കണ്ണൂർ:51 റേഷൻ കടകളുടെ ലൈസൻസ് സ്ഥിരമായി റദ്ദാക്കി പുതിയ ലൈസൻസിക്കായി വിജ്ഞാപനം ചെയ്യാൻ തീരുമാനിച്ചതായി ഭക്ഷ്യ-പൊതുവിതരണ വകുപ്പ് മന്ത്രി അഡ്വ. ജി.ആർ. അനിൽ പറഞ്ഞു. ജില്ലയിലെ റേഷൻ കട ഉടമകളുടെ അദാലത്തിന് ശേഷം വാർത്താ സമ്മേളനത്തിൽ സംസാരിക്കുകയായിരുന്നു മന്ത്രി.

നാല് റേഷൻ കടകളുടെ ലൈസൻസ് അനന്തരാവകാശികൾ ഇല്ലാത്തതിനാൽ റദ്ദാക്കി പുതിയ വിജ്ഞാപനം നടത്താൻ അദാലത്തിലാണ് തീരുമാനിച്ചത്. അദാലത്തിൽ മന്ത്രിയുടെ സാന്നിധ്യത്തിൽ നേരിട്ട് 39 പരാതികൾ തീർപ്പാക്കി. നേരത്തെ നടപടികൾ പൂർത്തിയാക്കിയ കടകൾ ഉൾപ്പെടെ 76 അപേക്ഷകളാണ് തീർപ്പാക്കിയത്.

അനന്തരാവകാശ നിയമപ്രകാരം 12 റേഷൻ കടകൾക്ക് അദാലത്തിൽ ലൈസൻസ് അനുവദിച്ചു. 13 റേഷൻ കട ഉടമകൾക്ക് ആവശ്യമായ രേഖകൾ ഹാജരാക്കാൻ സമയം അനുവദിച്ചു. ക്രമക്കേട് കാരണം ലൈസൻസ് റദ്ദാക്കിയ 10 കടകളുടെ ലൈസൻസ് പിഴ ഈടാക്കി പുനഃസ്ഥാപിച്ചു. ഇവയിൽ ഒരു വർഷക്കാലം താലൂക്ക് സപ്ലൈ ഓഫീസറുടെ നേരിട്ടുള്ള നിരീക്ഷണം ഉണ്ടാവും. ക്രമക്കേട് ആവർത്തിച്ചാൽ ലൈസൻസ് സ്ഥിരമായി റദ്ദാക്കും. പട്ടികവർഗ, മലയോര മേഖലകളിലുൾപ്പെടെ റേഷൻ വിതരണത്തിലെ വീഴ്ചകൾ ഒരു കാരണവശാലും അനുവദിക്കില്ല. പത്ത് വർഷത്തിലേറെ പഴക്കമുള്ള ലൈസൻസ് സംബന്ധിച്ച അപേക്ഷകളിൽ ഉൾപ്പെടെ തീരുമാനമെടുത്തു.

കോവിഡ് ബാധിച്ച് മരിച്ച തലശ്ശേരിയിലെ 82ാം നമ്പർ റേഷൻ കടയുടമയായിരുന്ന മഹ്‌റൂഫിന്റെ ഭാര്യയ്ക്ക് രേഖകൾ ഹാജരാക്കുന്ന മുറയ്ക്ക് ലൈസൻസ് അനുവദിക്കാൻ മന്ത്രി നിർദേശിച്ചു. ഇതിനായി വ്യവസ്ഥകൾ ഇളവ് നൽകും. ഇവർക്ക് ഏഴര ലക്ഷം രൂപയുടെ ആരോഗ്യ ഇൻഷൂറൻസിന് അർഹതയുണ്ട്. ഇത് ലഭ്യമാക്കാൻ വേണ്ട സഹായം നൽകാൻ മന്ത്രി നിർദേശം നൽകി.