പാലക്കാട് : പുഴയുടെ ആഴങ്ങളിലേക്കിറങ്ങുമ്പോഴും ആ കുരുന്നുകളുടെ മനസ്സു പകച്ചില്ല. മുങ്ങിത്താഴ്ന്ന 3 പേരെയും എങ്ങനെയും രക്ഷപ്പെടുത്തുക മാത്രമായിരുന്നു ലക്ഷ്യം. നാടിനു മുഴുവൻ അഭിമാനമായി മാറിയ 2 കുരുന്നുകളുടെ ആത്മവീര്യത്തിലും സമയോചിത ഇടപെടലിലും 4 വയസ്സുകാരൻ നാഥുവിനും മുത്തശ്ശി രത്നത്തിനും അയൽവാസി ശാന്തമ്മയ്ക്കും ലഭിച്ചത് രണ്ടാം ജന്മം. ഇന്നലെ വൈകിട്ട് ആറരയോടെ മലമ്പുഴ കടുക്കാംകുന്നം വാരണിപ്പുഴപ്പാലത്തിനു താഴെ തടയണയിൽ കുളിക്കാനും അലക്കാനുമെത്തിയതാണ് അക്കരക്കാട് നാഥു (4), മുത്തശ്ശി രത്നം (54), അയൽവാസി ശാന്തമ്മ (60) എന്നിവർ. 

കുളിക്കാൻ ഇറങ്ങുന്നതിനിടെ ശാന്തമ്മയും നാഥുവും കാൽ തെന്നി ആഴത്തിലേക്ക് മുങ്ങിത്താഴ്ന്നു. രത്നം നിലവിളിച്ചെങ്കിലും ആരും സഹായത്തിനുണ്ടായിരുന്നില്ല. ഒടുവിൽ അവരെ രക്ഷിക്കാൻ രത്നവും എടുത്തു ചാടി. തടയണയ്ക്കു കുറച്ചകലെ നീന്തിക്കളിക്കുകയായിരുന്നു വാരണി അക്കരക്കാട് കണ്ണൻ–സുനിത ദമ്പതികളുടെ മകൻ കെ.അശ്വിനും (12), അരവിന്ദാക്ഷൻ–ശുഭ ദമ്പതികളുടെ മകൻ എ.എസ്.അശ്വിനും(11) സംഭവം കണ്ടു കരയ്ക്കുകയറി ഇവിടേക്ക് ഓടിയെത്തുകയായിരുന്നു. ആദ്യം കെ. അശ്വിൻ കുട്ടിയെ മുങ്ങിയെടുത്തു. ഇതിനു പിന്നാലെ എ.എസ്. അശ്വിൻ ശാന്തമ്മയെയും രത്നത്തെയും കൈയിൽ പിടിച്ച് ഏറെ പ്രയാസപ്പെട്ട് വലിച്ചു കയറ്റി.             

ഇതിനിടെ പ്രദേശവാസികളും ഓടിയെത്തി. ഇവരെയുംകൊണ്ട് ആശുപത്രിയിലേക്ക് പാഞ്ഞു. സ്വകാര്യ ആശുപത്രിയിൽ ചികിത്സക്ക് ശേഷം ഇവരെ രാത്രിയോടെ വിട്ടയച്ചു. കെ.അശ്വിൻ മലമ്പുഴ സെന്റ് ജൂഡ് സ്കൂളിലെ ആറാം ക്ലാസ് വിദ്യാർഥിയും എ.എസ്.അശ്വിൻ അകത്തേത്തറ എ.യു.പി സ്കൂളിലെ അഞ്ചാം ക്ലാസ് വിദ്യാർഥിയുമാണ്. വെള്ളത്തിൽ നിന്ന് വേഗത്തിൽ പുറത്തെടുക്കാനായതും പ്രാഥമിക ചികിത്സ നൽകാനായതും രക്ഷയായെന്നും മൂവരുടെയും ആരോഗ്യ നില തൃപ്തികരമാണെന്നും ആശുപത്രി അധികൃതർ അറിയിച്ചു.