട്ടാണ് പ്രശ്നമാവുന്നതെന്നും പദ്ധതിയുടെ പ്രോജക്ട് കോ-ഓഡിനേറ്റർ കെ.പി. ദീപ പറഞ്ഞു.