ഇരിട്ടി : സാമ്പത്തിക പ്രതിസന്ധിയിൽ നട്ടംതിരിയുന്ന ആറളം ഫാമിന് കശുവണ്ടിക്കാലം പ്രതീക്ഷയുടെ പൂക്കലമാകുന്നു. ഫാമിന്റെ നട്ടെല്ലായ തെങ്ങുകൃഷിയെ കാട്ടാനയും കുരങ്ങൻമാരും നശിപ്പിച്ചപ്പോൾ കശുവണ്ടിയിൽനിന്നുള്ള ആദായമാണ് ഫാമിന് കൈത്താങ്ങാവുന്നത്. കഴിഞ്ഞവർഷം കോവിഡ് പ്രതിസന്ധിയും വിലത്തകർച്ചും എല്ലാം ഉണ്ടായിട്ടും കശുവണ്ടിയിൽനിന്നുള്ള വരുമാനം എക്കാലത്തേയും മികച്ചനിലയിൽ എത്തിയിരുന്നു. കാലാവസ്ഥാവ്യതിയാനവും തുടർച്ചയായ മഴയും കാരണം ഡിസംബർ ആദ്യവാരങ്ങളിൽ പൂക്കുകയും കായ്ക്കുകയും ചെയ്യേണ്ട കശുമാവുകൾ ഒരുമാസം വൈകിയാണ് പുഷ്പിച്ചത്. ടൺ കണക്കിന് കശുവണ്ടി ശേഖരിക്കേണ്ട സമയം കഴിഞ്ഞെങ്കിലും തളിരണിഞ്ഞ് നിറയെ പൂവിട്ട് നിൽക്കുന്ന കശുമാവുകൾ മനംകുളിർപ്പിക്കുന്ന കാഴ്ചയാണ്.

ലോകത്തിലെ ഏറ്റവും ഗുണനിലവാരമുള്ള കശുവണ്ടിയാണ് ഫാമിൽ വിളയുന്നത്. അണ്ടിപ്പരിപ്പിന്റെ ഗുണനിലവാരം കാരണം ലോകത്തെ ഒന്നാം നമ്പർ ബ്രാൻഡ്‌ ഇനത്തിലാണ് ഫാമിലെ കശുവണ്ടിയും ഉൾപ്പെട്ടിട്ടുള്ളത്. കഴിഞ്ഞ മൂന്ന് വർഷമായി പൊതുമേഖലാ സ്ഥാപനങ്ങളായ കാപെക്സും കശുവണ്ടി വികസന കോർപ്പറേഷനുമാണ് ഫാമിൽനിന്നുള്ള മുഴുവൻ കശുവണ്ടിയും ശേഖരിക്കുന്നത്.

കഴിഞ്ഞവർഷം കോവിഡ് കാരണം തോട്ടങ്ങളിലെ അടിക്കാട് വെട്ട് പൂർത്തിയാക്കാൻ കഴിഞ്ഞിരുന്നില്ല. കാട്ടാന ശല്യവും പ്രതിസന്ധിയുണ്ടാക്കിയിരുന്നു. ഇക്കുറിയും ആന വില്ലനാകുമെങ്കിലും ഉത്പാദനം പൂർണതയിൽ എത്തുമ്പോഴേക്കും മുഴുവൻ കൃഷിയിടത്തിലേയും കാട് വെട്ടിത്തെളിക്കാനുള്ള നടപടികളാണ് പൂർത്തിയായിവരുന്നത്. ഫാമിന്റെ ഒന്ന് മുതൽ നാലുവരെയുള്ള ബ്ലോക്കുകളിലാണ് കശുമാവ് സമൃദ്ധിയോടെ വളരുന്നത്. ഈ പ്രദേശങ്ങളിലാണ് കാട്ടാനക്കൂട്ടങ്ങൾ തമ്പടിച്ചിരിക്കുന്നതും. ഇക്കുറി 150 ടൺ സംഭരിക്കാൻ കഴിയുമെന്നാണ് അധികൃതരുടെ പ്രതീക്ഷ.

പാഴായിപ്പോകുന്ന ടൺ കണക്കിന് കശുമാങ്ങയിൽനിന്ന്‌ മൂല്യ വർധിത ഉത്‌പന്നങ്ങൾ നിർമിച്ച് കഴിഞ്ഞവർഷം പരീക്ഷണാടിസ്ഥാനത്തിൽ വിപണിയിൽ എത്തിച്ചിരുന്നു. ആറളം ഫാം പൊതു ബ്രാൻഡിൽ ജാം, അച്ചാർ, സ്‌ക്വാഷ് എന്നിവയാണ് വിപണിയിലെത്തിച്ചത്. പൈലറ്റ് പദ്ധതിയെന്നനിലയിൽ അഞ്ച് ലക്ഷം രൂപയുടെ വിപണിയാണ് കഴിഞ്ഞവർഷം ലക്ഷ്യമിട്ടിരുന്നത്. ഇക്കുറി കൂടുതൽ വരുമാനം ഇതിലൂടെ പ്രതീക്ഷിക്കുന്നണ്ട്. ഫാമിൽ മാത്രം 800 ടണ്ണോളം കശുമാങ്ങയാണ് പാഴായിപ്പോകുന്നത്. ഈവർഷം ഇതിന്റെ മൂന്നിലൊന്നെങ്കിലും മൂല്യവർധിത ഉത്‌പന്നങ്ങളാക്കാനാണ് ലക്ഷ്യമിടുന്നത്. ഇതിനായി ജീവനക്കാരും ജോലിക്കാരും അടങ്ങുന്ന 25 അംഗ സംഘത്തിന് പരിശീലനം നൽകിയിരുന്നു.  250 മില്ലി ലിറ്റർ ജാമിന് 120 രൂപ, അച്ചാറിന് 60 രൂപ, അര ലിറ്ററിന്റെ സ്‌ക്വാഷിന് 120 രൂപ എന്നിങ്ങനെയാണ് ഇപ്പോഴത്തെ വില. അര ലിറ്റർ സ്‌ക്വാഷിൽനിന്ന് 35 ഗ്ലാസ് ശീതളപാനീയം ഉണ്ടാക്കാനാവും.