തളിപ്പറമ്പ് : മണ്ഡലത്തിലെ മുഴുവൻ കുടുംബങ്ങൾക്കും കുടിവെള്ള കണക്‌ഷൻ നൽകുമെന്ന് മന്ത്രി എം.വി. ഗോവിന്ദൻ. മലപ്പട്ടം, പരിയാരം, കുറുമാത്തൂർ, ചപ്പാരപ്പടവ്, മയ്യിൽ, കൊളച്ചേരി, കുറ്റ്യാട്ടൂർ പഞ്ചായത്തുകളിലെ കുടിവെള്ള പ്രശ്‌നം അതിവേഗം പരിഹരിക്കും. ജൽജീവൻ മിഷൻ പദ്ധതി അവലോകനം യോഗത്തിൽ സംസാരിക്കുകയായിരുന്നു മന്ത്രി.

മലപ്പട്ടം, പരിയാരം, കുറുമാത്തൂർ, ചപ്പാരപ്പടവ് പഞ്ചായത്തുകളിലെ കുടിവെള്ള കണക്‌ഷൻ മാർച്ച് മാസത്തിനകം നൽകും. ഈ പഞ്ചായത്തുകളിൽ 20,125 കണക്‌ഷൻ നൽകുന്നതിന് 46.93 കോടിയുടെ പ്രവൃത്തി പുരോഗമിക്കുകയാണ്‌. 6,171 കണക്‌ഷൻ ഇതിനകം നൽകി. ചപ്പാരപ്പടവ് പഞ്ചായത്തിലെ തിമിരി, വെള്ളാട് വില്ലേജുകളിൽ കണക്‌ഷൻ എത്തിക്കുന്നതിന്‌ നടപടിയായി. മയ്യിൽ, കുറ്റ്യാട്ടൂർ, കൊളച്ചേരി പഞ്ചായത്തിലെ പ്രവൃത്തിയും ടെൻഡർ ചെയ്തു. മൂന്ന് പഞ്ചായത്തിലുമായി 10,560 കുടുംബങ്ങൾക്ക് കണക്‌ഷൻ നൽകുന്നതിനായി 114.35 കോടിയുടെ പദ്ധതിയാണ് ടെൻഡർ ചെയ്തത്. ഏപ്രിലിൽ പദ്ധതി പൂർത്തിയാക്കാൻ മന്ത്രി നിർദേശിച്ചു.

മണ്ഡലത്തിൽ 161.33 കോടിയുടെ പദ്ധതിയാണ് ജൽജീവനിൽ നടക്കുന്നത്. പദ്ധതി യാഥാർഥ്യമാകുന്നതോടെ മണ്ഡലത്തിൽ മുഴുവൻ കുടുംബങ്ങൾക്കും കുടിവെള്ളമെത്തും. യോഗത്തിൽ കേരള വാട്ടർ അതോറിറ്റി എക്‌സിക്യൂട്ടീവ് എൻജിനിയർ സുരജ, തളിപ്പറമ്പ് ബ്ലോക്ക് പഞ്ചായത്ത് പ്രസിഡന്റ് സി.എം. കൃഷ്ണൻ, ആന്തൂർ നഗരസഭാ ചെയർമാൻ പി. മുകുന്ദൻ, പഞ്ചായത്ത് പ്രസിഡന്റുമാർ, ഉദ്യോഗസ്ഥന്മാർ എന്നിവർ പങ്കെടുത്തു.