തിരുവനന്തപുരം: കോവിഡ് സാഹചര്യത്തിൽ പാഠഭാഗങ്ങൾ ചുരുക്കി പരീക്ഷയ്ക്കായി ഫോക്കസ് ഏരിയ നിശ്ചയിച്ചത് വിദ്യാർഥികൾക്കും അധ്യാപകർക്കും തിരിച്ചടിയായി. പത്താംക്ലാസ് പരീക്ഷയ്ക്കുള്ള ചോദ്യഘടനയ്ക്ക് അന്തിമരൂപമായതോടെ ഫോക്കസ് ഏരിയമാത്രം പഠിച്ചാൽ എ പ്ലസ് ലഭിക്കില്ല. ഹയർസെക്കൻഡറിക്കും സമാനചോദ്യഘടനയാണ് നിശ്ചയിച്ചിട്ടുള്ളത്.

80 മാർക്കിന്റെ പരീക്ഷയ്ക്ക് 56 മാർക്കാണ് ഫോക്കസ് ഏരിയയിൽനിന്ന് വരുക. 24 മാർക്ക് പുറത്തുനിന്നായിരിക്കും. 40 മാർക്കിന്റെ പരീക്ഷയ്ക്ക് 28 മാർക്ക് ഫോക്കസ് ഏരിയയിൽ നിന്നും 12 മാർക്ക് അതിനുപുറത്തുനിന്നുമായിരിക്കും. ശരിയായരീതിയിൽ ഒരിടത്തും ക്ലാസുകൾ പൂർത്തിയാക്കാൻ പറ്റാത്ത സാഹചര്യത്തിൽ അധ്യാപകരും വിദ്യാർഥികളും ഫോക്കസ് ഏരിയയിലാണ് ശ്രദ്ധ കേന്ദ്രീകരിച്ചത്. ആകെയുള്ള പാഠഭാഗത്തിന്റെ 60 ശതമാനമാണ് നേരത്തേ ഫോക്കസ് ഏരിയ. ഇതിൽനിന്ന് എഴുപതുശതമാനം ചോദ്യങ്ങൾ മാത്രമേ ചോദിക്കുകയുള്ളു. ഇക്കുറി എ, എ പ്ലസ് ഗ്രേഡുകൾ ലഭിക്കണമെങ്കിൽ 24 മാർക്ക് ഫോക്കസ് ഏരിയയ്ക്ക് പുറത്തുനിന്ന് നേടേണ്ടിവരും.

എസ്.എസ്.എൽ.സി. ചോദ്യഘടന 40 മാർക്കിന്റെ ചോദ്യപ്പേപ്പർ

*ഒരുമാർക്കിന്റെ ആറുചോദ്യങ്ങൾ ഫോക്കസ് ഏരിയയിൽനിന്ന്. ഇതിൽ നാലെണ്ണത്തിന് ഉത്തരമെഴുതണം. ഫോക്കസ് ഏരിയക്കു പുറത്തുനിന്നുവരുന്ന മൂന്നുചോദ്യങ്ങൾക്കും ഉത്തരം എഴുതണം.

*രണ്ടുമാർക്കിന്റെ ഒരുചോദ്യമായിരിക്കും ഫോക്കസ് ഏരിയയിൽനിന്നുണ്ടാവുക. ഇതിന് ഉത്തരമെഴുതണം. പുറത്തുനിന്ന് രണ്ടുചോദ്യങ്ങളിൽ ഒന്നിന് ഉത്തരമെഴുതണം.

*മൂന്നുമാർക്കിന്റെ നാലെണ്ണം ഫോക്കസ് ഏരിയയിൽനിന്ന്. അതിൽ മൂന്നെണ്ണത്തിനും പുറത്തുനിന്നുള്ള ഒരു ചോദ്യത്തിനും ഉത്തരമെഴുതണം.

*നാലുമാർക്കിന്റെ മൂന്നുചോദ്യങ്ങൾ ഫോക്കസ് ഏരിയയിൽനിന്ന്. അതിൽ രണ്ടെണ്ണത്തിനും പുറത്തുനിന്നുള്ള രണ്ടുചോദ്യങ്ങളിൽ ഒന്നിനും ഉത്തരം എഴുതണം.

*അഞ്ചുമാർക്കിന്റെ രണ്ടുചോദ്യങ്ങൾ ഫോക്കസ് ഏരിയയിൽനിന്ന്. ഒന്നിന് ഉത്തരമെഴുതണം. ഈ വിഭാഗത്തിൽ ഫോക്കസ് ഏരിയയ്ക്ക് പുറത്തുനിന്ന് ചോദ്യങ്ങളുണ്ടാവില്ല.

80 മാർക്കിന്റെ ചോദ്യപ്പേപ്പർ

*ഒരു മാർക്കിന്റെ ആറുചോദ്യങ്ങൾ ഫോക്കസ് ഏരിയയിൽനിന്ന്, അതിൽ നാലെണ്ണത്തിന് ഉത്തരമെഴുതണം. നാലുചോദ്യങ്ങൾ പുറത്തുനിന്ന്. നാലിനും ഉത്തരമെഴുതണം.

*രണ്ടുമാർക്കിനുള്ള അഞ്ചുചോദ്യങ്ങൾ ഫോക്കസ് ഏരിയയിൽനിന്ന്. മൂന്നെണ്ണത്തിന് ഉത്തരമെഴുതണം. പുറത്തുനിന്ന് മൂന്നുചോദ്യങ്ങൾ. രണ്ടെണ്ണത്തിന് ഉത്തരമെഴുതണം.

*നാലുമാർക്കിനുള്ള അഞ്ചുചോദ്യങ്ങൾ ഫോക്കസ് ഏരിയയിൽനിന്ന് മൂന്നെണ്ണത്തിന് ഉത്തരമെഴുതണം. പുറത്തുനിന്ന് രണ്ടുചോദ്യങ്ങൾ. ഒന്നിന് ഉത്തരമെഴുതണം.

*ആറുമാർക്കിന്റെ നാലുചോദ്യങ്ങൾ ഫോക്കസ് ഏരിയയിൽനിന്ന്. മൂന്നെണ്ണത്തിന് ഉത്തരമെഴുതണം. പുറത്തുനിന്ന് മൂന്നുചോദ്യങ്ങൾ. രണ്ടെണ്ണത്തിന് ഉത്തരമെഴുതണം.

*എട്ടുമാർക്കിന്റെ മൂന്നുചോദ്യങ്ങൾ ഫോക്കസ് ഏരിയയിൽനിന്ന്. രണ്ടെണ്ണത്തിന് ഉത്തരമെഴുതണം. ഇതിൽ ഫോക്കസ് ഏരിയക്ക് പുറത്തുനിന്ന് ചോദ്യമുണ്ടാവില്ല