തിരുവനന്തപുരം : കാർഷിക ഗ്രാമവികസന ബാങ്കിനെ കേരളബാങ്കിൽ ലയിപ്പിക്കാനുള്ള നടപടികളിലേക്ക് സർക്കാർ നീങ്ങിയതോടെ കോൺഗ്രസ്‌ മുക്ത സഹകരണമേഖല എന്ന രീതിയിലേക്ക് കേരളത്തിലെ സഹകരണ ഭരണപരിഷ്കാരം മാറുന്നു. കേരളബാങ്ക് രൂപവത്കരണം, മിൽമയിലെ ഭരണരീതി പരിഷ്കരണം എന്നിവയിലൂടെ കോൺഗ്രസിനും യു.ഡി.എഫിനും സഹകരണ ഭരണത്തിൽ ലഭിച്ചിരുന്ന മേൽക്കോയ്മ ക്ഷയിച്ചു. യു.ഡി.എഫ്. നിയന്ത്രണത്തിലുള്ള കാർഷിക വികസന ബാങ്കിനെ കേരളബാങ്കിന്റെ ഭാഗമാക്കിയാൽ ആ രംഗത്തെ സ്വാധീനവും ഇല്ലാതാകും. പ്രധാന സഹകരണ സ്ഥാപനങ്ങളിൽനിന്ന് യു.ഡി.എഫിന് ഭരണം നഷ്ടമാകുമ്പോൾ കോൺഗ്രസ് അനുകൂല സഹകരണസംഘടനകളും ശക്തിക്ഷയ ഭീഷണിയിലാണ്.

ജില്ല, സംസ്ഥാന സഹകരണ ബാങ്കുകളായിരുന്നു സഹകരണ വായ്പാമേഖലയിലെ പ്രധാന ഭരണഘടകം. സംസ്ഥാന ഭരണം മാറുന്നതിനനുസരിച്ച് ഈ ബാങ്കുകളുടെ ഭരണസമിതിയിലും മാറ്റം ഉണ്ടാകാറുണ്ടായിരുന്നു. അതേസമയം, മലപ്പുറം ജില്ലാ സഹകരണ ബാങ്ക് ഭരണം എക്കാലത്തും യു.ഡി.എഫിനൊപ്പം നിന്നു. ജില്ലാ ബാങ്കുകളെ സംസ്ഥാന ബാങ്കിൽ ലയിപ്പിച്ചതോടെ ഈ മേഖലയിൽ സി.പി.എം. ആധിപത്യം വന്നു. സംസ്ഥാനത്തെ മൊത്തം പ്രാഥമിക സഹകരണ ബാങ്കുകളാണ് കേരളബാങ്കിന്റെ ഭരണസമിതിയെ തിരഞ്ഞെടുക്കുന്നത്. പ്രാഥമിക ബാങ്കുകൾ 60 ശതമാനവും സി.പി.എം. നിയന്ത്രണത്തിലാണ്. അതിനാൽ, സംസ്ഥാന ഭരണം മാറിയാലും കേരളബാങ്ക് ഭരണസമിതിയുടെ രാഷ്ട്രീയനിറം മാറാനിടയില്ല.

ദീർഘകാല കാർഷിക വായ്പകൾക്കുവേണ്ടി പ്രത്യേക നിയമനിർമാണത്തിലൂടെ രൂപവത്കരിച്ചതാണ് കാർഷിക ഗ്രാമവികസന ബാങ്കുകൾ. 76 പ്രാഥമിക കാർഷിക ഗ്രാമവികസന ബാങ്കുകളും അവയുടെ അപ്പക്സ് സ്ഥാപനമായ സംസ്ഥാന ബാങ്കുമാണുള്ളത്. ഭൂരിപക്ഷം പ്രാഥമിക ബാങ്കുകളും യു.ഡി.എഫ്. നിയന്ത്രണത്തിലാണ്. അതിനാൽ, സംസ്ഥാന ബാങ്ക് ഭരണസമിതിയും അവർക്കൊപ്പമായിരുന്നു. സംസ്ഥാന ഭരണമാറ്റം ഇവിടെ ബാധിച്ചില്ല.

അഞ്ച് പ്രാഥമിക ബാങ്കുകളുടെ ഭരണനിയന്ത്രണമുള്ള കേരളകോൺഗ്രസ് മാണിവിഭാഗം എൽ.ഡി.എഫിനൊപ്പം മാറിയിട്ടും സംസ്ഥാന ബാങ്ക് ഭരണസമിതിയിൽ കൃത്യമായ മേൽക്കൈ എൽ.ഡി.എഫിന് നേടാനായിരുന്നില്ല. ഈ ബാങ്കാണ് കേരളബാങ്കിൽ ലയിപ്പിക്കുന്നത്. അതോടെ യു.ഡി.എഫ്. സഹകരണ വായ്പാമേഖലയിലെ ഭരണത്തിൽനിന്ന് പൂർണമായും പുറത്താകും. ഹൗസിങ് ഫെഡറേഷൻ, മാർക്കറ്റിങ് ഫെഡറേഷൻ, റബ്ബർ മാർക്കറ്റിങ് ഫെഡറേഷൻ എന്നിവയാണ് ഇപ്പോൾ യു.ഡി.എഫ്. നിയന്ത്രണത്തിലുള്ള സഹകരണ ഫെഡറേഷനുകൾ. ഇതിൽ ഹൗസിങ് ഫെഡറേഷനിൽ പരിഷ്കാരം കൊണ്ടുവരാൻ സർക്കാർ ആലോചിക്കുന്നുണ്ട്. ഇതോടെ, ആ ഫെഡറേഷൻ ഭരണവും യു.ഡി.എഫിന് നഷ്ടമാകാനാണ് സാധ്യത.