ന്യൂഡൽഹി∙ പുരപ്പുറ സോളർ പദ്ധതി സ്ഥാപിക്കാൻ ഉപയോക്താവിന് ഇനി ഇഷ്ടമുള്ള കമ്പനിയെ സമീപിക്കാമെന്ന് കേന്ദ്രസർക്കാർ. നിലവിൽ കേരളത്തിൽ കെഎസ്ഇബി എംപാനൽ ചെയ്തിരിക്കുന്ന കമ്പനികൾ വഴി പദ്ധതി നടപ്പാക്കിയാൽ മാത്രമേ സബ്സിഡി ലഭിക്കുമായിരുന്നുള്ളൂ. ഇനി മുതൽ ഉപയോക്താവിന് സ്വന്തം നിലയ്ക്ക് സോളർ പാനൽ, ഇൻവെർട്ടർ ഇൻസ്റ്റലേഷൻ നടത്താം. എന്നിട്ട് ഇതിന്റെ ഫോട്ടോ സഹിതം വിതരണ കമ്പനിയെ രേഖാമൂലമോ ഓൺലൈനായോ അറിയിച്ചാൽ സബ്സിഡിക്ക് അർഹമാകും. പുതിയ സൗകര്യത്തിനു പുറമേ നിലവിലെ എംപാനൽ രീതിയും തുടരും. ഉപയോക്താവിന്റെ ഇഷ്ടമനുസരിച്ചു തിരഞ്ഞെടുക്കാം.

രാജ്യമാകെയുള്ള പുരപ്പുറ സോളർ പദ്ധതി ഊർജമന്ത്രി ആർ.കെ.സിങ് അവലോകനം ചെയ്തതിനു പിന്നാലെയാണു തീരുമാനം.എംപാനൽ ചെയ്ത സ്ഥാപനങ്ങളെ സംബന്ധിച്ചു പരാതികൾ നിലനിൽക്കുന്നതിനിടെയാണ് കേന്ദ്രനീക്കം. ലാഭകരമല്ല എന്ന കാരണത്താൽ ചില കമ്പനികൾ കുറഞ്ഞ ശേഷിയുള്ള പുരപ്പുറപദ്ധതികൾക്കു മുട്ടാപ്പോക്ക് ന്യായം പറഞ്ഞ് അനുമതി നിഷേധിക്കുന്നതായും പരാതിയുണ്ടായിരുന്നു. സോളർ പാനലിന്റെയും ഇൻവെർട്ടറിന്റെയും ഗുണനിലവാരം ഉറപ്പാക്കുന്നതിനു നിശ്ചിത മാനദണ്ഡങ്ങൾ പാലിക്കുന്ന ഉൽപന്നങ്ങളുടെ പട്ടികയും വിലയും കാലാകാലങ്ങളിൽ കേന്ദ്രസർക്കാർ പ്രസിദ്ധീകരിക്കും.

സബ്ഡിഡി 30  ദിവസത്തിനുള്ളിൽ

പുരപ്പുറ പദ്ധതി വീട്ടിൽ സ്ഥാപിച്ച് 30 ദിവസത്തിനുള്ളിൽ സബ്സിഡി അക്കൗണ്ടിൽ നൽകണമെന്നും കേന്ദ്രം നിർദേശിച്ചു. 3 കിലോവാട്ട് വരെ കേന്ദ്രം നൽകുന്നത് 40 ശതമാനം സബ്സിഡിയാണ്. 3 കിലോവാട്ട് മുതൽ 10 കിലോവാട്ട് വരെ 20 ശതമാനവും.

പാനലും ഇൻവെർട്ടറും സ്ഥാപിച്ചു കഴിഞ്ഞാൽ 15 ദിവസത്തിനുള്ളിൽ വിതരണ കമ്പനി നെറ്റ്മീറ്ററിങ് പൂർത്തിയാക്കണം. 

സോളർ പ്ലാന്റിൽ നിന്നുള്ള വൈദ്യുതി ഗ്രിഡുമായി പങ്കുവയ്ക്കുന്നതിനുള്ള മീറ്ററിങ് സംവിധാനമാണ് നെറ്റ്മീറ്ററിങ്. നിലവിൽ കേരളത്തിൽ ശരാശരി 45 ദിവസത്തിലധികം താമസമെടുക്കുന്നുണ്ട്.