പേരാവൂർ : വെള്ള കാർഡുകാർക്ക് ഈ വർഷാദ്യം മുതൽ നൽകുമെന്ന് പ്രഖ്യാപിച്ച അധിക അരി വിതരണം കണ്ണൂർ ജില്ലയിൽ തുടങ്ങിയില്ല. നീല, വെള്ള കാർഡുകാർക്കുള്ള സ്പെഷ്യൽ അരി വിതരണവും തുടങ്ങിയില്ല.

വർഷാദ്യം മുതൽ വെള്ള കാർഡുകാരുടെ റേഷൻ വിഹിതം അഞ്ചിൽ നിന്ന് എഴു കിലോയായി ഉയർത്തിയിരുന്നു. വെള്ളകാർഡിന് 10.9 രൂപ നിരക്കിൽ രണ്ടു കിലോ അരിയും 15 രൂപ നിരക്കിൽ മൂന്നു കിലോ സ്പെഷ്യൽ അരിയുമുൾപ്പെടെ ആകെ 10 കിലോ നൽകുമെന്നായിരുന്നു പ്രഖ്യാപനം. നീലയ്ക്ക് 15 രൂപ നിരക്കിൽ ഈ മാസം മൂന്നു കിലോ സ്പെഷ്യൽ അരിയും നൽകണം. ഇതിനുപുറമേ വിവിധ സ്ഥാപനങ്ങളിലെ അന്തേവാസികൾക്ക് (എൻ.പി.ഐ. കാർഡ്) രണ്ടുകിലോ സ്പെഷ്യൽ അരി 15 രൂപ നിരക്കിൽ നൽകുമെന്നുമായിരുന്നു മന്ത്രിയുടെ പുതുവത്സര പ്രഖ്യാപനം.

ഇതനുസരിച്ച് ജില്ലയിൽ ജനുവരി മാസം അധിക വിതരണത്തിന് ആകെ 13249.11ക്വിൻ്റൽ അരി ആവശ്യമാണ്. നീല കാർഡിന് 6422.73 ക്വിൻ്റലും വെള്ളയ്ക്ക് 6826.38 ക്വിൻ്റലുമാണ് ആവശ്യമുള്ളത്. എന്നാൽ ആകെ സ്റ്റോക് ഉള്ളതാകട്ടെ 82 ക്വിൻ്റൽ മാത്രവും. അധിക വിതരണത്തിനായി അരി അലോട്ട് ചെയ്തിട്ടുമില്ല. ഇതിനാൽ ജില്ലയിലെവിടെയും അധിക അരി വിതരണം തുടങ്ങാനായില്ല.

സംസ്ഥാനത്താകെ റേഷൻ വാങ്ങുന്നവരുടെ എണ്ണം ഏതാനും മാസങ്ങളായി കുറവാണ്. ഇതുമൂലം ടൺകണക്കിന് ഭക്ഷ്യധാന്യം മാസംതോറും മിച്ചംവരുന്നുണ്ട്. റേഷൻ ഭക്ഷ്യധാന്യം കെട്ടിക്കിടന്ന് നശിക്കുന്നത് ഒഴിവാക്കാനാണ് പൊതുവിഭാഗം കാർഡുകൾക്ക് കൂടുതലായി അരി നൽകാൻ ഭക്ഷ്യവകുപ്പ് തീരുമാനമെടുത്തത്.
എന്നാൽ സംസ്ഥാനത്തെ എല്ലാ ജില്ലകളിലും ഈ സാഹചര്യമില്ല. കണ്ണൂർ, മലപ്പുറം തുടങ്ങിയ ജില്ലകളിൽ നീല, വെള്ള കാർഡുടമകളും റേഷൻ അരി കൃത്യമായി വാങ്ങാറുണ്ട്. തിരുവനന്തപുരം, എറണാകുളം തുടങ്ങിയ ജില്ലകളിലാണ് അരി കെട്ടിക്കിടക്കുന്നത്. തൽക്കാലം അരി കെട്ടിക്കിടക്കുന്ന ജില്ലകളിൽ മാത്രം വിതരണം നടക്കട്ടെ, മറ്റു ജില്ലകൾക്കായി പ്രത്യേകം എഫ്.സി.ഐ.യിൽ നിന്ന് വാങ്ങി നൽകേണ്ടതില്ല എന്ന തീരുമാനത്തിലാണ് ഭക്ഷ്യവകുപ്പ് എന്നാണ് വിവരം.